07-Dec-2020

ବଲାଙ୍ଗିର.(ପ୍ରେରଣା ଖବର)  ଦେଶରେ ନୂତନ କୃଷି ଆଇନରେ କିଛି ପରିବର୍ତ୍ତନ ବିଶେଷ କରି ନ୍ୟୁନତମ ସହାୟକ ମୂଲ୍ୟକୁ ସାମିଲ କରିବା ପାଇଁ କିଶାନ ଆନ୍ଦୋଳନ ଚାଲିଛି । ଏହି ଆନ୍ଦୋଳନକୁ ସମର୍ଥନ କରି ତଥା କୋଶଳାଞ୍ଚଳର ଚାଷୀମାନେ ଯେଉଁ ଭଳି ଭାବରେ ମଣ୍ଡିରେ ଓ ଦଲାଲ ମାନଙ୍କ ହାତରେ ହନ୍ତସନ୍ତ ହେଉଛନ୍ତି, କଟନି-ଛଟନି ବ୍ୟବସ୍ଥା ଦ୍ୱାରା ନିର୍ଯାତିତ ହେଉଛନ୍ତି, ତାର ପ୍ରତିବାଦରେ ଏହି ଆନ୍ଦୋଳନକୁ ସମର୍ଥନ କରୁଛନ୍ତି । କୋଶଳାଞ୍ଚଳର ଦୁଇ କୋଟି ଜନସାଧାରଣଙ୍କ ମୁକ୍ତି ପାଇଁ ଲଢ଼େଇ କରୁଥିବା କୋଶଳ ରାଜ୍ୟ ସମନ୍ୱୟ ସମିତି ସଦାସର୍ବଦା କୋଶଳାଞ୍ଚଳର ଚାଷୀ ଆନ୍ଦୋଳନକୁ ସକ୍ରିୟ ସହଯୋଗ  କରିଆସିଛନ୍ତି । ତେଣୁ ଏଥର ମଧ୍ୟ ଏହି ଆନ୍ଦୋଳନ ପ୍ରତି ନୈତିକ ସମର୍ଥନ ଦେବାକୁ କୋଶଳ ରାଜ୍ୟ ସମନ୍ୱୟ ସମିତି ନିଷ୍ପତ୍ତି କରିଛି । ଆଗାମୀ କାଲି କିଶାନ ସଂଗଠନ ମାନେ ଦେଇଥିବା ଭାରତ ବନ୍ଦର ଡ଼ାକରାକୁ କୋଶଳାଞ୍ଚଳର ଚାଷୀ ସଂଗଠନମାନେ ସହଯୋଗ କରୁଛନ୍ତି । ତେଣୁ ବିଭିନ୍ନ ରାଜନୈତିକ ଦଳ ଏହି ଭାରତ ବନ୍ଦକୁ ସମର୍ଥନ କରୁଥିବା ସତ୍ତ୍ୱେ କୋଶଳାଞ୍ଚଳର ଚଷୀମାନଙ୍କ ଭାବାବେଗକୁ ଆଖିଆଗରେ ରଖି ତଥା ରାଜନୀତିରୁ ଉର୍ଦ୍ଧ୍ୱରେ ରହି  କୋଶଳ ରାଜ୍ୟ ସମନ୍ୱୟ ସମିତି ମଧ୍ୟ ଏହି ଚାଷୀ ମହାଆନ୍ଦୋଳନକୁ ସକ୍ରିୟ ସମର୍ଥନ ଦେବା ପାଇଁ ନିଷ୍ପତ୍ତି କରିବା ସହ ତାର ଜିଲ୍ଲା ଶାଖାମାନଙ୍କୁ ପରାମର୍ଶ ଦେଇଛି ବୋଲି କୋଶଳ ରାଜ୍ୟ ସମନ୍ୱୟ ସମିତିର କେନ୍ଦ୍ରିୟ ଅଧ୍ୟକ୍ଷ ପ୍ରମୋଦ କୁମାର ମିଶ୍ର ସୂଚନା ଦେଇଛନ୍ତି । ଆଗାମୀ କାଲି କୋଶଳ ଆନ୍ଦୋଳନର କର୍ମକର୍ତ୍ତାମାନେ ରାଜରାସ୍ତାକୁ ଆସି କୃଷକ ଆନ୍ଦୋଳନକୁ ସମର୍ଥନ ଦେବେ ବୋଲି ଶ୍ରୀ ମିଶ୍ର ମତବ୍ୟକ୍ତ କରିଛନ୍ତି ।