01-Mar-2024

କଣ୍ଟାମାଲ(ଜୟ କୁମାର ମହାରଣାଙ୍କ ରିପୋର୍ଟ ): ବୌଦ୍ଧ ଜିଲ୍ଲାର ଅନ୍ୟତମ ବଡଥାନା ଭାବରେ କଣ୍ଟାମାଳ ଥାନାକୁ ଗଣନା କରାଯାଏ | ହେଲେ ଏହି ଥାନାରେ ଦୀର୍ଘ ୩ ସପ୍ତାହ ହେବ ଥାନା ଅଧିକାରୀ ନାହାଁନ୍ତି | ଯାହା ଫଳରେ କଣ୍ଟାମାଳ ଥାନା ଏବେ ଇନଚାର୍ଜରେ ଚାଲିଛି!ସୂଚନା ଥାଉ କି ଚଳିତ ମାସ ୯ ତାରିଖରେ ଥାନା ଅଧିକାରୀ ଗୋପୀନାଥ ପ୍ରଧାନଙ୍କ କନ୍ଧମାଳ ଜିଲ୍ଲା ଫିରିଙ୍ଗିଆ ଥାନାକୁ ବଦଳି ହୋଇଥିଲା | ଏହି ଥାନା ଉପରେ କଣ୍ଟାମାଳ ବ୍ଲକ ର ପାଖାପାଖି ୧୦୦ଖଣ୍ଡ ଗ୍ରାମର ଲକ୍ଷାଧିକ ଜନ ସାଧାରଣ ଆଇନ ଶୃଙ୍ଖଳା ପରିସ୍ଥିତି ପାଇଁ ନିର୍ଭର କରିଥାନ୍ତି | ଗଞ୍ଜେଇ ର ପେଣ୍ଠସ୍ଥଳୀ କୁହା ଯାଉଥିବା ଏହି ଥାନା ଅଂଚଳରେ ଚୋରି , ଡକାୟତି , ରାହାଜାନି , ଲୁଟତରାଜ୍ ଆଦି ଅପରାଧିକ କାର୍ଯ୍ୟକଳାପ ନିତିଦିନିଆ ଘଟଣା ହୋଇଥିବା ବେଳେ ଥାନା ଅଧିକାରୀ ନ ଥିବାରୁ ଅନେକ ମାମଲା ପଡ଼ି ରହିଛି | ଅନ୍ୟପଟେ ଆଗକୁ ସାଧାରଣ ନିର୍ବାଚନ ଆସୁଥିବାରୁ ଅନେକ ଅପରାଧିକ ଓ ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇବାର ଆଶଙ୍କା ରହିଥିବା ବେଳେ ପୂର୍ବ ବର୍ଷ ମାନଙ୍କରେ ଅନେକ ମାମଲା ପଞ୍ଜୀକୃତ ହୋଇଥିବାର ମଧ୍ୟ ନିଜର ରହିଛି | ଆଉ କିଛି ସପ୍ତାହ ପରେ ନିର୍ବାଚନ ହେଉ ଥିବାରୁ  କଣ୍ଟାମାଳ ଥାନାରେ ଥାନା ଅଧିକାରୀ ନ ଥିବାରୁ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି | ସୂଚନା ଥାଉ କି ପୂର୍ବରୁ ଆଇନ୍ ଶୃଙ୍ଖଳା ପରିସ୍ଥିତି ବିପର୍ଯ୍ୟସ୍ତ ହୋଇ ପଡ଼ି ଥିବା ବେଳେ ଯୁବ ଦକ୍ଷ ପୋଲିସ ଅଧିକାରୀ ନଳିନୀକାନ୍ତ ଦାସଙ୍କୁ ଥାନା ଅଧିକାରୀ ଭାବରେ ନିଯୁକ୍ତି ଦିଆ ଯାଇଥିଲା | ଖୁବ୍ କମ୍ ସମୟ ମଧ୍ୟରେ ସେ ଆଇନ୍ ଶୃଙ୍ଖଳା ପରିସ୍ଥିତିକୁ ନିୟନ୍ତ୍ରଣ କୁ ଆଣିବା ପରେ ପରେ ତାଙ୍କୁ ବଦଳି କରି ଦିଆଗଲା | ପରେ ତାଙ୍କ ସ୍ଥାନରେ ଗୋପୀନାଥ ପ୍ରଧାନଙ୍କୁ ନିଯୁକ୍ତି ଦିଆ ଗଲା | ପରବର୍ତ୍ତୀ ମୁହୂର୍ତ୍ତରେ ତାଙ୍କୁ ମଧ୍ୟ ଅନ୍ୟତ୍ର ବଦଳି କରି ଦିଆ ଗଲା | କଣ୍ଟାମାଳର ଗୁରୁତ୍ୱକୁ ଦୃଷ୍ଟିରେ ରଖି ଜଣେ ଯୁବ ପୋଲିସ ଅଧିକାରୀଙ୍କୁ ନିଯୁକ୍ତି ଦେବାକୁ ବୁଦ୍ଧିଜୀବୀ ମହଲରେ ଦାବି ହେଉଛି | ଆଗାମୀ ନିର୍ବାଚନ ଓ ବଢୁଥିବା ଅପରାଧିକ କାର୍ଯ୍ୟକଳାପକୁ ଦୃଷ୍ଟିରେ ରଖି ବୌଦ୍ଧ ଏସ ପି କଣ୍ଟାମାଳ ଥାନାରେ ଜଣେ ଯୁବ ଦକ୍ଷ ଥାନା ଅଧିକାରୀଙ୍କୁ ନିଯୁକ୍ତି ଦେବାକୁ ସାଧାରଣରେ ଦାବି ହେଉଛି!