23-Dec-2022

ବଲାଙ୍ଗିର, ବଲାଙ୍ଗିର ଜିଲ୍ଲା ନାଗରିକ କମିଟି ଶିକ୍ଷା ବିଭାଗ ସବ୍ କମିଟିର ସଭ୍ୟମାନେ ସ୍ଥାନୀୟ ବ୍ରାହ୍ମଣପଡା ୟୁ.ପି. ସ୍କୁଲ ପରିଦର୍ଶନ କରି ସ୍କୁଲର ବିଭିନ୍ନ ସମସ୍ୟା ଅନୁଧ୍ୟାନ କରିଥିଲେ । ସିଆରସିସି ରଶ୍ମିତା ମହାନ୍ତି, ପ୍ରଧାନ ଶିକ୍ଷୟତ୍ରୀ ରେଣୁକା ବେହେରା, ସହକାରୀ ଶିକ୍ଷୟତ୍ରୀ ଜୟଶ୍ରୀ ପାଣିଗ୍ରାହୀ, ବିଜୟଲକ୍ଷ୍ମୀ ରାଏଗୁରୁ, ଉତ୍ତମା ବାଗ, ଗୀତାଞ୍ଜଳି ପଟେଲ ତଥା ଭାରତୀ ପାଣିଗ୍ରାହୀ ବିଦ୍ୟାଳୟରେ ଉପସ୍ଥିତ ଥିଲେ । କମିଟି ସଦସ୍ୟ ଧର୍ମବ୍ରତ ରଥ, ଗୋପଭୂଷଣ ନାଥ, ପିତବାସ ପଣ୍ଡା, ଦିବାକର ହୋତା ଏବଂ ଆର୍ତ୍ତତ୍ରାଣ ମିଶ୍ର ପରିଦର୍ଶନରେ ଉପସ୍ଥିତ ଥିଲେ । ଶିକ୍ଷାଦାନ ଉପଯୋଗୀ ୪ଟି ଶ୍ରେଣୀ ଗୃହ ଥିବା ବେଳେ ୩ଟି କୋଠରୀ ମରାମତି ଅଭାବରୁ ବ୍ୟବହାରଯୋଗ୍ୟ ହୋଇନାହିଁ ।

ଅଷ୍ଟମ ଶ୍ରେଣୀ ପାଇଁ ହିନ୍ଦୀ , ସଂସ୍କୃତ ଏବଂ ଖେଳ ଶିକ୍ଷକ ଏ ପର୍ଯ୍ୟନ୍ତ ନିଯୁକ୍ତି ପାଇ ନାହାନ୍ତି । ବିଦ୍ୟାଳୟରେ ଷ୍ଟାଫ୍ ଶୈାଚାଳୟ ଏବଂ ବାଳକ ଶୌଚାଳୟ ନାହିଁ । ପିଇବା ପାଣି ସଂରକ୍ଷଣ ବ୍ୟବସ୍ଥା ନାହିଁ । ବୋରୱେଲ ଅଚଳ ଅବସ୍ଥାରେ ଅଛି । ଲକ୍ଷ୍ମୀଯୋର ପଟକୁ ସ୍କୁଲର ପାଚେରୀ ନ ଥିବାରୁ ଅସାମାଜିକ ଲୋକଙ୍କ ଦୌରାମ୍ୟ ଲାଗି ରହିଛି । ସ୍କୁଲର କିଛି ଅଂଶ ଜବରଦଖଲ ହୋଇଥିବା ନେଇ ଉଚ୍ଚ କର୍ତ୍ତୃପକ୍ଷଙ୍କୁ ଆବଶ୍ୟକୀୟ ସୂଚନା ଦିଆଯାଇଛି । ବର୍ଷା ଦିନେ ବିଦ୍ୟାଳୟର ରାସ୍ତାକଡର ଶ୍ରେଣୀ କୋଠରୀ ଗୁଡିକର କାନ୍ଥରୁ ତଥା ଛାତରୁ ପାଣି ଝରୁଥିବାରୁ ତାହା ବ୍ୟବହାର ଉପଯୋଗୀ ହୋଇପାରୁନାହିଁ । ବିଦ୍ୟୁତ ସଂଯୋଗୀକରଣ ହୋଇପାରିନ ଥିବାରୁ ଶିକ୍ଷାଦାନରେ ବାଧା ସୃଷ୍ଟି ହେଉଛି । ସବ କମିଟିର ସଦସ୍ୟ ମାନେ ଶିକ୍ଷକ ମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରିବା ପାଇଁ ପରlମର୍ଶ ଦେଇ ଥିଲେ lଏ ନେଇ କମିଟିର ସଦସ୍ୟମାନେ ଉଚ୍ଚ କର୍ତ୍ତୃପକ୍ଷଙ୍କ ଦୃଷ୍ଟିକୁ ଅଣିବାକୁ ପ୍ରତିଶୃତି ଦେଇଥିଲେ ।