06-Feb-2021

ଝାରସୁଗୁଡା (ପ୍ରେରଣା ଖବର) : କୃଷକ ସଂଗଠନର ଡାକରାରେ ସାରା ଭାରତରେ ୩ ଘଣ୍ଟିଆ ଚକା ଜାମର ପ୍ରଭାବ ଝାରସୁଗୁଡା ଜିଲ୍ଲାରେ ଦେଖିବାକୁ ମିଳିଥିଲା । କେନ୍ଦ୍ର ସରକାର ଆଣିଥିବା ୩ଟି ନୂତନ କୃଷି ବିଲ୍ କୁ କଳା ଆଇନ ଭାବେ ଦର୍ଶାଇ କୃଷକ ସଂଗଠନ ପକ୍ଷରୁ ଝାରସୁଗୁଡା-ବେଲପାହଡ ୪୯ ନମ୍ବର ଜାତୀୟ ରାଜପଥର ପ୍ରସନ୍ନ ପଣ୍ଡା ଛକ ସହ କୋଲାବିରାର ବଡବାହାଲ ଛକ ଓ ଛତିଶଗଡ ସୀମାନ୍ତବର୍ତ୍ତୀ କନକତୋରାରେ ୩ ଘଣ୍ଟିଆ ଚକା ଜାମ କରିଥିଲେ ।

ଚକା ଜାମ୍ ଦ୍ବାରା ୪୯ ନମ୍ବର ଜାତୀୟ ରାଜପଥରେ ଯାନବାହାନ ଚଳାଚଳରେ ବାଧା ସୃଷ୍ଟି ହୋଇଥିଲା । ଆଇନଶୃଙ୍ଖଳା ପରିସ୍ଥିତି ସୃଷ୍ଟି ଓ ଟ୍ରାଫିକ ନିୟନ୍ତ୍ରଣ ପାଇଁ ବିଭିନ୍ନ ଛକ ସ୍ଥାନ ମାନଙ୍କରେ ପୋଲିସ ଫୋର୍ସ ମୁତୟନ କରାଯାଇଥିଲା। ଆଜିର ଏହି ଚକା ଜାମ୍ ଆନ୍ଦୋଳନରେ କୃଷକ ସଂଗଠନ ସହ କଂଗ୍ରେସ, କମ୍ୟୁନିଷ୍ଟ ପାର୍ଟି ସହ ପ୍ରଗତିଶୀଳ ଶ୍ରମିକ ମଞ୍ଚ ଓ ଅନ୍ୟ ଗଣ ସଂଗଠନର କର୍ମକର୍ତ୍ତା ସାମିଲ ହୋଇ କେନ୍ଦ୍ର ସରକାର ତୁରନ୍ତ କୃଷକ ବିରୋଧୀ ଆଇନକୁ ଫେରାଇ ନେବାକୁ ଦାବି କରିଥିଲେ ।