05-Aug-2026

ସମ୍ବଲପୁର :(ସଂଜୀବ ପାଣିଗ୍ରାହୀ )

ସ୍ୱାଧୀନତା ଦିବସ ଉପଲକ୍ଷେ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ୍ରମେ ଏବଂ ଜାତୀୟ ସଙ୍ଗୀତ "ବନ୍ଦେ ମାତରମ୍"ର ୧୫୦ ବର୍ଷ ପୂର୍ତ୍ତି ଅବସରରେ ଆସନ୍ତା ଅଗଷ୍ଟ ୯ ରୁ ୧୭ ତାରିଖ ପର୍ଯ୍ୟନ୍ତ ରାଜ୍ୟବ୍ୟାପୀ "ଘରେ ଘରେ ତିରଙ୍ଗା-୨୦୨୬" (Har Ghar Tiranga) ଅଭିଯାନ ଆୟୋଜିତ ହେବାକୁ ଯାଉଛି। ଏହି କ୍ରମରେ ସମ୍ବଲପୁର ଜିଲ୍ଲା ପ୍ରଶାସନ ପକ୍ଷରୁ ଅଭିଯାନର ସୁଚାରୁ ପରିଚାଳନା ଓ ଜନଭାଗୀଦାରିତା ବୃଦ୍ଧି ନିମନ୍ତେ ବ୍ୟାପକ ପ୍ରସ୍ତୁତି ଗ୍ରହଣ କରାଯାଇଛି। ଉକ୍ତ କାର୍ଯ୍ୟକ୍ରମ ପାଇଁ ଆଜି ସମଗ୍ର ଶିକ୍ଷା ସମ୍ମିଳନୀ କକ୍ଷ ଠାରେ ଏକ ପ୍ରସ୍ତୁତି ବୈଠକ ଜିଲ୍ଲାପାଳ ସମ୍ବଲପୁର ଶ୍ରୀ ସିଦ୍ଧେଶ୍ବର ବଳିରାମ ବୋନ୍ଦର (ଭା.ପ୍ର.ସେ) ଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଯାଇଛି। ସମସ୍ତ ବିଭାଗୀୟ ଅଧିକାରୀଙ୍କ ଉପସ୍ଥିତିରେ ଅନୁଷ୍ଠିତ ବୈଠକ ଅନୁସାରେ, ଆସନ୍ତା ଅଗଷ୍ଟ ୯ ତାରିଖ ପୂର୍ବାହ୍ନ ୮:୩୦ ରେ ରିଜର୍ଭ ପୋଲିସ ପଡ଼ିଆ ଠାରୁ ଆରମ୍ଭ ହୋଇ ଜେଲ୍ ଛକ ପର୍ଯ୍ୟନ୍ତ ହେବ। ରାଲିଟି ପୋଲିସ୍‌ ଗ୍ରାଉଣ୍ଡରୁ ବାହାରି ଲକ୍ଷ୍ମୀଟକିଜ୍‌ ଛକ, ମ୍ୟୁନିସିପାଲିଟି ଛକ, ଶହୀଦ ସ୍ଥମ୍ଭ ଦେଇ ଜେଲ୍‌ ଛକସ୍ଥିତ ବୀର ସୁରେନ୍ଦ୍ର ସାଏଙ୍କ ପ୍ରତିମୂର୍ତ୍ତି ସ୍ଥଳୀରେ ସମାପ୍ତ ହେବ।

ଏହି ରାଲିରେ ବିଦ୍ୟାଳୟ ଓ କଲେଜ ର ଛାତ୍ରଛାତ୍ରୀ, ଏନସିସି, ଏନଏସଏସ କ୍ୟାଡେଟ୍‌, ସିଭିଲ୍‌ ସୋସାଇଟି, ବେସରକାରୀ ସଂସ୍ଥା ଏବଂ ସ୍ଥାନୀୟ ନାଗରିକଙ୍କ ସମେତ ଅଂଶଗ୍ରହଣ କରିବାର କାର୍ଯ୍ୟକ୍ରମ ରହିଛି। ଶୃଙ୍ଖଳିତ ଯାତାୟାତ, ପାର୍କିଂ, ଶାନ୍ତିଶୃଙ୍ଖଳା ଏବଂ ନିରାପତ୍ତା ପାଇଁ ଆରକ୍ଷୀ ବାହିନୀକୁ ବିଶେଷ ଦାୟିତ୍ୱ ଦିଆଯାଇଛି।  

 ଜନସାଧାରଣଙ୍କୁ ଅନୁରୋଧ କି MyGov ଓ Har Ghar Tiranga ପୋର୍ଟାଲ୍‌ରେ "Selfie with Tiranga" ଅପଲୋଡ୍ କରିବାପାଇଁ। ଏହି ଜାତୀୟ ଅଭିଯାନରେ ପ୍ରତ୍ୟେକ ନାଗରିକ ନିଜ ନିଜ ଘରେ ଜାତୀୟ ପତାକା ଉତ୍ତୋଳନ କରି ପତାକାର ମର୍ଯ୍ୟାଦା ରକ୍ଷା କରିବା ସହ ଅଭିଯାନକୁ ସଫଳ କରିବାକୁ ଜିଲ୍ଲା ପ୍ରଶାସନ ପକ୍ଷରୁ ସାନୁରୋଧ ଆହ୍ୱାନ କରାଯାଇଛି।

ଉକ୍ତ ବୈଠକରେ ଅତିରିକ୍ତ ଜିଲ୍ଲାପାଳ ଶ୍ରୀ ଅଶୋକ କୁମାର ଭୋଇ, ସମ୍ବଲପୁର ମହାନଗର ନିଗମ ର ଆୟୁକ୍ତ ଶ୍ରୀ ରେହାନ୍ ଖେତ୍ରି (ଭା.ପ୍ର.ସେ) ଏବଂ ସମସ୍ତ ଜିଲ୍ଲାସ୍ତରୀୟ ଅଧିକାରୀ ଉପସ୍ଥିତ ଥିଲେ।