11-Dec-2020

ବଲାଙ୍ଗିର ଜିଲ୍ଲା କ୍ରୀଡା ଜଗତରେ ଯେଉଁ କେତେଜଣ କ୍ରୀଡାବିତ ସେମାନଙ୍କର କ୍ରୀଡା ନିପୂଣତାର ଅଲିଭାଛାପ ଛାଡିଛନ୍ତି, ସେମାନଙ୍କ ମଧ୍ୟରେ ଶାନ୍ତନୁ କୁମାର ସାହୁ ଏକ ଅଭୁଲା ବ୍ୟକ୍ତିତ୍ୱ । ୧୮ ନଭେମ୍ବର ୧୯୩୮ ମସିହାରେ ଜନ୍ମ ଗ୍ରହଣ କରିଥିଲେ । ୧୯୬୨ ମସିହାରେ ଜୀବନ ବୀମା ନିଗମ ସଂସ୍ଥାରେ କାର୍ଯ୍ୟରତ ହୋଇ ୧୯୯୬ ମସିହାରେ ସେହି ସଂସ୍ଥାରେ ଶାଖା ପ୍ରବନ୍ଧକ ଭାବରେ  ଅବସର ଗ୍ରହଣ କରିଥିଲେ । ସ୍କୁଲରେ ପାଠ ପଢ଼ୁଥିବା ସମୟରେ ଫୁଟବ ପ୍ରତି ତାଙ୍କର ଆଗ୍ରହଥିଲା ଏବଂ ତାଙ୍କର ଅଗାଧ ପରିଶ୍ରମ ଓ ଚେଷ୍ଟା ପାଇଁ ସେ ଏକ ସଫଳ ଫୁଟବଲ ଖେଳାଳୀ ଭାବରେ ସୁନାମ ଅର୍ଜନ କରିପାରିଥିଲେ । ସେ ସମୟରେ ଶୈଳଶ୍ରୀ ପେଲେସ, ବଲାଙ୍ଗିର ପାଖରେ ଥିବା ଫୁଟବଲ ପଡିଆ ଏକ ନାମକରା ଫୁଟବଲ ପଡିଆ ଥିଲା ଓ ପାଟଣା ମହାରାଜଙ୍କ ପ୍ରତ୍ସୋହନରେ ବିଭିନ୍ନ ସମୟରେ ଫୁଟବଲ ପ୍ରତିଯୋଗିତା ମାନ ଅନୁଷ୍ଠିତ ହେଉଥିଲା । ସ୍କୁଲରେ ପାଠ ପଢୁଥିବା ସମୟରେ ୧୯୫୦-୫୧ ମସିହାରୁ  ସେ ଫୁଟବଲ ଖେଲିବା ଆରମ୍ଭ କରିଥିଲେ । 
    ୧୯୫୩ ମସିହାରେ ବାଲେଶ୍ୱରଠାରେ ଅନୁଷ୍ଠିତ ହୋଇଥିବା ନିଖିଳ ଓଡିଶା ଅନ୍ତଃ ସ୍କୁଲ ଫୁଟବଲ ପ୍ରତିଯୋଗିତାରେ ପ୍ରଥମ ଥର ଭାଗନେଇ କଟକ ଟିମ୍ ଠାରୁ ପରାସ୍ତ ହୋଇଥିଲେ । ୧୯୫୪ ମସିହାରେ ଅନୁଷ୍ଠିତ ଅନ୍ତଃସ୍କୁଲ ପ୍ରତିଯୋଗିତରେ ପୃଥ୍ୱରାଜ ହାଇସ୍କୁଲ ଫୁଟବଲ ଟିମକୁ  ଚମ୍ପିଏନ୍ କରିବାରେ ତାଙ୍କର ମୁଖ୍ୟ ଭୁମିକା ରହିଥିଲା । କଲେଜରେ ପଢୁଥିବା ସମୟରେ ମଧ୍ୟ ବିଭିନ୍ନ ସ୍ତରରେ ଅନୁଷ୍ଠିତ ଫୁଟବଲ ପ୍ରତିଯୋଗିତାରେ ଭାଗନେଉଥିଲେ ଓ ୧୯୫୪-୫୫ ମସିହାରେ ଅନ୍ତଃ ଜିଲ୍ଲା ଫୁଟବଲ ପ୍ରତିଯୋଗିତାରେ ବଲାଙ୍ଗିର ଜିଲ୍ଲା ତରଫରୁ ପ୍ରତିନିଧିତ୍ୱ କରିବାର ସୁଯୋଗ ପାଇଥିଲେ । ଶାନ୍ତନୁ ବାବୁଙ୍କ ଫୁଟବଲ ଖେଳ କେବଳ ବଲାଙ୍ଗିର ଜିଲ୍ଲା ପାଇଁ ସିମିତ ନଥିଲା, ସେ ମଧ୍ୟ ସମ୍ବଲପୁର, ସୁନ୍ଦରଗଡ ଓ କଲାହାଣ୍ଡି ଜିଲ୍ଲା ଫୁଟବଲ ଟିମ ତରଫରୁ ପ୍ରତିନିଧିତ୍ୱ କରିବା ସୁଯୋଗ ପାଇଥିଲେ । 
    ଭାରତୀୟ ଜୀବନ ବୀମା ନିଗମ କାର୍ଯ୍ୟରତ ଥାଇ ମଧ୍ୟ ଫୁଲବଲ ଖେଳକୁ ଅତି ଗଭୀରତା ସହିତ ଭଲପାଉଥିଲେ ଓ ବିଭିନ୍ନ ସମୟରେ ବିଭିନ୍ନ ଜିଲ୍ଲା ତଥା ବିଭିନ୍ନ ଫୁଟବଲ ପ୍ରତିଯୋଗିତାରେ ପ୍ରତିନିଧିତ୍ୱ କରୁଥିଲେ । ୧୯୫୮ ମସିହାରେ ସମ୍ବଲପୁର ଜିଲ୍ଲା ତରଫରୁ ରାୟପୁର (ଛତିସଗଡ)ରେ ଅନୁଷ୍ଠିତ ହୋଇଥିବା ସର୍ବଭାରତୀୟ ଫୁଟବଲ ପ୍ରତିଯୋଗିତାରେ ପ୍ରତିନିଧିତ୍ୱ କରି ସମ୍ବଲପୁର ଟିମକୁ ଚମ୍ପିଏନ୍ କରିବାରେ ମୁଖ୍ୟ ଭୂମିକା ଗ୍ରହଣ କରିଥିଲେ । କଲେଜରେ ପଢ଼ୁଥିବା ସମୟରେ ୧୯୫୮ ରୁ ୧୯୬୨ ମସିହା ପର୍ଯ୍ୟନ୍ତ ଉତ୍କଳ ବିଶ୍ୱବିଦ୍ୟାଳୟର ଫୁଟବଲ ଟିମ୍‌ରେ ଜଣେ ସଦସ୍ୟ ଭାବେ ପ୍ରତିନିଧିତ୍ୱ କରିବାରେ ଗୌରବ ଅର୍ଜନ କରିଥିଲେ । ଏହି ସମୟରେ ବଲାଙ୍ଗିର ମାଟିର ଆଉ ଜଣେ ଦକ୍ଷ କ୍ରୀଡାବିତ ମଧୁସୁଦନ ବାବୁ ମଧ୍ୟ ସେହ ଫୁଟବଲ ଟିମରେ ଜଣେ ସଦସ୍ୟ ଭାବରେ ପ୍ରତିନିଧିତ୍ୱ କରିବାରେ ସୁଯୋଗ୍ୟ ପାଇଥିଲେ । ୧୯୬୧-୧୯୬୨ ମସିହାରେ ବାରବାଟୀ ଷ୍ଟାଡିୟମ, କଟକ ଠାରେ ଅନୁଷ୍ଠିତ କଟକ କମ୍ବାଇନ୍ ଏବଂ ପଶ୍ଚିମ ବଙ୍ଗାଳ ଏକାଦଶ ସହିତ ଫୁଟବଲ ପ୍ରିଯୋଗିତାରେ କଟକ ତରଫରୁ ଗୋଲ ଟିଏ ଦେଇ ତାଙ୍କର କ୍ରୀଡା ନିପୂଣତାର ପ୍ରଦର୍ଶର୍ନ କରିଥିଲେ । ଏହି ପ୍ରତିଯୋଗିତାରେ କଟକ ଟିମ୍ ତରଫରୁ ଆର୍ନ୍ତଃଜାତୀୟ ଫୁଟବଲ ଖେଳାଳୀ ଗୋଳକ ସାମଲଙ୍କ ସହିତ ଗୋଟିଏ ଟିମରେ ଖେଳିବାର ଗୌରବ ଅର୍ଜନ କରିଥିଲେ । ଏହି ପ୍ରତିଯୋଗିତାଟି ତାଙ୍କ ପାଇଁ ପାଲଟି ଯାଇଛି ଏକ ଅଭୁଳା ସ୍ମୃତି ଏବଂ ଆଜି ଯାଏଁ ସେ ତାହାକୁ ପାଶୋରି ପାରି ନାହାନ୍ତି । ବଲାଙ୍ଗିରଠାରେ ତାଙ୍କର ରହଣି ସମୟରେ କଣ୍ଟାବାଞ୍ଜିରେ ଅନୁଷ୍ଠିତ ସର୍ବଭାରତୀୟ ଫୁଟବଳ ପ୍ରତିଯୋଗିତାରେ ବଲାଙ୍ଗିର ଟିମ୍ ତରଫରୁ ପ୍ରତିନିଧିତ୍ୱ କରି ଭାରତୀୟ ଫୁଟବଲ ତାରକା ଆପଲ୍‌ାରାଜୁ ଓ ଭେଲାରଙ୍କ ସହିତ ଖେଳିବାର ସୁଯୋଗ  ପାଇଥିଲେ ।  
    ଶାନ୍ତନୁ ବାବୁଙ୍କ ଫୁଟବଲ ଖେଳର ନୂତନତ୍ୱ ସେ ସମୟରେ ସମସ୍ତ କ୍ରୀଡାବିତ ତଥା ଦର୍ଶକମାନଙ୍କୁ ମୁଗ୍ଧ କରିଥିଲା ଓ ସାଥି ଫୁଟବଲ ଖେଳାଳୀ ମାନଙ୍କୁ ଏହି ନୂତନ ଶୈଳୀରେ ଖେଳିବା ପାଇଁ ସେ ସବୁବେଳେ ପ୍ରେରଣା ଦେଉଥିଲେ । ୧୯୭୧ ମସିହା ଥିଲା ଶାନ୍ତନୁ ବାବୁଙ୍କ ପାଇଁ ଏକ ସ୍ମରଣୀୟ ବର୍ଷ । ସେହି ବର୍ଷ ଗାନ୍ଧୀଷ୍ଟାଡିୟମ, ବଲାଙ୍ଗିର ଠାରେ ଅନୁଷ୍ଠିତ ଅନ୍ତଃ ଜିଲ୍ଲା ଫୁଟବଲ ପ୍ରତିଯୋଗିତାରେ ବଲାଙ୍ଗିର ଜିଲ୍ଲା ତରଫରୁ ପ୍ରତିନିଧିତ୍ୱ କରି କଟକ ଜିଲ୍ଲା ଫୁଟବଲ ଟିମ୍‌କୁ ପରାସ୍ତ କରିଥିଲେ ଓ ବିଜୟ ଗୋଳମଧ୍ୟ ନିଜେ ସ୍କୋର କରିଥିଲେ । ଏହି ପ୍ରତିଯୋଗିତା ପରେ ପରେ ସେ ସେହି ଦିନ ତାଙ୍କର ଫୁଟବଲ ଖେଳର ଅବସର ଘୋଷଣା କରିଥିଲେ । ଏହି କ୍ରୀଡାବିତ ବଲାଙ୍ଗିର ଫୁଟବଲ କ୍ରୀଡା ଇତିହାସରେ ଫୁଟବଲ ଟିମର ଏକ ଉଜ୍ଜଳମାନ ଅଗ୍ରଣୀ ଫରୱାଡ ଭାବରେ ସବୁଦିନ ପାଇଁ ଆଜି ମଧ୍ୟ ଅପାସୋରା ହୋଇ ରହିଯାଇଛନ୍ତି । ସେହି ପୁରୁଣା ଦିନର ସ୍ୱର୍ଣ୍ଣମ ମୁହୁତ୍ତ କ ମନେ ପକେଇ  ଆଜି ବି ସେ ଆତ୍ମ ବିଭୋର ହୋଇ ଯାଆନ୍ତି । ଏହି ପୁରାତନ ଫୁଟବଲ ତାରକା ମାନଙ୍କ ସ୍ୱପ୍ନ ସାକାର ହୋଇଥିଲା ୨୦୧୭ ମସିହାରେ ବଲାଙ୍ଗିର ଗାନ୍ଧୀ ଷ୍ଟାଡିୟମଠାରେ ସାହିଣୀ କପ୍ - ଆନ୍ତଃ ଜିଲ୍ଲା ଫୁଟବଲ ପ୍ରତିଯୋଗିତାରେ ବଲାଙ୍ଗିର ଟିମ ଚାମ୍ପିଆନ ଟ୍ରଫି ହାସଲ କରି ଏକ ସ୍ୱର୍ଣ୍ଣିମ ଅଧ୍ୟାୟ ସୃଷ୍ଟି କରିପାରିଥିଲେ । 
    ଭାରତୀୟ ଜୀବନ ବୀମା ନିଗମ ସଂସ୍ଥାରେ କାର୍ଯ୍ୟରତ ସମୟରେ ନିଗମ ତରଫରୁ ଜୋନ ସ୍ତରରେ ଅନୁଷ୍ଠିତ ବିଭିନ୍ନ ଏଥଲେଟିକ୍ସ, ଟେବୁଲ ଟେନିସ ପ୍ରଯୋଗିତାରେ ପ୍ରତିନିଧିତ୍ୱ କରିବାର ସୌଭାଗ୍ୟ ଅର୍ଜନ କରିଥିଲେ । କ୍ରୀଡାପାଇଁ ସମର୍ପିତ ଏହି କ୍ରୀଡାବିତ ଆଜିମଧ୍ୟ ବଲାଙ୍ଗିର ଜିଲ୍ଲାର କ୍ରୀଡାମାନର ଉନ୍ନତି ତଥା ଯୋଗ୍ୟ କ୍ରୀଡାବିତ ମାନେ କିପରି ସୃଷ୍ଟି ହୋଇପାରିବେ ସେଥିପାଇଁ ସେ ସକ୍ରିୟ ଅଛନ୍ତି ଓ ଯୁବ କ୍ରୀଡାବିତ ମାନଙ୍କ ପାଇଁ ଏକ ପ୍ରେରଣାର ଏକ ସ୍ରୋତ କହିଲେ ଅକ୍ତ୍ୟୁକ୍ତି ହେବ ନାହିଁ । ଜିଲ୍ଲା କ୍ରୀଡାସଂସଦର ଜଣେ ପୁରାତନ ବରିଷ୍ଠ ସଦସ୍ୟ ଭାବରେ ବିଭିନ୍ନ ସମୟରେ ସଂଘର କର୍ମକର୍ତ୍ତାମାନଙ୍କୁ ବିଭିନ୍ନ ଦିଗ୍‌ଦର୍ଶନ ଦେଇଆସୁଛନ୍ତି । ଆଜି ସେ ୮୧ ବର୍ଷରେ ପଦାର୍ପଣ କରି ମଧ୍ୟ ଚଳଚଂଚଳ,  ସୁସ୍ଥ ଅଛନ୍ତି ଓ ମନରେ ତାଙ୍କର ସେହି ଉତ୍ସାହ ଓ ଅଭିଲାଷ ଭରି ରହିଛି, ସତେ ଯେପରି ଆଜି ବି ସେ ଫୁଟବଲ ପଡିଆରେ ଭରପୁର ଫୁଟବଲ ଖେଳି ତାର ଆନନ୍ଦ ସେ ଉପଭୋଗ କରିପାରିବେ । ଭଗବାନ ଏହି କ୍ରୀଡାବିତଙ୍କୁ ଦିର୍ଘାୟୁ କରନ୍ତୁ । ସେ ଯେପରି ବର୍ତ୍ତମାନର କ୍ରୀଡାବିତ ମାନଙ୍କୁ ମାର୍ଗଦର୍ଶନ କରିପାରିବେ ଏବଂ ଏହି ସମର୍ପିତ କ୍ରୀଡାବିତ ପାଇଁ ଆଜି ବଲାଙ୍ଗିର ବାସୀ ଗର୍ବିତ । 

  ପ୍ରସ୍ତୁତି - କୃଷ୍ଣଚନ୍ଦ୍ର ମିଶ୍ର, ଏଡ୍‌ଭୋକେଟ୍‌. ଉପସଭାପତି, 
ଜିଲ୍ଲା  କ୍ରୀଡାସଂସଦ, ବଲାଙ୍ଗିର ମୋ-୯୬୯୨୪୪୦୪୪୪