-+91-9937148622 |
prerana_bgr@rediffmail.com |
Friday 17th May 2024 |
R.N.I. Regd No. ODIODI/2010/46693
Breaking News
29-Apr-2024
ବଲାଙ୍ଗୀର(ପ୍ରେରଣା ଖବର ): ଆଜି ବଲାଙ୍ଗୀର ଭାଜପା ଲୋକସଭା ପ୍ରାର୍ଥିନୀ ସଂଗୀତା କୁମାରୀ ସିଂଦେଓ, ଲୋଇସିଂହା ବିଧାୟକ ପ୍ରାଥୀ ଡ.ମୁକେଶ ମହାଲିଙ୍ଗ ଓ ବଲାଙ୍ଗୀର ସଦର ବିଧାୟକ ପ୍ରାର୍ଥୀ ଗୋପାଳଜୀ ପାଣିଗ୍ରାହୀ ଆଜି ୨୦୨୪ ନିର୍ବାଚନ ପାଇଁ ନାମାଙ୍କନପତ୍ର ଦାଖଲ କରିଛନ୍ତି । ସାଂସଦ ପଦ ପାଇଁ ସଂଗୀତା କୁମାରୀ ସିଂଦେଓ ବଲାଙ୍ଗୀର ଜିଲ୍ଲାପାଳ
ଗୌରବ ଶିବାଜୀ ଇସଲୱାରଙ୍କ ପାଖରେ ନାମାଙ୍କନ ଦାଖଲ କରିଛନ୍ତି। ସେହିପରି ଲୋଇସିଂହା ବିଧାୟକ ପ୍ରାର୍ଥି ଡ.ମୁକେଶ ମହାଲିଙ୍ଗ ସେହି ନିର୍ବାଚନମଣ୍ଡଳିର ରିଟର୍ଣ୍ଣୀଂ ଅଫିସର ଥିବା ଅତିରିକ୍ତ ଜିଲ୍ଲାପାଳ(ପ୍ରଶାସନ)ଡ.ବିଜୟକୁମାର ସେଠୀଙ୍କ ପାଖରେ ନାମାଙ୍କନ ଦାଖଲ କରିଥିବା ବେଳେ ବଲାଙ୍ଗୀରେ ସଦର ଆସନ ପାଇଁ ଭାଜପାର ଗୋପାଳଜୀ ପାଣିଗ୍ରାହୀ ଉପଜିଲ୍ଲାପାଳଙ୍କ କାର୍ଯ୍ୟାଳୟଠାରେ ନାମାଙ୍କନ ଦାଖଲ କରିଛନ୍ତି । ଏହି ନାମାଙ୍କନ ପାଇଁ ଭାଜପା ଦଳ ପକ୍ଷରୁ ବଲାଙ୍ଗୀର ସହରରେ ଏକ ବିଶାଳରାଲି କରାଯାଇଥିଲା । ସ୍ଥାନୀୟ ପୁରୁଣା ଘରୋଇ ବସଷ୍ଟାଣ୍ଡ କାର୍ଯ୍ୟାଳୟଠାରୁ ଏହି ଶୋଭାଯାତ୍ରା ବାହାରି ବଲାଙ୍ଗୀର ସହରରରୁ ଗୁଡି ପଡା ଛକ, ପିପି ଏକାଡେମୀ, ବିକ୍ରମଛକ, ଦୈନିକ ବଜାର ଦେଇ ସମଲେଶ୍ୱରୀ ମନ୍ଦିର, ପାଟଣେଶ୍ୱରୀ ମନ୍ଦିର ପାଟଣା ଛକ ଦେଇ ପରିକ୍ରମା କରି ଜିଲ୍ଲାପାଳ କାର୍ଯ୍ୟାଳୟରେ ପହଞ୍ଚିଥିଲା । ହଜାର ହଜାର ସଂଖ୍ୟାରେ ଦଳୀୟ କର୍ମକର୍ତ୍ତା ଏହି ଶୋଭାଯାତ୍ରାରେ ସାମିଲ ହୋଇଥିଲେ ।ସଂଗୀତା କୁମାରୀ ସିଂଦେଓଙ୍କ ସହିତ ତାଙ୍କ ସ୍ୱାମୀ ପୂର୍ବତନମନ୍ତ୍ରୀ କନକବର୍ଦ୍ଧନ ସିଂଦେଓ, ସଂଗୀତାଙ୍କ ଝିଅ ନିଭୃିତିକୁମାରୀ ସିଂଦେଓ ମେୱାର, ଶିବଦତ୍ତ ମିଶ୍ର,ବିଜେପିର ପ୍ରଦୀପ ବଂଶଲ,ଦୀନେଶ ଶର୍ମା ପ୍ରମୁଖ ତାଙ୍କ ସହିତ ରହିଥିଲେ । ସେହିପରି ମୁକେଶ ମହାଲିଙ୍ଗ
ଲୋଇସିଂହାର ନେତା ଓ କର୍ମୀଙ୍କୁ ଧରି ସ୍ଥାନୀୟ ମହାଦେବ ମନ୍ଦିରଠାରୁ ଏହି ଶୋଭାଯାତ୍ରାରେ ସାମିଲ ହୋଇ ଜିଲ୍ଲାପାଳ କାର୍ଯ୍ୟାଳୟ ପର୍ଯ୍ୟନ୍ତ ପହଞ୍ଚିଥିଲେ । ହଜାର ହଜାର ସମର୍ଥକଙ୍କ ସହିତ ସେ ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟରେ ନାମାଙ୍କନ ଦାଖଲ କରିଥିଲେ । ଠିକ ସେହିପରି ଗୋପାଳଜୀ ପାଣିଗ୍ରାହୀ ମଧ୍ୟ ପ୍ରଥମେ ସାଂସଦ ପ୍ରାର୍ଥୀଙ୍କ ସାଙ୍ଗରେ ଶୋଭାଯାତ୍ରା କରି ପରେ ଉପଜିଲ୍ଲାପାଳ କାର୍ଯ୍ୟାଳୟକୁ ନିଜ ସମର୍ଥକଙ୍କ ସହ ଯାଇ ନାମାଙ୍କନପତ୍ର ଦାଖଲ କରିଥିଲେ । ସାରା ଦେଶରେ ମୋଦୀ ଲହର ଚାଲିଛି । ମୋଦୀଙ୍କ ହାତରେ ରାଷ୍ଟ୍ର ସୁରକ୍ଷିତ ଅଛି ଓ ମୋଦୀଜୀଙ୍କୁ ବିକାଶଧାରାକୁ ନେଇ ଆମେ ଚଳିତ ନିର୍ବାଚନରେ ଲୋକଙ୍କ ପାଖକୁ ପହଞ୍ଚିବୁ ବୋଲି ସାଂସଦ ପ୍ରାର୍ଥୀ ସଂଗୀତା କୁମାରୀ ସିଂଦେଓ ଗଣମାଧ୍ୟମକୁ କହିଛନ୍ତି ।