03-Apr-2023

ବଲାଙ୍ଗୀର(ମଳୟ ମିଶ୍ରଙ୍କ ରିପୋର୍ଟ ): ବଲାଙ୍ଗୀରର ଏକ କୋଚିଂ ସେଣ୍ଟରବାଲା ମନୋଜ ମିଶ୍ରର ଜାଲ୍ ସାର୍ଟିଫିକେଟ୍ ମାମଲା ଡାକବିଭାଗ ନିଯୁକ୍ତିରୁ ଧରାପଡିବା ପରେ  ଏହାର ଚେର ବିଗତ ୨୦୧୬ରୁ ୭ / ୮ ବର୍ଷ ଧରି ବଲାଙ୍ଗୀର ସମେତ ରାଜ୍ୟର ବିଭିନ୍ନ ଜିଲ୍ଲାରେ ବ୍ୟାପିଥିବା ସହ ୧୪ଟି ରାଜ୍ୟର ୪୦ରୁ ଉର୍ଦ୍ଧ୍ବ ବିଶ୍ବବିଦ୍ୟାଳୟର ୧୦୦୦ରୁ ଅଧିକ  ଜାଲ୍ ଶିକ୍ଷାଗତ ଯୋଗ୍ୟତାର ନକଲି ସାର୍ଟିଫିକେଟ୍ ପୁଲିସ୍ ଜବତ କଲାଣି । ଅଦ୍ୟାବଧି ଏହି ଜାଲିଆତିର ମାଷ୍ଟରମାଇଣ୍ଡ୍ ବଲାଙ୍ଗୀରର ମନୋଜ ମିଶ୍ର ଓ ସହଯୋଗୀ ଆଲୋକ ଉଦ୍ ଗାତା ସମେତ ଏଥିରେ ୧୯ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି ।  ଏହି ଠକମନୋଜ ସହିତ ଶାସକଦଳ

ସହିତ ଅନ୍ୟାନ୍ୟ ରାଜନୈତିକ ଦଳର ନେତାଙ୍କର ସମ୍ପୃକ୍ତି ଅଭିଯୋଗରେ ବିଧାନସଭାରେ ଆଲୋଚନା ଉଠି ହୁଲ୍ ସ୍ତୁଲ୍ ହେବାପରେ ସରକାର ଏହାର ସିଆଇଡି- ସିଡି ତଦନ୍ତ ନିର୍ଦ୍ଦେଶ ଦେଇଥିବା ପ୍ରକାଶ । 

କେବଳ ଏତିକି ନୁହେଁ, ଅଭିଯୁକ୍ତ ମନୋଜ ଡାକବିଭାଗ ସମେତ ରେଳବାଇ, ଏମସିଏଲ୍ ଓ ଅନ୍ୟାନ୍ୟ ବିଭାଗର ନିଯୁକ୍ତି ଦୁର୍ନୀତିରେ ଜଡିତ ଥିବା  ଓ ତା'ର କେତେକ ସ୍ଥାନୀୟ ହାର୍ଡକୋର୍ ଅପରାଧୀଙ୍କ ସହ ସମ୍ପର୍କ ରହିଥିବାର ଜଣାପଡିଛି । ଦୀର୍ଘବର୍ଷ ଧରି ଏସବୁ ଅନ୍ୟାୟୋପାର୍ଜିତ ଟଙ୍କାରେ ସେ କୋଟି କୋଟି ଟଙ୍କାର ଜମିବାଡି ଓ ସମ୍ପତ୍ତିର ମାଲିକ ହୋଇପାରିଥିବା କୁହାଯାଉଛି । ଉତ୍ତରପ୍ରଦେଶ, ଝାଡଖଣ୍ଡ ଓ ଅନ୍ୟାନ୍ୟ ରାଜ୍ୟର ବୋର୍ଡ ଓ ୟୁନିଭରସିଟିର ଶିକ୍ଷାଗତ ନକଲି ସାର୍ଟିଫିକେଟ୍ ୨ ଲକ୍ଷରୁ ୫ ଲକ୍ଷ ଟଙ୍କାରେ ବିକି ଓ ନିଯୁକ୍ତି ନିମନ୍ତେ ୧୦ ଲକ୍ଷ ଟଙ୍କା ଦାବିକରି ସେ ପ୍ରଚୁର ଅର୍ଥ ଆଦାୟ କରିଛି । ବିଭିନ୍ନ ସ୍ଥାନରେ ତାର ବହୁ ଏଜେଣ୍ଟ ରହୁଛନ୍ତି । ଏବେ ବଲାଙ୍ଗୀର ଏସପି ନୀତିନ କୁଶଳକରଙ୍କ ନେତୃତ୍ଵରେ ପୁଲିସ୍ ର ତନାଘନା ଚଢଉ ପରେ ନକଲି ଚାକିରିଆଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଛି ଓ ଗିରଫ ଭୟରେ ସେମାନେ ଫେରାର୍ ହୋଇ ଯାଇଛନ୍ତି । 

ତେବେ ରାଜ୍ୟ କ୍ରାଇମବ୍ରାଞ୍ଚ ଅପେକ୍ଷା ଏହି ଆନ୍ତଃରାଜ୍ୟ ବ୍ୟାତ୍ପୃତ ଡାକବିଭାଗ, ରେଳବାଇ ପରି କେନ୍ଦ୍ର ସରକାରୀ ବିଭାଗର ଆପରାଧିକ ମାମଲାର ତଦନ୍ତ ନିମନ୍ତେ ସିବିଆଇ ହିଁ ଉପଯୁକ୍ତ ହୋଇପାରିଥା'ନ୍ତା ବୋଲି ଜନସାଧାରଣ ମତବ୍ଯକ୍ତ କରୁଛନ୍ତି ।  ରାଜ୍ୟର କ୍ରାଇମବ୍ରାଞ୍ଚ  ପରୀ ଅପହରଣ ଓ ହତ୍ୟା ଅଭିଯୋଗ, ପାଟଣାଗଡ ପାର୍ଶଲବୋମା ଡବଲ ହତ୍ୟାମାମଲା , ପାରଳାଖେମୁଣ୍ଡି ବନବିଭାଗ ଏସିଏଫ୍ ନିଆଁରେ ପୋଡି ମୃତ୍ୟୁଜନିତ ହତ୍ୟାଭିଯୋଗଠାରୁ ସଦ୍ୟତମ ମନ୍ତ୍ରୀ ନବଦାସ ଗୁଳିମରାଯାଇ ସ୍ପଷ୍ଟଦିବାଲୋକରେ ହତ୍ୟାକାଣ୍ଡ ପରି  ଗତ କେତୋଟି ବହୁଚର୍ଚ୍ଚିତ ଅପରାଧର ତଦନ୍ତରେ ନିନ୍ଦିତ ହୋଇଆସୁଛିି । ସିବିଆଇ ତଦନ୍ତ ବି ବିଗତବର୍ଷର ଟିଟିଲାଗଡ ବିକାଶ ଲାଠ ଅପହରଣ ଓ ହତ୍ୟାମାମଲା ଓ ରାଜ୍ୟର ଚିଟ୍ ଫଣ୍ଡ୍ ତଦନ୍ତରେ ବିଫଳ ହୋଇଛି । ତଥାପି ସଂକ୍ରାମକ ବ୍ୟାଧି ପରି ଏହି ଜାଲ୍ ସାର୍ଟିଫିକେଟ୍ ବା ଜାଲ୍ ନିଯୁକ୍ତି ଅଭିଯୋଗର ତଦନ୍ତ ନିମନ୍ତେ ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ମିଳିତ ପ୍ରଚେଷ୍ଟାରେ ଏକ ନିରପେକ୍ଷ ଉଚ୍ଚସ୍ତରୀୟ ପୁଙ୍ଖାନୁପୁଙ୍ଖ ତଦନ୍ତର ଆବଶ୍ୟକତା ରହିଛି ।