08-Sep-2026

ବିନିକା(ହିମାଂଶୁ ଶେଖର ପୁଟେଲ) ଦିନେ କି ଦୁଇଦିନ ନୁହେଁ ୧୫ଦିନରୁ ଅଧିକ ହେଲା ଟ୍ରାନସଫର୍ମର ପୋଡ଼ି ଯାଇଛି ।ଅନ୍ଧାରରେ ସାରା ପଡ଼ବାସୀ ।ଆପତ୍ତି ଅଭିଯୋଗ କରି ଆସୁଥିଲେ ମଧ୍ୟ କେହି କର୍ଣ୍ଣପାତ କରୁ ନଥିବାରୁ ଆଗାମୀ ଦିନରେ ରାଜରାସ୍ତାକୁ ଓହ୍ଲାଇବେ ବୋଲି ଧମକ ଦେଇଛନ୍ତି ପଡ଼ାର ମହିଳା ମାନେ ।ଘଟଣା ଟି ହେଉଛି ବିନିକା ବ୍ଲକ ଗଣେଷପୁର ଗ୍ରାମର ଝରାପଡ଼ା। ଏଠାରେ ଥିବା ବିଦ୍ୟୁତ ଟ୍ରାନସଫର୍ମର ଟି ଦୀର୍ଘ ୧୫ଦିନରୁ ଅଧିକ ହେଲା ପୋଡ଼ି ଯାଇଛି।ବିଦ୍ୟୁତ ସରବରାହ ପାଇଁ ପଡ଼ାବାସୀ ବିଭିନ୍ନ ସମୟରେ ବାରମ୍ବାର ଅଭିଯୋଗ କରି ଆସୁଥିଲେ ମଧ୍ୟ କେହି କର୍ଣ୍ଣପାତ କରୁନାହାନ୍ତି।ଯାହା ଫଳରେ ବର୍ତ୍ତମାନର ପରିବେଶରେ ଗୁଲଗୁଲି ଯୋଗୁଁ ଅନେକ ଲୋକ ମ୍ୟାଲେରିଆ ଭଳି ବିଭିନ୍ନ ରୋଗରେ ଆକ୍ରାନ୍ତ ହେଉଛନ୍ତି ।ସନ୍ଧ୍ୟା ହେଲେ ମଶାଙ୍କ ଆକ୍ରମଣରେ ଲୋକେ ତ୍ରାହି ତ୍ରାହି ହେଲେଣି ।ଛାତ୍ରଛାତ୍ରୀ ମାନେ ମଧ୍ୟ ପାଠ ପଢ଼ିବାରୁ ବଞ୍ଚିତ ହେଉଛନ୍ତି ।ଅନ୍ୟ ପକ୍ଷରେ ଚାର୍ଜ ନହୋଇ ମୋବାଇଲ ଗୁଡ଼ିକ ସ୍ୱିଚ ଅପ ହୋଇ ରହିଥିବାରୁ ଜରୁରୀକାଳୀନ ସୁବିଧା ନେଇ ଯୋଗାଯୋଗରୁ ବଞ୍ଚିତ ହେବାକୁ ପଡୁଛି ।ସେହିପରି ଅନ୍ଧାରର ସୁଯୋଗ ନେଇ ବିଭିନ୍ନ ପ୍ରକାରର ବିଷଧର ଜୀବଜନ୍ତୁଙ୍କ ଆଗମନ ନେଇ ଲୋକେ ଭୟଭୀତ ଅବସ୍ଥାରେ ଅତିବାହିତ କରୁଛନ୍ତି। ଆଉ କିଛିଦିନ ପରେ ପଶ୍ଚିମ ଓଡିଶାର ଗଣପର୍ବ ନୂଆଁଖାଇ ଥିବାରୁ ଯିଏ ଯେଉଁଠି ଅଛନ୍ତି ସେମାନେ ଘର ମୁହାଁ ହେବେ । ଉତ୍ସାହ ଉଦ୍ଧୀପନା ମଧ୍ୟରେ ମହାନ ଗଣପର୍ବ ପାଲନ ହେବ । ତେଣୁ ଯୁଦ୍ଧକାଳୀନ ଭିତ୍ତିରେ ନୂତନ ଟ୍ରାନସଫର୍ମର ବସାଇ ଲାଇନ ଚାର୍ଜ କରି ତୁରନ୍ତ ବିଦ୍ୟୁତ ଯୋଗାଇଦେବାକୁ ଆଜି ଗ୍ରାମର ଶତାଧିକ ମହିଳା ବିନିକା ବିଦ୍ୟୁତ ବିଭାଗ ଉପଖଣ୍ଡ ଅଧିକାରୀଙ୍କ କାର୍ଯ୍ୟାଳୟ ଆସି ଏକ ଦାବିପତ୍ର ପ୍ରଦାନ କରିଛନ୍ତି।