08-Sep-2026

(ପ୍ରିୟଦର୍ଶିନୀ ପାତ୍ର,)
ନବରଙ୍ଗପୁର:ସାକ୍ଷରତାର ବିକାଶ, ନିରକ୍ଷରତା ଦୂରୀକରଣ ଏବଂ ସମାଜର ସମସ୍ତ ବର୍ଗଙ୍କୁ ଶିକ୍ଷାର ମୁଖ୍ୟସ୍ରୋତ ସହିତ ଯୋଡ଼ିବା ଲକ୍ଷ୍ୟରେ ଉଲ୍ଲାସ (ULLAS)  ଅଭିଯାନ ମାଧ୍ୟମରେ  ଆଜି ଡାବୁଗାଁ ବ୍ଳକରେ ଏକ ବ୍ଳକସ୍ତରୀୟ ସାକ୍ଷରତା ପଦଯାତ୍ରା  ଅନୁଷ୍ଠିତ ହୋଇଯାଇଛି।ପଦଯାତ୍ରାର ଶୁଭାରମ୍ଭ ଗୋଷ୍ଟୀ ଶିକ୍ଷା ଅଧିକାରୀ ରଶ୍ମିତା ନେତାମ,ଅତିରିକ୍ତ ଗୋଷ୍ଟୀ ଶିକ୍ଷା ଅଧିକାରୀ ଭଗବାନ ମାଝୀ ଓ ସନ୍ତୋଷ କୁମାର ସାହୁ, ସରକାରୀ (ନୂତନ)ଉଚ୍ଚ ବିଦ୍ୟାଳୟର ପ୍ରଧାନ ଶିକ୍ଷକ କୃଷ୍ଣ ଚନ୍ଦ୍ର ପାତ୍ର, ଭୈରବ ଉଚ୍ଚ ମାଧ୍ୟମିକ ବିଦ୍ୟାଳୟର ଇଂରାଜି ଅଧ୍ୟାପିକା ପ୍ରତିକ୍ଷା ପ୍ରିୟ ଦର୍ଶନୀ ସ୍ଵାଇଁ  ,କ୍ରୀଡା ଶିକ୍ଷକ ହେମନ୍ତ କୁମାର ସାମଲ ପ୍ରମୁଖଙ୍କ ସହ ଶିକ୍ଷୟତ୍ରୀ, ଶିକ୍ଷକ ,ସମସ୍ତ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ, ଅନ୍ୟ ଶିକ୍ଷକ ବୃନ୍ଦ ରାଲିରେ ଯୋଗ ଦେଇଥିଲେ l ସରକାରୀ (ନୂତନ) ପଞ୍ଚାୟତ ଉଚ୍ଚ ବିଦ୍ୟାଳୟ ପରିସରରୁ ଉଲ୍ଲାସ ପଦଯାତ୍ରା ରାଲି ବାହାରି ସାକ୍ଷରତାର ବାର୍ତ୍ତା ଜଣାଇବା ସହ ହାତରେ ପ୍ଲା କାର୍ଡ ଧରି ଛାତ୍ରୀ ଛାତ୍ର ସାକ୍ଷରତାର ସଚେତନତାର ଗୁରୁତ୍ୱ ସମ୍ପର୍କିତ ବିଭିନ୍ନ ସଚେତନତା ମୂଳକ ସ୍ଲୋଗାନ ଦେଇଥିଲେ l ଉଲ୍ଲାସ କାର୍ଯ୍ୟକ୍ରମର ଲକ୍ଷ୍ୟ, ମୁଖ୍ୟ ଉଦ୍ଦେଶ୍ୟ ଓ ସାମାଜିକ ଗୁରୁତ୍ୱ ଉପରେ ଜନସାଧାରଣଙ୍କୁ ସଚେତନ କରା ଯାଇଥିଲା l ୧୫ ବର୍ଷରୁ ଉର୍ଦ୍ଧ୍ବ ଜନସାଧାରଣ ଉକ୍ତ କାର୍ଯ୍ୟକ୍ରମରେ ସାମିଲ ହୋଇ ନିରକ୍ଷରତା ଦୂର କରି ସମସ୍ତେ ସାକ୍ଷରତା ପାଇବାର ଏହାର ମୂଳ ଲକ୍ଷ୍ୟ l ସାକ୍ଷରତା କେବଳ ପଢ଼ିବା ଓ ଲେଖିବାର ଦକ୍ଷତା ନୁହେଁ, ବରଂ ବ୍ୟକ୍ତିଙ୍କୁ ନିଜ ଅଧିକାର, କର୍ତ୍ତବ୍ୟ ଓ ସୁଯୋଗ ସମ୍ପର୍କରେ ସଚେତନ କରିବା ସହିତ ତାଙ୍କୁ ଅଧିକ ସଶକ୍ତ ଓ ସ୍ୱାବଲମ୍ବୀ କରିବାର ଏକ ମହତ୍ତ୍ୱପୂର୍ଣ୍ଣ ମାଧ୍ୟମ ବୋଲି ମତ ପ୍ରକାଶ ପାଇଥିଲା।ନବଶିକ୍ଷାର୍ଥୀମାନଙ୍କୁ ମୌଳିକ ସାକ୍ଷରତା ସହିତ ଦୈନନ୍ଦିନ ଜୀବନରେ ଆବଶ୍ୟକ ଜ୍ଞାନ ଓ ଦକ୍ଷତା ପ୍ରଦାନ, ଶିକ୍ଷା ପ୍ରତି ଆଗ୍ରହ ସୃଷ୍ଟି ଏବଂ ସମାଜରେ ଶିକ୍ଷାର ଗୁରୁତ୍ୱ ବୃଦ୍ଧି କରିବା ଦିଗରେ ଉଲ୍ଲାସ ଅଭିଯାନର ଭୂମିକା ସମ୍ପର୍କରେ ମଧ୍ୟ ସଚେତନ କରାଯାଇଥିଲା।ସମ୍ପୃକ୍ତ ବିଦ୍ୟାଳୟରେ ବ୍ଳକ ସ୍ତରୀୟ ସାକ୍ଷରତା ପକ୍ଷ ଉପରେ ଏକ ସଭା ର ଆୟୋଜନ କରାଯାଇଥିଲା। ବ୍ଳକ ପ୍ରଶାସନ ଓ ଶିକ୍ଷା ବିଭାଗ ପକ୍ଷରୁ ଡାବୁଗାଁ ବ୍ଳକରେ ସାକ୍ଷରତାର ପ୍ରସାର, ନବଶିକ୍ଷାର୍ଥୀ ମାନଙ୍କୁ ଶିକ୍ଷା ସହିତ ଯୋଡ଼ିବା ଏବଂ ଏକ ସମ୍ପୂର୍ଣ୍ଣ ସାକ୍ଷର ଓ ସଶକ୍ତ ସମାଜ ଗଠନ ଦିଗରେ ନିରନ୍ତର ପ୍ରୟାସ ଜାରି ରହୁଛି। ପ୍ରତ୍ୟେକ ବିଦ୍ୟାଳୟ ପ୍ରତ୍ୟେକ ଗ୍ରାମରୁ ନିରକ୍ଷର ବ୍ୟକ୍ତିଙ୍କୁ  ଚିହ୍ନଟ କରାଯାଇ ସେମାନଙ୍କୁ ସାକ୍ଷରତା କାର୍ଯ୍ୟକ୍ରମରେ ସାମିଲ କରାଯାଇ ଏଇ ମାସ ୨୦ ତାରିଖରେ ପରୀକ୍ଷା କରାଯିବାର କାର୍ଯ୍ୟକ୍ରମ ରହିଥିବା ଆଜି ସଭାର ସଭାପତି ଗୋଷ୍ଟୀ ଶିକ୍ଷା ଅଧିକାରୀ ଶ୍ରୀମତୀ ନେତାମ ମାଡାମ ସୂଚନା ଦେଇଥିଲେ l ଉକ୍ତ ସଭାରେ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ, ଶିକ୍ଷୟତ୍ରୀ,ଶିକ୍ଷକ ପ୍ରମୁଖ ଙ୍କ ସହ ଗଣମାଧ୍ୟମ ପ୍ରତିନିଧି ଉପସ୍ଥିତ ଥିଲେ lସଭାକୁ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ଗୁପ୍ତେ ପ୍ରାସାଦ ନାଗ ବେଶ ସୁନ୍ଦର ଭାବେ ପରିଚାଳନା ଜାରିଥିବା ବେଳେ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ହେମେନ୍ଦ୍ର ନାଥ ବେହେରା ଧନ୍ୟବାଦ ପ୍ରଦାନ କରିବା ପରେ ସଭା ଭଙ୍ଗ କରାଯାଇଥିଲା