07-Jul-2026

ତରଭା(ପ୍ରେରଣା ଖବର)-ସରକାର ଲୋକଙ୍କ ସୁରକ୍ଷା ପାଇଁ ନଦୀରେ ଆଡିବନ୍ଧ ନିର୍ମାଣ କରୁଛନ୍ତି । କିନ୍ତୁ ବିଭାଗୀୟଯନ୍ତ୍ରୀ ଓ ଠିକାଦାରଙ୍କ ମିଳିତ ମଧୁଚନ୍ଦ୍ରିକାରେ ନିମ୍ନମାନର କାମ କରୁଥିବା ଅଭିଯୋଗ ହେଉଛି । ସେଥିପାଇଁ ଗତ ଦୁଇବର୍ଷ ତଳେ ନିର୍ମାଣ ହୋଇଥିବା ନଦୀଆଡିବନ୍ଧ ସାମାନ୍ୟ ବର୍ଷାରେ ଭୁଷୁଡିପଡିଛି । ଏଭଳି ଘଟଣା ଦେଖିବାକୁ ମିଳିଛି ତରଭା ବ୍ଲକର ମେଣ୍ଡାଗ୍ରାମରେ । ସୁକତେଲ ନଦୀରେ ଗତ ୨୦୨୩-୨୪ ମସିହାରେ ମାଟିଆଡିବନ୍ଧ ନୁର୍ମାଣ ହୋଇଥିଲା । ୫୦ଲକ୍ଷ ଟଙ୍କା ବ୍ୟୟରେ ମେଣ୍ଡାର ସୁକତେଲନଦୀରେ ଆଡିବନ୍ଧ ନିର୍ମାଣ ହୋଇଥିଲା । ସେଥିବେଳେ ନଦୀ ପାଖର ବାଲିଆମାଟିରେ ଠିକଦାର ଆଡିବନ୍ଧ ନିର୍ମାଣ କରାଇଥିଲା । ଆବଶ୍ୟକ ରୋଲିଂ ମଧ୍ୟ କରିନଥିଲା । ସୋନପୁର ତେଲବେସିନ ଡିଭିଜନ ପକ୍ଷରୁ ନିର୍ମିତ ଏହି ଆଡିବନ୍ଧ ସଂପୂର୍ଣ୍ଣ ନିମ୍ନମାନର ହୋଇଥିବା କାରଣରୁ ଏବେ ସାମାନ୍ୟ ବନ୍ୟାପାଣିରେ ଆଡିବନ୍ଧ ଭାଙ୍ଗିଦେଇଛି । ଆଡିବନ୍ଧ ଭାଙ୍ଗିଯିବାରୁ ନଦୀକୂଳର ଜମିକୁ ପାଣି ମାଡି ଆସିଛି । ଫଳରେ ଚାଷଜମି ନଷ୍ଟ ହୋଇଛି । ବାରପାହାଡ ଜଙ୍ଗଲରୁ ନାଳଦେଇ ପାଣି ଆସି ସୁକତେଲ ନଦୀରେ ଏଠାରେ ମିଶିଥାଏ । ମେଣ୍ଡାର ମେହେରପଡା,ଗଡଭିତରର ଲୋକେ ଏହି ଆଡିବନ୍ଧଦେଇ ନଦୀକୁ ଯାଇଥାନ୍ତି । ତେଣୁ ଏଠାରେ ଏକ ବଡପୋଲ ନିର୍ମାଣ କରିବାକୁ ଗ୍ରାମବାସୀ ଦାବି କରୁଥିଲେ । କନିଷ୍ଠଯନ୍ତ୍ରୀ ଓ ଏସଡିଓଙ୍କ ଏନେଇ ଗ୍ରାମବାସୀ ଅନୁରୋଧ କରିଥିଲେ । କିନ୍ତୁ ଜଳସେଚନ ବିଭାଗ ଲୋକଙ୍କ ଦାବିକୁ ଅଣଦେଖା କରିଥିଲା ବୋଲି ଅଶୋକ ଫରିକାରଙ୍କ ସମେତ ଗ୍ରାମବାସୀ ଅଭିଯୋଗ କରିଛନ୍ତି । ଜଳସେଚନ ବିଭାଗ ତୁରନ୍ତ ଏହାର ତଦନ୍ତ କରି ପଦକ୍ଷେପ ନେବାକୁ ଦାବି ହେଉଛି ।