14-Jul-2026

ବଲାଙ୍ଗିର(ପ୍ରେରଣା ଖବର)- ପୂର୍ବତନ ଆଇନମନ୍ତ୍ରୀ ନରସିଂହ ମିଶ୍ର ବଲାଙ୍ଗିର ସହରରେ ଥିବା ବଲାଙ୍ଗିର ସରକାରୀ ମହାବିଦ୍ୟାଳୟ ସମସ୍ୟା ବୁଝିବା ପାଇଁ କଲେଜ ଅଧ୍ୟକ୍ଷ, ଅଧ୍ୟାପକ କର୍ମଚାରୀ ଓ ଛାତ୍ରଛାତ୍ରୀଙ୍କ ସହ ଏକ ବାର୍ତ୍ତା ବିନିମୟ କରିଛନ୍ତି । ଶ୍ରୀ ମିଶ୍ର ନିଜେ ଆଇନମନ୍ତ୍ରୀ ଥିବା ବେଳେ ସେ ସମୟରେ କେବଳ ଏହି ଗୋଟିଏ କଲେଜକୁ ସରକାରୀ ମାନ୍ୟତା ପ୍ରଦାନ କରିଥିଲେ । ପରବର୍ତ୍ତୀ ସମୟରେ ଏହି କଲେଜ ପୁଇଁନ୍ତଲା ସୋନପୁର ରାସ୍ତାରେ ଏହାର ନିଜସ୍ୱ କୋଠା

ପାଇଥିଲା କିନ୍ତୁ ସରକାରୀ ଓ ପ୍ରଶାସନି ଅବହେଳା ଯୋଗୁଁ କଲେଜରେ ଛାତ୍ର ଛାତ୍ରୀ ସଂଖ୍ୟା ପୂର୍ଣ୍ଣମାତ୍ରାରେ ଥିଲେ ହେଁ ଅଧ୍ୟାପକ, ଅଣ ଶିକ୍ଷକ କର୍ମଚାରୀ ଓ ଭିତ୍ତିଭୂମି ଘୋର ଅଭାବ ଦେଖାଦେଇଛି । ଏହି କଲେଜର ଛାତ୍ର ମାନବଶାସ୍ତ୍ର ବିଭାଗରେ ରାଜେନ୍ଦ୍ର ବିଶ୍ୱ ବିଦ୍ୟାଳୟରେ ଟପର ହୋଇଥିଲେ ହେଁ କଲେଜ ରେ ଆଜି ପର୍ଯ୍ୟନ୍ତ ମାନବଶାସ୍ତ୍ର ବିଭାଗରେ ଅଧ୍ୟାପକ ନାହାନ୍ତି । ଏହା ନିଶ୍ଚିତ ଭାବେ ଆଶ୍ଚର୍ଯ୍ୟଜନକ ଘଟଣା ବୋଲି ଶ୍ରୀ ମିଶ୍ର କ୍ଷୋଭର ସହ ନିଜ ପ୍ରତିକ୍ରିୟାରେ କହିଛନ୍ତି । କଲେଜରେ କେବଳ ଏହି ଗୋଟିଏ ବିଭାଗ ନୁହେଁ ଇତିହାସ, ଲାଇବ୍ରେରୀ ବିଜ୍ଞାନ, ମନସ୍ତତ୍ୱ ବିଜ୍ଞାନ ଏବଂ ସୋସିଓଲୋଜି ବିଭାଗ ମଧ୍ୟ ଅଧ୍ୟାପକ ସୁନ୍ୟ ଭାବେ ଚାଲିଛି । ଅନ୍ୟ ବିଭାଗ ଗୁଡିକ ମଧ୍ୟ ମଞ୍ଜୁରିପ୍ରାପ୍ତ ପଦବୀ ତୁଳନାରେ ଅନେକ ପଦବୀ ଖାଲି ପଡିଥିବାର ଅଭିଯୋଗ ଛାତ୍ର ଛାତ୍ରୀମାନେ କରିଥିଲେ । କଲେଜରେ ଆଜି ପର୍ଯ୍ୟନ୍ତ କ୍ରୀଡା ଶିକ୍ଷକ ନାହାନ୍ତି । ଛାତ୍ର ଛାତ୍ରୀଙ୍କ ନିରାପତ୍ତା ପାଇଁ କଲେଜରେ ଚାରିଆଡେ ପାଚେରି ନାହିଁ । ସାଇକେଲ ଷ୍ଟାଣ୍ଡ ନାହିଁ । ନାହିଁ ନାହିଁ ରେ ଥିବା ଏହି କଲେଜ କୁ ସରକାର ର ଉଚ୍ଚ ଶିକ୍ଷା ବିଭାଗ କାହିଁକି ଗୁରୁତ୍ୱ ଦେଉନାହିଁ ସେ ସବୁର ଉତ୍ତର ମଗାଯିବ ବୋଲି ଶ୍ରୀ ମିଶ୍ର କହିଛନ୍ତି । ଛାତ୍ର ଛାତ୍ରୀଙ୍କ ସହ ଆଲୋଚନା ବେଳେ ଛାତ୍ର ଓ ଛାତ୍ରୀଙ୍କ କମନ ରୁମ ନ ଥିବା ଜଣାପଡିଥିଲା । ତା ସହ ଶିକ୍ଷକ

ଅଣଶିକ୍ଷକ କର୍ମଚାରୀଙ୍କ ପାଇଁ ଘର ଏବଂ କଲେଜର ଅନେକ ବିଭାଗରେ ନାମ ଲେଖା ହେଉଥିବାରୁ ଶ୍ରେଣୀ ଗୃହ ଦରକାର ବୋଲି କଲେଜ ତରଫରୁ ବିଭାଗିୟ ଅଧିକାରୀଙ୍କୁ ଜଣାଇଥିଲେ ମଧ୍ୟ ଏ ଦିଗରେ କୌଣସି ପଦକ୍ଷେପ ନିଆଯାଉ ନାହିଁ ବୋଲି ଛାତ୍ର ଛାତ୍ରୀ ତଥା ଅଧ୍ୟାପକମାନେ ଅଭିଯୋଗ କରିଥିଲେ । ସବୁ ସମସ୍ୟା ଶୁଣି ସାରିଲା ପରେ ଶ୍ରୀ ମିଶ୍ର ଯାହା ସବୁ ଅସୁବିଧା ଅଛି ସେ ସବୁ କୁ ନେଇ ଏକ ଚିଠି ପ୍ରଦାନ କରିବାକୁ କହିବା ସହ ପ୍ରାଥମିକତା ଭିତ୍ତିରେ ସମସ୍ୟା ଗୁଡିକର ସମାଧାନ ପାଇଁ ପଦକ୍ଷେପ ନେବେ ବୋଲି ପ୍ରତିଶୃତି ଦେଇଥିଲେ । ଏହି ଆଲୋଚନାରେ କଲେଜର ଅଧ୍ୟକ୍ଷ କୌତୁକ ପନ୍ଦର ଙ୍କ ସମେତ ଅନ୍ୟାନ୍ୟ ବିଭାଗର ଅଧ୍ୟାପକ, ଅଧ୍ୟାପିକା ଛାତ୍ର ଛାତ୍ରୀ ତଥା ଅଣ ଶିକ୍ଷକ କର୍ମଚାରୀ ସାମିଲ ଥିଲେ ।