22-Mar-2023

ବୀରମହାରାଜପୁର, (ବିନୋଦ ପାଣ୍ଡେ):  ସୁବର୍ଣ୍ଣପୁର ଜିଲ୍ଲା ବୀରମହାରାଜପୁର ଅତିଥି ଭବନ ସଭାଗୃହ ଠାରେ ବୀରମହାରାଜପୁର ବ୍ଲକ ଉପାଧ୍ୟକ୍ଷ ନାରାୟଣ ଲୁହାଙ୍କ ଆବାହକତ୍ୱରେ ମଙ୍ଗଳବାର ଜିଲ୍ଲା ଅଧ୍ୟକ୍ଷ ସଂଘର ଦ୍ୱତୀୟ ବୈଠକ ଅନୁଷ୍ଠିତ ହୋଇଯାଇଛି । ସଂଘର ସଭାପତି ସରୋଜ କମ୍ପଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ବୀରମହାରାଜପୁର ବ୍ଲକ ଅଧ୍ୟକ୍ଷା ଶାନ୍ତୀ ଲୁହା,ସୋନପୁର ବ୍ଲକ ଅଧ୍ୟକ୍ଷ ପ୍ରହଲ୍ଲାଦ ନାୟକ, ବିନିକା ବ୍ଲକ ଅଧ୍ୟକ୍ଷାଙ୍କ ପ୍ରତିନିଧି ତଥା ପୁର୍ବତନ ବ୍ଲକ ଅଧ୍ୟକ୍ଷ ଅଶୋକ କୁମାର ନନ୍ଦ,ଉଲୁଣ୍ଡା ବ୍ଲକ ଅଧ୍ୟକ୍ଷାଙ୍କ ପ୍ରତିନିଧି କୁର୍ତ୍ରିିବାସ ମିଶ୍ର ଏବଂ ଡୁଙ୍ଗୁରିପାଲି ବ୍ଲକ ଉପାଧ୍ୟକ୍ଷ ତଥା ପୁର୍ବତନ ବ୍ଲକ ଅଧ୍ୟକ୍ଷ ମକରଧ୍ୱଜ ସାହୁ ପ୍ରମୁଖ ଯୋଗଦେଇଥିଲେ । ଏହାରି ଭିତରେ ପଂଚାୟତ ନିର୍ବାଚନ ଶେଷ ହେବାର ଏକବର୍ଷ ପୁରିବାକୁ ବସିଥିବାବେଳେ କିଛି ସମସ୍ୟାର ସମାଧାନ ହୋଇପାରିଥିଲେହେଁ ଆହୁରି ଅନେକ ସମସ୍ୟାର ସମାଧାନ ଏଯାଏଁ  ହୋଇପାରିନାହିଁ । ଏଣୁ ଆଗାମୀ ଦିନରେ ସେସବୁ ସମସ୍ୟାର ସମାଧାନ ଦିଗରେ ସମସ୍ତେ ଦୃଷ୍ଟି ଦେବାକୁ ଆଲୋଚନା କରାଯାଇଥିଲା । ସେହିଭଳି ଦୁର୍ନିତିମୁକ୍ତ ବ୍ଲକ ଗଠନ,ବ୍ଲକରେ ଥିବା ପୁରୁଣା ଜିପ୍ ର ପରିବର୍ତନ, ବ୍ଲକ ଅଧ୍ୟକ୍ଷଙ୍କ କ୍ଷେତ୍ର ପରିଦର୍ଶନ ସମୟରେ ତାଙ୍କ ପାଇଁ ଗାଡିର ବ୍ୟବସ୍ଥା,ଆବାସ ଯୋଜନାରେ କିଭଳି ଯୋଗ୍ୟ ହିତାଧିକାରୀ ବାଦନପଡିବେ ତା ଉପରେ ଗୁରୁତ୍ୱ,ବ୍ଲକ ଅଧ୍ୟକ୍ଷ ଏବଂ ଅଧ୍ୟକ୍ଷାଙ୍କ ଦରମା ବୃଦ୍ଧି ସହ ସେମାନଙ୍କ ପାଇଁ ରାଜ୍ୟ ସରକାରଙ୍କ ପକ୍ଷରୁ ସ୍ୱସ୍ଥ୍ୟକାର୍ଡ ବ୍ୟବସ୍ଥା । ସର୍ବୋପରି ସରକାରଙ୍କ ସମସ୍ତ ଜନହିତକର ଯୋଜନା କିଭଳି ଯୋଗ୍ୟ ହିତାଧିକାରୀଙ୍କ ପାଖରେ ପହଂଚିପାରିବ ସେ ଉପରେ ବୈଠକରେ ଗୁରୁତ୍ୱ ଦିଆଯାଇଥିଲା । ଶେଷରେ ଡୁଙ୍ଗୁରିପାଲି ବ୍ଲକ ଉପାଧ୍ୟକ୍ଷ ମକରଧ୍ୱଜ ସାହୁଙ୍କ ଧନ୍ୟବାଦ ଅର୍ପଣ ପରେ ସଭା ସାଙ୍ଗ କରାଯାଇଥିଲା ।