03-Jan-2023

ବଲାଙ୍ଗିର- ଆଜି ସ୍ଥାନୀୟ ଭୀମଭୋଇ ମେଡିକାଲ କଲେଜ ପରିସରରେ ଛାତ୍ରଛାତ୍ରୀଙ୍କ ଖେଳିବା ପାଇଁ ଏକ ବାସ୍କେଟ ବଲ କୋର୍ଟ ଏବଂ ବ୍ୟାଡମିଣ୍ଟନ କୋର୍ଟ ର ଶୁଭ ଉଦ୍‌ଘାଟନ  ବଲାଙ୍ଗିର ବିଧାୟକ ନରସିଂହ ମିଶ୍ରଙ୍କ କରକମଳରେ ଅନୁଷ୍ଠିତ ହୋଇଯାଇଛି । ବଲାଙ୍ଗିର ଜିଲ୍ଲାପାଳ ଚଞ୍ଚଳ ରାଣାଙ୍କ ଉପସ୍ଥିତିରେ ଉଦ୍‌ଘାଟିତ ହୋଇଥିବା ଏହି ବ୍ୟାଟମିଣ୍ଟନ କୋର୍ଟ ଏବଂ ବାସ୍କେଟବଲ କୋର୍ଟ ପାଇଁ ଛାତ୍ରଛାତ୍ରୀ ଓ କଲେଜ କର୍ତ୍ତୃପକ୍ଷଙ୍କ ଅନୁରୋଧ କ୍ରମେ ଗତ ବର୍ଷ ବିଧାୟକ ଶ୍ରୀ ମିଶ୍ର ନିଜ ବିଧାୟକ ପାଣ୍ଠିରୁ ଦରକାର ହେଉଥିବା ଅନୁଦାନ ରାଶି ପ୍ରଦତ୍ତ କରିଥିଲେ । ଛାତ୍ରୀ ନିବାସରେ ଦୁଇଟି ବ୍ୟାଡମିଣ୍ଟନ କୋର୍ଟ, ଛାତ୍ରଙ୍କ ପାଇଁ ଦୁଇଟି ଅଲଗା ବ୍ୟାଡମିଣ୍ଟନ କୋର୍ଟ ସହ ଉଭୟ ଛାତ୍ରଛାତ୍ରୀଙ୍କ ପାଇଁ ଏକ ଉନ୍ନତ ମାନର ବାସ୍କେଟ ବଲ କୋର୍ଟ ପ୍ରଦତ୍ତ ରାଶିରେ ପୁର୍ତ୍ତ ବିଭାଗ ଦ୍ୱାରା ନିର୍ମାଣ କରାଯାଇଅଛି ।  ଏ ଉପଲକ୍ଷେ ଉପସ୍ଥିତ ଜିଲ୍ଲାପାଳ ଶ୍ରୀ ରାଣା ମେଡିକାଲ କଲେଜ ପରିସରରେ କ୍ରୀଡା ଭିତ୍ତିଭୂମି ପାଇଁ 

 ବିଧାୟକ ଶ୍ରୀ ମିଶ୍ର ବିଧାୟକ ପାଣ୍ଠି ପ୍ରଦାନ କରିଥିବାରୁ ଧନ୍ୟବାଦ ଜଣାଇଥିଲେ । ଏଠାରେ ସୂଚନାଯୋଗ୍ୟ ଯେ ପୂର୍ବରୁ ଏ ଖେଳ ପଡିଆରେ ଆଲୋକୀକରଣ ପାଇଁ ଏବଂ ଉଭୟ ଛାତ୍ରୀ ଓ ଛାତ୍ରଙ୍କ ନିମନ୍ତେ ଜିମ୍‌ନାସିୟମ ପାଇଁ ମଧ୍ୟ ବିଧାୟକ ଶ୍ରୀ ମିଶ୍ର ପାଣ୍ଠି ପ୍ରଦାନ କରିଥିଲେ । ଏ ଉପଲକ୍ଷେ ବିଧାୟକ ଶ୍ରୀ ମିଶ୍ର କହିଥିଲେ ଏହି ମେଡିକାଲ କଲେଜ ସହ ତାଙ୍କର ଏକ ଭାବଗତ ସମ୍ପର୍କ ଅଛି ତେଣୁ ଏଠାରେ କେବଳ କ୍ରୀଡା ନୁହେଁ ଚିକିତ୍ସା ଓ ପାଠପଢାରେ ମଧ୍ୟ ଦରକାର ହେଉଥିବା ସମସ୍ତ ପ୍ରକାର ଆନୁସଙ୍ଗିକ ବ୍ୟବସ୍ଥା ପାଇଁ ସେ ପ୍ରତିଶୃତିବଦ୍ଧ । ଉଚ୍ଚ ଶିକ୍ଷା ଅନୁଷ୍ଠାନ ପାଇଁ ଯେତେବେଳେ ବି ପାଣ୍ଠି ଦରକାର ପଡିଛି ସେ ଅନାୟସରେ ବିଧାୟକ ପାଣ୍ଠିରୁ ଅନୁଦାନ ପ୍ରଦାନ କରିଛନ୍ତି ବୋଲି 

 ସେ କହିଥିଲେ । ଆଲୋଚନା ସମୟରେ ନିର୍ମାଣଧିନ ୬୫ ଶଯ୍ୟା ବିଶିଷ୍ଟ ହସପିଟାଲ ଉପରେ ମଧ୍ୟ ଆଲୋଚନା ହୋଇଥିଲା । ତାର ନିର୍ମାଣ ଯେମିତି ନିର୍ଦ୍ଧାରିତ ସମୟ ମଧ୍ୟରେ ସରିବ ସେ ଉପରେ ଜିଲ୍ଲାପାଳ ଧ୍ୟାନ ଦିଅନ୍ତୁ ବୋଲି ସେ ଅନୁରୋଧ କରିଥିଲେ । କଲେଜ ର ପାଠପଢା ତଥା ଅନ୍ୟାନ୍ୟ କର୍ମଚାରୀ ସମସ୍ୟାକୁ ନେଇ ଉପସ୍ଥିତ ଡିନ୍ ସବିତା ମହାପାତ୍ର ଏବଂ ଡାକ୍ତରୀ ଛାତ୍ରଛାତ୍ରୀଙ୍କ ସହ ମଧ୍ୟ ଆଲୋଚନା ହୋଇଥିଲା । ଆଜିର ଏହି କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଭାଇସ ପ୍ରିନ୍ସିପାଲ ଡା. ଜ୍ୟୋତିଷ ଚନ୍ଦ୍ର ଚୈାଧୁରୀ, ୟୁନିୟନ ଏଡଭାଇଜର ଡା. ଶ୍ରୀକାନ୍ତ ପଣ୍ଡା, ଛାତ୍ର ସଭାପତି ବିଶାଳ କୁମାର ପଣ୍ଡା, ସଂପାଦକ ଅଭିଷେକ ପାଣି, ଉପ-ସଭାପତି ସ୍ୱାଗତ ରଂଜନ ପୁରୋହିତ, ସହ-ସଂପାଦକ ଶିବମ ଅଗ୍ରୱାଲ, ଖେଳ ସଂପାଦକ କେଦାର ନାଏକ, ସହ-ସଂପାଦକ ଗୋବିନ୍ଦ ଚନ୍ଦ୍ର ମରାଣ୍ଡିଙ୍କ ସମେତ ଛାତ୍ରୀ ନିବାସରେ ଛାତ୍ର ଛାତ୍ରୀଙ୍କ ପ୍ରତିନିଧିମାନେ ଉପସ୍ଥିତ ଥିଲେ ।