15-Oct-2023

ବଲାଙ୍ଗୀର(ପ୍ରେରଣା ଖବର)-ରାଜ୍ୟରେ ଗଞ୍ଜାଇ ମାଫିଆଙ୍କ ଉତ୍ପାତ ପଛରେ ପୋଲିସ ବିଭାଗର ପ୍ରଚ୍ଛନ୍ନ ହାତ ରହୁଥିବା ଶେଷରେ ସ୍ପଷ୍ଟ ହେବାରେ ଲାଗିଛି । ବଲାଙ୍ଗୀର ଜିଲ୍ଲାର ପୁଇଁତଳା ପୋଲିସ ଦ୍ୱାରା ସୋନପୁର ଜିଲ୍ଲା ତରଭା ଥାନାର ହୋମଗାର୍ଡ ବିଜୟ ସାହୁ ଗଞ୍ଜାଇ ଚୋରାଚାଲାଣ ମାମଲାରେ ଧରାପଡି ଜେଲ ଯିବାପରେ ସୋନପୁର ପୋଲିସ ବିଭାଗ ଉପରେ ସନ୍ଦେହ ବଢିଛି । ଏପରିକି ବଲାଙ୍ଗୀର ପୋଲିସର ତଦନ୍ତ ବେଳେ ବିଜୟ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ଦେଇଥିବା ଏକ ବିଶେଷସୂତ୍ରରୁ ସୂଚନା ମିଳିଛି । ବିଜୟ ସାହୁର ମୋବାଇଲ ଟ୍ରାକକରି ପୋଲିସ ଅନେକ ତଥ୍ୟ ଜାଣିପାରିଛି । ସେହିପରି ସୋନପୁର ଏସପିଙ୍କ ଖାସ ଲୋକ ବୋଲଉଥିବା ହୋମଗାର୍ଡ ରାଜକୁମାର ପଧାନଙ୍କୁ ନେଇ ଏବେ ସୋନପୁର ପୋଲିସର ଟେନସନ ବଢିଯାଇଛି । ଗତ ରାଜକୁମାର ସୋନପୁର ପୋଲିସର ଜଣେ ବ୍ଲୁଆଏଡ ବୟ । ତାଙ୍କୁ ନଧରିଲେ ସୋନପୁର ଏସପିଙ୍କ ପାଖରେ କିଛି କାମ ହୁଏନି । ସେ ମଧ୍ୟ ଗଞ୍ଜାଇ ଚାଲାଣର କାର୍ପଟଦାର । ତାଙ୍କୁ ନେଇ ଚର୍ଚ୍ଚା ଆରମ୍ଭ ହେଲାପରେ ତାଙ୍କୁ ନିଳମ୍ବନ କରାଯାଇଛି । କେବଳ ସେତିକି ନୁହେଁ ଦିନକୁ ଦିନ ତାଙ୍କୁ ନେଇ ନୂଆ ନୂଆ ତଥ୍ୟ ସାମନାକୁ ଆସୁଛି । ରାଜକୁମାର ୨୦୧୬ରେ ରାମପୁର ଥାନା ଅଞ୍ଚଳର ଏକ ମୋବାଇଲ ଚୋରୀମାମଲାରେ ଅଭିଯୁକ୍ତ ରହିଥିଲେ । ତଥାପି ସୋନପୁର ଏସପି ତାଙ୍କୁ ତାଙ୍ଗ ନିଜ ଘରେ ବ୍ୟକ୍ତିଗତ କାମରେ ରଖିଥିଲେ । ଠିକ ସେହିପରି ଗତ ଜୁଲାଇ ମାସରେ ଏକ ସ୍କୁଟିରେ ଗଞ୍ଜାଇ ଜବତ ମାମଲାରେ ସେଥିଲା ଷଡଯନ୍ତ୍ରକାରୀ । ଘଟଣାଟି ଜଣାପଡିଲା ଉଲୁଣ୍ଡାଥାନାର ଜଣେ ମହିଳା ଏଏସଆଇଙ୍କ ଛୁଟିକୁ ନୀୟମିତ କରାଇବାକୁ ଉକ୍ତ

ହୋମଗାର୍ଡ ତାଙ୍କୁ ଦେହସୁଖ ମଧ୍ୟ ଦାବିକରିଥିବା ବିଷୟରେ ସମ୍ବଲପୁର ଡିଆଇଜିଙ୍କ ପାଖରେ ଅଭିଯୋଗ ହୋଇଛି । ପ୍ରଥମେ ସୋନପୁର ଏସପିଙ୍କ ପାଖରେ ଅଭିଯୋଗ କରି ନୀରାଶ ହେବାପରେ ମହିଳା ଏସଏସଆଇ ଜଣକ ଶେଷରେ ସମ୍ବଲପୁର ଡିଆଇଜି ଦୀପକ କୁମାରଙ୍କ ପାଖରେ ଅଭିଯୋଗ୍ କରିଥିଲେ । ସେହି ଘଟଣାରେ ଡିଆଇଜି ଅଫିସରେ କାର୍ଯ୍ୟରତ ଜଣେ ଅତିରିକ୍ତ ଏସପି ର‌୍ୟାଙ୍କର ଅଧିକାରୀ ନାରାୟଣ ନାଏକ ତଦନ୍ତ କରୁଥିବା ଜଣାପଡିଛି । କେବଳ ସେତିକି ନୁହେଁ ହୋମଗାର୍ଡ ରାଜକୁମାରଙ୍କ ନାମରେ ଅଭିଯୋଗ ପରେ ସେ ମଦ୍ୟପାନ କରି ଉଲୁଣ୍ଡା ଥାନାକୁ ପହଞ୍ଚି ସମସ୍ତଙ୍କୁ ଗାଳିଗୁଲଜ କରିଥିବା ମଧ୍ୟ ଜଣାପଡିଛି । କିନ୍ତୁ ଏତେ ସବୁପରେ ମଧ୍ୟ ରାଜକୁମାର ସୋନପୁର ଏସପି ତାଙ୍କ ଉପରେ ଏତେ ଅନୁଗ୍ରହ କାହିଁକି ବୋଲି ଜନସାଧାରଣରେ ଆଲୋଚନା ହେଉଛି । କନ୍ଧମାଳ-ବୌଦ୍ଧ ଜିଲ୍ଲାରୁ ସୋନପୁର ଜିଲ୍ଲା ଦେଇ ଯେତେ ଗଞ୍ଜାଇ ଚୋରାଚାଲାଣ ହେଉଛି ସେଥିରେ ସୋନପୁର ଜିଲ୍ଲାପୋଲିସ ମୁଖିଆଙ୍କ ଗେଲହ୍‌ାପୁଅ ସାଜିଥିବା ହୋମଗାର୍ଡମାନେ କାର୍ପଟଦାର ସାଜିଛନ୍ତି । ଚାକିରି ସିନା ହୋମଗାର୍ଡ ମାତ୍ର ତାଙ୍କର ଷ୍ଟାଇଲ କୋଟିପତି ଅଫିସର ଭଳି । ପୋଲିସ ବିଭାଗର ଉଚ୍ଚପଦସ୍ଥ ଅଧିକାରୀ କି ଭିଜିଲାନ୍ସ ତାଙ୍କୁ ହାତ ମାରିପାରନ୍ତି ନାହିଁ । ଫଳରେ ଅନାୟାସରେ ସେମାନେ ଏଭଳି ଖାକିବର୍ଦ୍ଦିରେ କଳାକାରନାମା ଚଳାଇଛନ୍ତି ବୋଲି ଅଭିଯୋଗ ହେଉଛି । ଏବେ ଗଞ୍ଜାଇ ଚାଲାଣରେ ତରଭା ଥାନାର ହୋମଗାର୍ଡ ବିଜୟ ସାହୁ ବଲାଙ୍ଗୀର ପୋଲିସ ଦ୍ୱାରା ଗିରଫ ହୋଇ ଜେଲରେ ରହିଛି । ସେପଟେ ରାଜକୁମାର ନାମରେ ଉଲୁଣ୍ଡା ଥାନାରେ ମାମଲା ରୁଜୁ ହୋଇ ତଦନ୍ତ ଚାଲିଛି । କିନ୍ତୁ ଏତେ ସବୁ ପରେ ମଧ୍ୟ ସୋନପୁର ଏସପି ମୁହଁ ଖୋଲୁନାହାଁନ୍ତି ଯାହାକି ତାଙ୍କୁ ମଧ୍ୟ ସନ୍ଦେହ ଘେରକୁ ନେଉଛି । ରାଜ୍ୟ ଗୃହ ବିଭାଗ ଓ ପୋଲିସ ଡିଜି ଏନେଇ ସ୍ୱତନ୍ତ ତଦନ୍ତ କରାଇ କାର୍ଯ୍ୟାନୁଷ୍ଠାନ ନେବାର ଆବଶ୍ୟକତା ରହିଛି ବୋଲି ଜନସାଧାରଣରେ ଦାବି ହେଉଛି ।