06-Jan-2025

ଜମନକିରା ଭୋଜପୁର ପି.ଡ଼ବ୍ଲ.ଡ଼ି ରାସ୍ତା ଭୂଇଁୟା ପଡ଼ା ବୁଲାଣିରେ ଦୁର୍ଘଟଣା ଘଟି ଜଣେ ୨୫ ବର୍ଷୀୟ ଯୁବକଙ୍କ ମୃତ୍ୟୁ ଘଟିଛି l ମୃତକ ଯୁବକ ଜଣକ ଜମନକିରା ସଦର ମହକୁମା ଖଇରଡ଼ିହି ଗ୍ରାମର ହେମନ୍ତ ଭଇଂସାଙ୍କ ପୁଅ ସୌଦାଗର ଭଇଂସା ଥିବା ପ୍ରାଥମିକ ତଦନ୍ତରୁ ଜଣା ପଡ଼ିଛି। ସୌଦାଗର ଜମନକିରା ସଦର ମହକୁମା ଟାଙ୍ଗରମାଲ ଗ୍ରାମର ଦୀପକ ସୁନାନିଙ୍କ ସହିତ ଜମନକିରା ପଟକୁ ଆସୁଥିବା ବେଳେ ଭରସାମ୍ୟ ହରାଇ ଦୁର୍ଘଟଣା ଘଟିଥିବା ନେଇ ପ୍ରତକ୍ଷ୍ୟଦର୍ଶୀ ମାନେ ପ୍ରକାଶ କରିଛନ୍ତି। ଦୁର୍ଘଟଣା ଯୋଗୁଁ ସୌଦାଗରଙ୍କ ମୁଣ୍ଡରେ ଆଘାତ ହୋଇଥିବା ବେଳେ ଦୀପକ ସାମାନ୍ୟ ଆହତ ହୋଇଛନ୍ତି। ଦୁର୍ଘଟଣା ପରେ ଖବର ପାଇ ସ୍ଥାନୀୟ ଜମନକିରା ପୋଲିସ ଟିମ ଘଟଣାସ୍ଥଳକୁ ପହଞ୍ଚି ଗୁରୁତର ସୌଦାଗର ଓ ଦୀପକଙ୍କୁ ପୋଲିସ ଗାଡ଼ିରେ ଜମନକିରା ସ୍ୱାସ୍ଥ୍ୟକେନ୍ଦ୍ରକୁ ଆଣିଥିଲେ। ସ୍ୱାସ୍ଥ୍ୟକେନ୍ଦ୍ରରେ ଅବସ୍ଥା ଗୁରୁତର ଥିବାରୁ ସୌଦାଗରଙ୍କୁ ଜମନକିରା ଅଗ୍ନିଶମ ବିଭାଗୀୟ ଗାଡ଼ିରେ କୁଚିଣ୍ଡା ସ୍ଥାନାନ୍ତର କରାଯାଇଥିଲା। କୁଚିଣ୍ଡାରେ ସୌଦାଗରଙ୍କୁ ଡାକ୍ତର ମୃତ ବୋଲି ଘୋଷଣା କରିଥିଲେ। ଜମନକିରା ପୋଲିସ ଘଟଣାର ତଦନ୍ତ କରୁଛି।
(ଜମନକିରାରୁ ନଗମା ବେଗମଙ୍କ ରିପୋର୍ଟ)