17-Jul-2021

କୁଚିଣ୍ଡା(ସଂଜୀବପାଣିଗ୍ରାହୀ) ଶିଳ୍ପ କରିଡ଼ର ଝାରସୁଗୁଡ଼ା ଠାରୁ କୋଲାବିରା, ଲଇଡ଼ା, କୁଚିଣ୍ଡା,ତିଲେଇବଣି, ଦେବଗଡ, ବାରକୋଟ ଦେଇ ପାରାଦ୍ୱୀପ କୁ ରେଳ ପଥ ବିଛାଇ ରେଳ ଯୋଗାଯୋଗ ର ବ୍ୟବସ୍ଥା କରିବା ପାଇଁ ଦେବଗଡ ପରି କୁଚିଣ୍ଡା ଠାରେ ମଧ୍ୟ ଦାବୀ ଉଠୁଛି ।ପ୍ରକାଶ ଥାଉ କି, ଗତ ୨୦୧୮ ମସିହାରେ ସମ୍ବଲପୁର ର ପୂର୍ବତନ ଲୋକସଭା ସଦସ୍ୟ ନଗେନ୍ଦ୍ର କୁମାର ପ୍ରଧାନ ଙ୍କ ନେତୃତ୍ୱରେ ଏ ଅଞ୍ଚଳ ର ବିଶିଷ୍ଟ ବ୍ୟକ୍ତିଙ୍କ ସ୍ବାକ୍ଷରିତ ଏକ ତଥ୍ୟ ମୂଳକ ଦାବୀ ପତ୍ର ଓଡିଶା ର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଙ୍କୁ ପ୍ରଦାନ କରାଯାଇଥିଲା । ଝାରସୁଗୁଡ଼ା ରୁ ଦେବଗଡ ପର୍ଯ୍ୟନ୍ତ ଥିବା ଅଞ୍ଚଳ ଆଦିବାସୀ ଅଧ୍ୟୁଷିତ ହୋଇଥିବା ବେଳେ, ଏଠିକାର କୃଷକ ବିଭିନ୍ନ ପ୍ରକାର ଚାଷ କରି ଉପଯୁକ୍ତ ମୂଲ୍ୟ ପାଇ ନ ଥାଏ । ଯୋଗାଯୋଗ ର ଉନ୍ନତି ହେଲେ ଏଠିକାର ଅଧିବାସୀ ଉପକୃତ ହେବା ଯୁକ୍ତି କୁ ରାଜ୍ୟ ସରକାର ଉପଲବ୍ଧି କରି ବାଣିଜ୍ୟ ଓ ପରିବହନ ବିଭାଗ ଚିଠି ନମ୍ବର ଟି ଆର ୦୭/୧୮ ତା. ୧୧/୦୯/୨୦୧୭ ରେ କେନ୍ଦ୍ର ରେଳବାଇ ବୋର୍ଡ କୁ ସୁପାରିଶ କରି ସାରିଛନ୍ତି । ସେଥି ପାଇଁ ଏହି ଦାବୀ କୁ ଦୋହରାଇବା ସହ ରେଳ ବିହୀନ ଦେବଗଡ଼ ଜିଲ୍ଲା ଏବଂ ଆଦିବାସୀ ଅଧ୍ୟୁଷିତ କୁଚିଣ୍ଡା ଉପଖଣ୍ଡ, କୋଲାବିରା, କିର୍ମିରା, ଲଇକେରା, ତିଲେଇବଣି ଅଞ୍ଚଳବାସୀ ଙ୍କ ହିତ ସହ ଦେଶ ଓ ରାଜ୍ୟ ର ଅର୍ଥନୈତିକ ଅଭିବୃଦ୍ଧି ପାଇଁ ଗୁରୁତ୍ଵ ଦେଇ କାର୍ଯ୍ୟକାରୀ କରିବାକୁ ନୂତନ ରେଳ ମନ୍ତ୍ରୀ  ଅଶ୍ଵିନୀ ବୈଷ୍ଣବ ଙ୍କ ଠାରେ ଦାବୀ କରି କୁଚିଣ୍ଡା ସାମାଜିକ ଓ ସାଂସ୍କୃତିକ ପରିଷଦ ପକ୍ଷରୁ ଦାବିପତ୍ର ପ୍ରଦାନ କରଯାଇଛି । ପ୍ରକାଶ ଥାଉ କି, ପ୍ରସ୍ତାବିତ ରେଳପଥ ୩୯୯୦୨୩ କିଲୋମିଟର ହେବା ବୋଲି ଆଶା କରା ଯାଉଥିବା ବେଳେ ଏହି ରେଳପଥ କାର୍ଯ୍ୟକାରୀ ହେଲେ ଗୋଲବନ୍ଧ ଠାରେ ତାଳଚେର - ବିମଲାଗଡ ରେଳପଥ ଓ ଭୁବନ ଠାରେ ଅନୁଗୁଳ- ସୁକିନ୍ଦା ରେଳପଥ କୁ ଅତିକ୍ରମ କରିବ । ପରିଷଦ ପକ୍ଷରୁ ଦାବିପତ୍ର ର କପି ସମ୍ବଲପୁର ଲୋକସଭା ସଦସ୍ୟ ନୀତେଶ ଗଙ୍ଗଦେବ ଓ ବରଗଡ଼ ର ଲୋକସଭା ସଦସ୍ୟ ସୁରେଶ ପୂଜାରୀ ଙ୍କୁ ମଧ୍ୟ ପ୍ରଦାନ କରି ସେମାନଙ୍କ ସହଯୋଗ କାମନା କରାଯାଇଛି ।