26-Dec-2020

ନୟାଗଡ଼, (ପ୍ରଦୀପ କୁମାର ପଣ୍ଡା) - 1835ମସିହା ଡିସେମ୍ବର 13ତାରିଖ ପୌଷ କୃଷ୍ଣ ଅଷ୍ଟମୀ ତିଥିରେ ପଣ୍ଡିତ ପଠାଣି ସାମନ୍ତ ଜନ୍ମ ଗ୍ରହଣ କରିଥିଲେ ଖଣ୍ଡପଡା ନିକଟସ୍ଥ ଖୁଣ୍ଟୁପଡା ଗ୍ରାମ ରେ l ଗ୍ରାମର  ମହାଦେବ ଚନ୍ଦ୍ରଶେଖରଙ୍କ ପ୍ରସାଦରୁ ଜନ୍ମ ଗ୍ରହଣ କରିଥିବା ବିଶ୍ୱାସ କରି ପିତାମାତା ତାଙ୍କ ନାମ ଚନ୍ଦ୍ରଶେଖର ରଖିଥିଲେ | ତାଙ୍କ ଆଗରୁ ୨ଟି ଝିଅ ଏବଂ ଗୋଟିଏ ପୁଅ ମରିଯାଇଥିଲେ ତେଣୁ ତାଙ୍କ ନାମ ପଠାଣି ରଖାଯାଇଥିଲା | ପିଲାଦିନୁ ସେ ଉଦାସୀନ,  ମନଯୋଗୀ, ଏକାଗ୍ରଚିତ, ଅଧ୍ୟବସାୟୀ ଓ ଉଦାରମନା ଥିଲେ | ତାଙ୍କ ପିତା ଜଣେ ଜଣେ ଗଣିତ ଜ୍ୟୋତିଷ ଥିବାରୁ ସାମନ୍ତ ତାଙ୍କ ଠାରୁ ଗଣିତ ଜ୍ୟୋତିଷ ଶିକ୍ଷା ଲାଭ କରିଥିଲେ | ୨ ଗୋଟି ବାଉଁଶ ନଳୀ ସାହାଯ୍ୟରେ ଗ୍ରହ ମଣ୍ଡଳ ନକ୍ଷତ୍ର ମାନଙ୍କ ଗତି ଅବଲୋକନ କରି ସେ ଯେଉଁ ସିଦ୍ଧାନ୍ତ ରେ ଉପନୀତ ହେଲେ ତାହା ପୁରାତନ ସଂସ୍କୃତ ଜ୍ୟୋତିଷ ଶାସ୍ତ୍ରର ସିଦ୍ଧାନ୍ତ ସହିତ ଅନେକ ଅସମାନତା ଥିବାରୁ ନୂତନ ମୌଳିକ ଗଣନା ଅନୁଯାୟୀ ସେ ସିଦ୍ଧାନ୍ତ ଦର୍ପଣ ପୋଥି ରଚନା କରିଥିଲେ | 1904 ମସିହାରେ ସେ ପୁରୀ ଯାଇ ପତିତପାବନ ଦର୍ଶନ କରି ଦେହତ୍ୟାଗ କରିଥିଲେ | ଏହି ବିଶ୍ୱ ବିଖ୍ୟାତ ଜ୍ୟୋତିର୍ବଦଙ୍କ 186ତମ ଜୟନ୍ତୀ ଉତ୍ସବ ଖଣ୍ଡପଡା ବଜାର ସ୍ଥିତ ସାମନ୍ତ ଚନ୍ଦ୍ରଶେଖର ସ୍ମୃତି ମନ୍ଦିର ଏବଂ ସାମନ୍ତ ଛକ ଠାରେ କୋଭିଡ କଟକଣା ସହ ପାଳନ ହୋଇଯାଇଛି | ସକାଳ ସମୟରେ ଉଭୟ ସ୍ଥାନରେ ଥିବା ପଠାଣି ସାମନ୍ତଙ୍କ ପ୍ରତିମୂର୍ତ୍ତିରେ ପୁଷ୍ପମାଲ୍ୟ ଅର୍ପଣ କରି ବିଭିନ୍ନ ଅନୁଷ୍ଠାନର କର୍ମକର୍ତା ମାନେ ଚନ୍ଦ୍ରଶେଖର ସ୍ମୁତି ମନ୍ଦିର ନିକଟରେ ମିଷ୍ଟାନ ବଣ୍ଟନ କରିଥିଲେ | ସାମନ୍ତ ଚନ୍ଦ୍ରଶେଖର ସ୍ମୁତି ମନ୍ଦିର ଠାରେ ଆୟୋଜିତ ସ୍ମୃତି ଚାରଣ ସଭାରେ ଖଣ୍ଡପଡାର ପ୍ରଥମ ନଗରପଳ କିଶୋର ଚନ୍ଦ୍ର ଦାସ,  ଶିଶୁକବି କାଶୀନାଥ ଦାସ, ଶିକ୍ଷାବିତ ଗୋଦାବରୀଶ ମିଶ୍ର ପ୍ରମୁଖ ଅତିଥି ଭାବେ ଯୋଗ ଦେଇ ସୁଦୂର ପ୍ରସାରି ପ୍ରତିଭା ସମ୍ପର୍କ ରେ ଆଲୋକପାତ କରିଥିଲେ l ଅନୁଷ୍ଠାନ ସମ୍ପାଦକ ବିନାୟକ ସାହୁ କାର୍ଯ୍ୟକ୍ରମର ସଂଯୋଜନା କରିଥିଲେ | ଚଳିତ ବର୍ଷ ମାଟ୍ରିକ ପରୀକ୍ଷା ରେ ପ୍ରଥମ ହୋଇଥିବା ସୂର୍ଯ୍ୟକାନ୍ତ ନାୟକ ଙ୍କୁ ଅନୁଷ୍ଠାନ ତରଫରୁ ସାମନ୍ତ ପଦକ ଏବଂ ମାନପତ୍ର ପ୍ରଦାନ କରାଯାଇଥିଲା | ସହରର ସାମନ୍ତ ଛକରେ ହୋଇଥିବା ସ୍ମୃତି ଚାରଣ ସଭାରେ ସମାଜସେବୀ ତଥା ରାଜନେତା ଦୁଷ୍ମନ୍ତ ସ୍ୱାଇଁ ଯୋଗଦେଇ ସାମନ୍ତଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ ସହିତ ଧୁପ ଦୀପ ଦେଇ ପାଦ ପୂଜା କରିଥିଲେ | ପରିଶେଷରେ ଖଣ୍ଡପଡା ଅଞ୍ଚଳ ର ସୁନାମଧନ୍ୟ କଣ୍ଠ ଶିଳ୍ପୀ ପ୍ରାଣ କୃଷ୍ଣ ମହାରଣାଙ୍କ ଭଜନ ସନ୍ଧ୍ୟାକୁ ଅଞ୍ଚଳବାସୀ ବିଳମ୍ବିତ ରାତି ପର୍ଯ୍ୟନ୍ତ ଉପଭୋଗ କରିଥିଲେ l