16-Apr-2023

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ ): ଅଶାନ୍ତ ସହର ସମ୍ବଲପୁରରେ ଶାନ୍ତି ଫେରାଇ ଆଣିବା ପାଇଁ ଓ ସମଗ୍ର ବିଶ୍ୱର କଲ୍ୟାଣ ଓ ଶାନ୍ତି ପ୍ରତିଷ୍ଠା ପାଇଁ ଆଜି ସ୍ୱଚ୍ଛ ଭାରତ ସଂଗଠନ ଓ କୋଶଳ ହାଇସ୍କୁଲ ର ମିଳିତ ପ୍ରୟାସରେ ସ୍ଥାନୀୟ କୋଶଳ ଆବାସିକ ବିଦ୍ୟାଳୟ ଠାରେ ଏକ ସର୍ବ ଧର୍ମ ପ୍ରାର୍ଥନା ଅନୁଷ୍ଠିତ ହୋଇ ଯାଇଛି l  ପ୍ରାର୍ଥନା ସଭା ମଞ୍ଚରେ ହିନ୍ଦୁ ଧର୍ମରୁ ଶିକ୍ଷାବିଦ ପ୍ରଦୀପ ପୁରୋହିତ, ଖ୍ରୀଷ୍ଟ ଧର୍ମରୁ ପ୍ରଭାତ ଦିଗାଲ, ଲିମା ପ୍ରେମନିଧି, ମୁସଲିମ ଧର୍ମରୁ   ସୟଦ ଅଲିମୁଲ ଇସଲାମ ଯୋଗ ଦେଇ ସମ୍ବଲପୁର ସହର ତଥା ସାରା ବିଶ୍ୱ ରେ ଶାନ୍ତି,ମୈତ୍ରୀ ଓ ସଦ ଭାବନା ପ୍ରତିଷ୍ଠା ପାଇଁ ସାମୁହିକ ପ୍ରାର୍ଥନା କରିଥିଲେ l ଓ ସମସ୍ତ ଧର୍ମ  ଉପରେ ଆଲୋକପାତ କରିଥିଲେ l ଶ୍ରୀ ଦିଗାଲ ଯୀଶୁ ଖ୍ରୀଷ୍ଟ ଙ୍କ ବାଇବେଲ ପଠନ କରି ଈଶ୍ୱର ଙ୍କ ପ୍ରେମ ପରି ଆମେ ପରସ୍ପର କୁ ପ୍ରେମ କଲେ ଭଲ ପାଇଲେ  ଏକ ସୁସ୍ଥ ଓ ଶାନ୍ତ ସମାଜ ସୃଷ୍ଟି ହେବ ବୋଲି ମତ ରଖିଥିବା ବେଳେ ଶ୍ରୀ ପୁରୋହିତ ସମାଜ ରେ ସମସ୍ତଙ୍କର ବଞ୍ଚିବାର ଅଧିକାର ଅଛି, ସଦ ମାର୍ଗ ଓ ବଂଚିବାର ପ୍ରେରଣା ହିଁ ଧର୍ମ ବୋଲି କହିଥିଲେ l ଏବଂ ହିନ୍ଦୁ ଏକ ଧର୍ମ ରେ ସୀମିତ ନୁହେଁ 

ଏକ ବ୍ୟାପକ ବିଚାର ବୋଲି କହିଥିଲେ l ଆମ ସମାଜ ବିଭିନ୍ନ ରଙ୍ଗ ର ଏକ ଫୁଲ ବଗିଚା ପରି l କିନ୍ତୁ ବଗିଚା ରେ ଗୋଟିଏ ପ୍ରକାର ଫୁଲ କେବେ ଶୋଭା ପାଏନି କି ସୁନ୍ଦର ଦେଖା ଯାଏନି ବୋଲି ସୟଦ ଅଲିମୁଲ ଇସଲାମ ପ୍ରକାଶ କରିଥିଲେ l ଏହି କାର୍ଯ୍ୟକ୍ରମକୁ ସାମ୍ବାଦିକ ମନୋରଞ୍ଜନ ତ୍ରିପାଠୀ ସଂଯୋଜନା କରିଥିବା ବେଳେ ସାମ୍ବାଦିକ ସଞ୍ଜୟ ସାହୁ ଧନ୍ୟବାଦ ଅର୍ପଣ କରିଥିଲେ l ସ୍ୱଚ୍ଛ ଭାରତ  ସଂଗଠନର ସମସ୍ତ କର୍ମକର୍ତ୍ତା, କୋଶଳ ହାଇସ୍କୁଲର ଛାତ୍ର ଛାତ୍ରୀ, ଶିକ୍ଷକ, ଶିକ୍ଷୟତ୍ରୀ, ଛୋଟ ଆଶା ଅନୁଷ୍ଠାନର କର୍ମ କର୍ତ୍ତା, ସାମ୍ବାଦିକ, ସହର ର ବୁଦ୍ଧିଜୀବୀ ଏହି କାର୍ଯ୍ୟକ୍ରମରେ ଯୋଗ ଦେଇଥିଲେ l