11-Nov-2024

ପାଟଣାଗଡ଼ (ପୁର୍ଣ୍ଣ ଶଶୀ ଶେଖର ରାଓ) ବଲାଙ୍ଗିର ଜିଲ୍ଲା ବେଲପଡା ଥାନା ସଲଣ୍ଡି ଗାଁ ର ଶତାଧିକ ପୁରୁଷ ଓ ମହିଳା ଜ୍ଞାନ ପ୍ରକାଶ ବେହେରା ଙ୍କ ହତ୍ୟା ର ଗୁମର ଖୋଲିବାକୁ ରାଜରାସ୍ତାକୁ ଓହ୍ଲାଇଥିଲେ। ସୂଚନା ଅନୁସାରେ ୧୪/୧୦/୨୪ ଦିନ ବଲାଙ୍ଗିର ଜିଲ୍ଲା ବେଲପଡା ଥାନା ସଲଣ୍ଡି ଗାଁ ର ଦୈତ୍ୟାରି ବେହେରାଙ୍କ ପୁଅ ଜ୍ଞାନ ପ୍ରକାଶ ବେହେରା (୨୭) ନିଜ ମୋଟରସାଇକେଲ (ଓ ଡି ୦୩ ୟୁ ୫୬୧୯) ଯୋଗେ ଘରୁ ବାହାରି କୁଆଡେ ଯାଇ ଆଉ ଘରକୁ ଫେରି ନଥିଲେ। ପରିବାର ଲୋକେ ଖୋଜାଖୋଜି କରି ନପାଇବାରୁ ବେଲ ପଡ଼ା ଥାନା କୁ ୧୬/୧୦/୨୪ ଦିନ ଅଭିଯୋଗ କରିବା ପାଇଁ ଆସିଥିବା ବେଳେ ବେଲପଡା ପୋଲିସ ତାଙ୍କ ଅଭିଯୋଗ ପତ୍ର ରଖିନଥିଲେ ପୁଣି ସନ୍ଧ୍ୟା ସମୟରେ ଅଭିଯୋଗ ପତ୍ର ରଖିଥିବା ପୂର୍ବରୁ ଗୋଟିଏ ମୋଟରସାଇକେଲ ବେଲ ପଡ଼ା ଥାନା ଅନ୍ତର୍ଗତ ଥୁଣ୍ଡିବାହାଲ ଓ ଭାଲୁଖାଇ ମଝି ଜଙ୍ଗଲ ରୁ ପାଇଥିବାରୁ ସେ ବାଇକ୍ ଟି ଜ୍ଞାନ ପ୍ରକାଶ ବେହେରା ଙ୍କ ବୋଲି ଚିହ୍ନଟ କରାଯାଇଥିଲା। ସଲଣ୍ଡି ଗାଁ ର ଶହ ଶହ ଲୋକ ଉକ୍ତ ଜଙ୍ଗଲ କୁ ଯାଇ ଖୋଜାଖୋଜି କରିବା ପରେ ରାତିରେ କିଛି ପତ୍ତା ମିଳିନଥିବାରୁ ଫେରି ଆସିଥିଲେ। ପୁଣି ୧୭/୧୦/୨୪ ଦିନ ସକାଳୁ ଖୋଜାଖୋଜି କରିବା ପରେ ଜଙ୍ଗଲ ଭିତରେ ଏକ ମୃତଦେହ ମିଳିଥିଲା ଏବଂ ତାହା ଜ୍ଞାନ ପ୍ରକାଶ ବେହେରା ଙ୍କ ବୋଲି ଜଣାପଡିଥିଲା। ଘଟଣା ସ୍ଥଳରେ ବେଲ ପଡ଼ା ପୋଲିସ ଓ ବଲାଙ୍ଗିର ଫରେନ୍ସି ଟିମ୍ ପହଞ୍ଚି ତଦନ୍ତ ଆରମ୍ଭ କରିଥିଲେ। ପରିବାର ବର୍ଗଙ୍କ ଠାରୁ ତାହା ଏକ ହତ୍ୟାକାଣ୍ଡ ବୋଲି ଅଭିଯୋଗ କରାଯାଇଥିଲେ ସୁଦ୍ଧା କୌଣସି ସୁରାକ ମିଳିନଥିଲା।ଫରେନ୍ସି ରିପୋର୍ଟ ଆସିବା ପରେ ହତ୍ୟା ବୋଲି ସ୍ପଷ୍ଟୀକରଣ ହେବାପରେ ମଧ୍ୟ ପୋଲିସ ପକ୍ଷରୁ କୌଣସି ପଦକ୍ଷେପ ନିଆଯାଇନଥିବା ବେଳେ ପରିବାର ଲୋକେ ବଲାଙ୍ଗିର ଜିଲ୍ଲା ଆରକ୍ଷୀ ଅଧିକ୍ଷକ ଙ୍କ ଦ୍ବାରସ୍ଥ ହୋଇଥିଲେ। ତାପରେ ମଧ୍ୟ ପୋଲିସ ପ୍ରଶାସନ ଅପରାଧୀ ମାନଙ୍କୁ ଧରିବାରେ ଅସକ୍ଷମ ହେବାରୁ ଗାଁ ଲୋକେ ନ୍ୟାୟ ପାଇବା ଆଶାରେ ଆଜି ରାଜରାସ୍ତାକୁ ଓହ୍ଲାଇଥିଲେ। ସଲଣ୍ଡି ଗାଁ ବସଷ୍ଟାଣ୍ଡ ତଥା ବଲାଙ୍ଗିର କଣ୍ଟାବାଞ୍ଜି ରାସ୍ତା ୪୨ ନମ୍ବର ରାଜପଥ କୁ ଆଜି ସକାଳ ୮:୩୦ ରୁ ରାସ୍ତାରୋକ କରିଥିଲେ।

ଘଟଣା ସ୍ଥଳରେ ପାଟଣାଗଡ଼ ଉପଖଣ୍ଡ ପୋଲିସ ଅଧିକାରୀ ସଦାନନ୍ଦ ପୁଝାରୀ,ବେଲପଡା ଥାନା ଅଧିକାରୀ ଅନନ୍ତ ପ୍ରଧାନ, ପାଟଣାଗଡ଼ ଥାନା ଅଧିକାରୀ ହରିବନ୍ଧୁ ଗଡତ୍ୟା, ଖପ୍ରାଖୋଲ ପୋଲିସ ଓ ବଲାଙ୍ଗିର ରୁ ଦୁଇ ପ୍ଳାଟୁନ ପୋଲିସ ଫୋର୍ସ ମୁତୟନ ହୋଇ ଶାନ୍ତିଶୃଙ୍ଖଳା ରକ୍ଷା କରିବାପାଇଁ ରହି ଆନ୍ଦୋଳନ ପ୍ରତ୍ୟାହୃତ କରିବା ପାଇଁ ଚେଷ୍ଟା କଲେ। କିନ୍ତୁ ଗ୍ରାମବାସୀ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ଆସିବା ପରେ ଆନ୍ଦୋଳନ ପ୍ରତ୍ୟାହୃତ କରାଯିବ ବୋଲି କହିଥିଲେ । 
ଶେଷରେ ବଲାଙ୍ଗିର ଜିଲ୍ଲା ଅତିରିକ୍ତ ଆରକ୍ଷୀ ଅଧିକ୍ଷକ ହେମନ୍ତ କୁମାର ପାଢ଼ୀ ଘଟଣା ସ୍ଥଳରେ ପହଞ୍ଚି ପରିବାର ବର୍ଗଙ୍କୁ ବୁଝାସୁଝା କରି ଯଥାଶୀଘ୍ର ଆସାମୀ ମାନଙ୍କୁ ଧରାଯିବ ଏବଂ ଉଚିତ ପଦକ୍ଷେପ ନିଆଯିବ ବୋଲି ପ୍ରତିଶ୍ରୁତି ଦେବା ପରେ ଲୋକମାନେ ୩.୩୦ ସମୟରେ ଆନ୍ଦୋଳନ ପ୍ରତ୍ୟାହୃତ କରିଥିଲେ। ପରିବାର ବର୍ଗ ଓ ଗ୍ରାମବାସୀମାନେ ଅତିରିକ୍ତ ଆରକ୍ଷୀ ଅଧିକ୍ଷକ ଙ୍କୁ ଉଚିତ ପଦକ୍ଷେପ ନେବାକୁ ଏକ ଲିଖିତ ଅଭିଯୋଗ ଦେଇଥିବା ବେଳେ ଉକ୍ତ ହତ୍ୟାକାଣ୍ଡ ର ତଦନ୍ତ ବେଲପଡା ପୋଲିସ ନକରି ସିଧା ଆରକ୍ଷୀ ଅଧିକ୍ଷକ ଙ୍କ ଦ୍ଵାରା ଏକ ସ୍ବତନ୍ତ୍ର ଟିମ୍ ଗଠନ କରି ଅପରାଧୀ ମାନଙ୍କୁ ଧରିବେ ବୋଲି ଅତିରିକ୍ତ ଆରକ୍ଷୀ ଅଧିକ୍ଷକ ହେମନ୍ତ କୁମାର ପାଢ଼ୀ ପ୍ରତିଶ୍ରୁତି ଦେଇଛନ୍ତି। ଯଦି କମ୍ ଦିନ ମଧ୍ୟରେ ପୋଲିସ ପ୍ରଶାସନ ପକ୍ଷରୁ କୌଣସି ପଦକ୍ଷେପ ଗ୍ରହଣ ନକରାଯାଏ ତାହେଲେ ପୁଣି ଆନ୍ଦୋଳନ ତୀବ୍ରତର ହେବ ବୋଲି ଗ୍ରାମବାସୀ କହିଛନ୍ତି। ଏବେ ଦେଖିବାକୁ ବାକି ରହିଲା ଯେ ଏଭଳି ହତ୍ୟାକାଣ୍ଡ ରେ ପୋଲିସ ବିଭାଗ କିଭଳି ପଦକ୍ଷେପ ନେଉଛନ୍ତି ଓ ଆସାମୀମାନଙ୍କୁ ଗିରଫ କରୁଛନ୍ତି।