03-Apr-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ):  ମନୋଜ ମିଶ୍ରର ରିଲାଏନସ କୋଚିଂ ସେଣ୍ଟର୍ ରୁ ଆନ୍ତଃରାଜ୍ୟ ଜାଲ୍ ସାର୍ଟିଫିକେଟ୍ ମାମଲାର   ଲିଙ୍କ୍ ପାଇ ପୁଲିସ୍ ସହରର ଆଉ ଦୁଇଟି ଘରୋଇ ସଂସ୍ଥା କେବିଭିଟିଆଇ ବା କମ୍ପଭାଇ ଭୋକେସ୍ ନାଲ୍ ଟ୍ରେନିଂ ଇନଷ୍ଟିଚ୍ୟୁଟ୍ ସହ ତାଙ୍କର ମହାବୀର ସଂସ୍ଥା ଦୁଇଟି ଉପରେ ଚଢାଉ କରିଥିଲା । ସେଠାରୁ କିଛି ବାହାରି ନଥିବା ପୁଲିସ୍ କହିଥିବାବେଳେ , ଏବେ ଏହି କେବିଭିଟିଆଇରୁ ନକଲି ସାର୍ଟିଫିକେଟ୍ ନେଇ ସମବାୟ ବିଭାଗରେ ଚାକିରୀ କରୁଥିବା ଜଣେ ଜାଲ୍ ଚାକିରିଆଙ୍କ ଘଟଣା ପଦାକୁ ଆସିବା ଚର୍ଚ୍ଚାରେ ରହିଛି । ବିଗତ ୯ ବର୍ଷ ଧରି ଚାକିରୀ କରୁଥିବା ଗୁଡଭେଲା ବ୍ଲକ୍ ର ଘୁନା ପେକ୍ସରେ ରଶ୍ମୀ ରଞ୍ଜନ ବେହେରା ନାମକ ଏହି ସମ୍ପାଦକଙ୍କ ଏଭଳି ଜାଲିଆତି ସମ୍ପର୍କରେ ଜଣେ ଜଣାଶୁଣା ସୂଚନାକର୍ମୀ ନୀଳମଣି ଯୋଷୀ ଦୁଇଦିନ ତଳେ ବଲାଙ୍ଗୀର ଏସପିଙ୍କୁ ଭେଟି ଅଭିଯୋଗ କରିଥିବା ସହ ଏହି ସାର୍ଟିଫିକେଟ୍ ଫେକ୍ ବୋଲି ଜାଣିବା ପରେ ସୁଦ୍ଧା ସମବାୟ ବିଭାଗର ଏଆରସିଏସ୍ , ଡିଆରସିଏସ୍ ଓ ଅନ୍ୟାନ୍ୟ ଅଧିକାରୀମାନେ ଚୁପ୍ ରହିବା ମଧ୍ୟ ଦୁର୍ନୀତିକୁ ପ୍ରୋତ୍ସାହିତ କରୁଥିବା ଅପରାଧ ବୋଲି ପ୍ରମୁଖ ଗଣମାଧ୍ୟମ ଦାବି କରିଛି । ଉଲ୍ଲେଖନୀୟ ଯେ ଏହି କେବିଭିଟିଆଇର ମାଲିକ ଜପବନ୍ଧୁ କମ୍ପ ବିରୁଦ୍ଧରେ ପୂର୍ବରୁ ବହୁ ଅଭିଯୋଗ ରହିଆସିଛି । ଏଥିମଧ୍ୟରେ ବନବିଭାଗର ଡାଟାଏଣ୍ଟ୍ରି ଅପରେଟର ନିଯୁକ୍ତି ଓ ଅନ୍ୟାନ୍ୟ ଜାଲିଆତିର ଅଭିଯୋଗ ଅନ୍ତର୍ଭୁକ୍ତ । ତଥାପି ବଲାଙ୍ଗୀର ପୁଲିସ୍ ଉପରଠାଉରିଆ ଭାବେ ଏହି ଅଭିଯୁକ୍ତର ସଂସ୍ଥା ଉପରେ ଚଢାଉ କରି ଛାଡିଦେଇଥିବା ସମ୍ପର୍କରେ ଲୋକେ ସନ୍ଦେହ ପ୍ରକାଶ କରିଛନ୍ତି ।

ତେବେ ବଲାଙ୍ଗୀର ଜିଲ୍ଲାରେ କଣ୍ଟାବାଞ୍ଜିର ନକଲି ଔଷଧ କାରବାର ପରେ ଆରଆଇ ଅମୀନ ନିଯୁକ୍ତି ଦୁର୍ନୀତି ସାରା ରାଜ୍ୟରେ ବହୁଚର୍ଚ୍ଚିତ ହୋଇପଡିଥିଲା । ଏହି ଆର ଆଇ ନିଯୁକ୍ତି ଦୁର୍ନୀତିରେ ବଲାଙ୍ଗୀରର ପୂର୍ବତଦ ଜିଲ୍ଲାପାଳ ଦେବରାଜ ମିଶ୍ର ଗିରଫ ହୋଇ ଜେଲ୍ ଯାଇଥିଲେ । ନକଲି ସାର୍ଟିଫିକେଟ୍ ସହ ମାର୍କ ଭିତ୍ତିକ ନିଯୁକ୍ତି ଜାଲିଆତି ଆହୁରି କେତେଜଣ ଗିରଫ ହୋଇ ଜେଲ୍ କୁ ଢୁକିଥିବାବେଳେ ଆହୁରି

କେତେକ ଅଧିକାରୀ / କର୍ମଚାରୀଙ୍କ ବିରୁଦ୍ଧରେ ମାମଲା ସରିନାହିଁ । ଏଥିରେ ଶତାଧିକ ନକଲି ଆର ଆଇ , ଅମିନଙ୍କୁ  ଚାକିରିରୁ ବହିଷ୍କୃତ କରାଯାଇଛି । ଆଉ ଜଣେ ନକଲି ଆର ଆଇ ବନାମ କାର୍ପଟଦାର୍ ଖସିଯାଇ ଏବେ ଏକ ବହୁଳ ପ୍ରସାରିତ ଦୈନିକ ସମ୍ବାଦପତ୍ରର ନାମୀ କର୍ମଚାରୀ ତଥା ବିଶିଷ୍ଟ ସାହିତ୍ୟିକ ଭାବରେ ନୀଳବର୍ଣ ଶୃଗାଳ ପାଲଟିଯାଇ ଆତ୍ମଗୋପନ କରି ରହୁଛି । ଏହି ନିଯୁକ୍ତିର ନକଲି ସାର୍ଟିଫିକେଟ୍ ଏହି ସଂସ୍ଥା ଦେଇଥିବା ଚର୍ଚ୍ଚା ହୁଏ ।ଏଣୁ ବଲାଙ୍ଗୀର ଜିଲ୍ଲାର ଏଭଳି ନକଲି ସାର୍ଟିଫିକେଟ୍ ଓ ଜାଲ୍ ନିଯୁକ୍ତିର ତଦନ୍ତ ସେଇ ଆର ଆଇ ଅମିନ ନିଯୁକ୍ତି ଦୁର୍ନୀତିଠାରୁ ଖୋଳତାଡ କରିବାକୁ ସରକାର କ୍ରାଇମବ୍ରାଞ୍ଚକୁ ନିର୍ଦ୍ଦେଶ ଦେବାକୁ ଲୋକେ ଦାବି କରୁଛନ୍ତି । ଏପରିକି ଏବର ପୂର୍ବାଞ୍ଚଳର ବହୁ ଆର ଆଇ , ଏ ଆର ଆଇ ଏହି ନକଲି ସାର୍ଟିଫିକେଟ୍ ଧରପଗଡରେ ଛାନିଆ ହୋଇପଡିଥିବା ଜଣାଯାଇଛି । ଏହା ସହିତ ଶିକ୍ଷାବିଭାଗ, ସ୍ବାସ୍ଥ୍ୟବିଭାଗ , ବନବିଭାଗ, ସମନ୍ବିତ ଶିଶୁବିକାଶ ଯୋଜନା ଇତ୍ୟାଦି ଅନ୍ୟାନ୍ୟ ସରକାରୀ ବିଭାଗର ଚାକିରିଆଙ୍କର ସାର୍ଟିଫିକେଟ୍ ଯାଞ୍ଚ ଜରୁରୀ ହୋଇ ପଡିଛି ।