13-Nov-2020

 ବରଗଡ଼, (ମୁକୁନ୍ଦ ଦାସ) - ବରଗଡ଼ ଜିଲା ସୋହେଲା ଥାନା ଅଞ୍ଚଳରେ ଛତିଶଗଡ଼ ବ୍ୟବସାୟୀଙ୍କ ସୁନା ଗହଣା ଓ ନଗଦ ଟଙ୍କା ଲୁଟ୍‌ ମାମଲାର ପର୍ଦ୍ଦାଫାଶ ହୋଇଛି। ସୋହେଲା ପୋଲିସ ଏହି ମାମଲାରେ ୬ ଅଭିଯୁକ୍ତକୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ସୋହେଲାର ରବି ବରିହା, ବଣ୍ଟି ଦାସ, ରମେଶ ଗଡ଼ତିଆ, ନାରାୟଣ ବାଗ ,କାର୍ତ୍ତିକ ଷଣ୍ଢ ଏବଂ ଖଇରଟ ଗ୍ରାମର ମହେନ୍ଦ୍ର ସାହୁ। ସେମାନଙ୍କୁ ଗୁରୁବାର କୋର୍ଟ ଚାଲାଣ କରାଯାଇଛି। ସୂଚନାଯୋଗ୍ୟ, ଗତ ୬ ତାରିଖ ଛତିଶଗଡ଼ ରାଜ୍ୟ ରାୟପୁରରେ ରହଥିବା ସାଗର ଜୈନଙ୍କ ଏସ୍‌.ଏସ. ଜଏଲାରୀ ଦୋକାନର ୨ ଜଣ କର୍ମଚାରୀ ସୁନା ବ୍ୟବସାୟ ପାଇଁ ଏକ କାର୍‌ ଯୋଗେ ବରଗଡ଼ ଜିଲାକୁ ଆସିଥିଲେ। ତେବେ ସେମାନେ ବରମକେଲାକୁ ଫେରୁଥିବା ବାଟରେ ଘଟଣା ଦିନ ରାତି ପ୍ରାୟ ୧୯ଟାରେ ଉପରୋକ୍ତ ଅଭିଯୁକ୍ତମାନେ ଏକ କମାଣ୍ଡର ଜିପରେ ଆସି ସେମାନଙ୍କଠାରୁ ୮୦୦ ଗ୍ରାମର ସୁନା ଗହଣା ଏବଂ ନଗଦ ୧ ଲକ୍ଷ ୫୭ ହଜାର ଟଙ୍କା ଲୁଟି ନେଇଥିବା ପୋଲିସରେ ଅଭିଯୋଗ ହୋଇଥିଲା। ଅନୁସନ୍ଧାନ କରି ପୋଲିସ ଉପରୋକ୍ତ ଅଭିଯୁକ୍ତଙ୍କୁ ଗିରଫ କରିଥିବା ବେଳେ ବ୍ୟବହୃତ କମାଣ୍ଡର ଜିପ୍‌(ନଂ-ଓଆର ୧୫ଏ ୬୧୮୫)କୁ ଜବତ କରିଛି। ସେହିପରି ଲୁଟ୍‌ ହୋଇଥିବା ସୁନା ଗହଣା, ନଗଦ ଟଙ୍କା ମଧ୍ୟରୁ ପୋଲିସ ୪୬୦ ଗ୍ରାମ ସୁନା ଗହଣା ଏବଂ ନଗଦ ୫୦ ହଜାର ଟଙ୍କା ଉଦ୍ଧାର କରିବାରେ ସକ୍ଷମ ହୋଇଛି।