15-Apr-2026

ସିନାପାଲି,( ଚିନ୍ତାମଣୀ ନେତାମ ) 
ମହାନ ସମାଜ ସୁଧାରକ ରାଷ୍ଟ୍ରପିତା ମହାତ୍ମା ଜ୍ୟୋତିରାଓ ଫୁଲେ ଓ ସମାଜ ନ୍ୟାୟର ପ୍ରତୀକ ବିଶ୍ୱରତ୍ନ ଡାଃ ବି.ଆର୍. ଆମ୍ବେଦକରଙ୍କ ଯୁଗ୍ମ ଜୟନ୍ତୀ ଅବସରରେ ସିନାପାଲିରେ ଏକ ଭବ୍ୟ, ଭାବପୂର୍ଣ୍ଣ ଓ ପ୍ରେରଣାଦାୟକ କାର୍ୟକ୍ରମ ଆୟୋଜିତ ହୋଇଯାଇଛି। ମୂଳନିବାସୀ ଏକତା ମଞ୍ଚ, ସିନାପାଲି ପକ୍ଷରୁ ଆୟୋଜିତ ଏହି ଅବସର ସମ୍ମାନ, ସଚେତନତା ଓ ସାମାଜିକ ଏକତାର ଏକ ଅନନ୍ୟ ମିଶ୍ରଣ ରୂପେ ପରିଣତ ହୋଇଥିଲା।
କାର୍ୟକ୍ରମରେ ଶ୍ରୀଯୁକ୍ତ ଖୁଟୁ ରାମ ସୁନାନୀ ଅଧ୍ୟକ୍ଷତା କରିଥିଲେ। ତାଙ୍କର ଉଦବୋଧନ ରେ ସେ ସମାଜରେ ଶିକ୍ଷା, ଏକତା ଓ ସଚେତନତାର ଗୁରୁତ୍ୱକୁ ଉଜାଗର କରିଥିଲେ। ମୁଖ୍ୟ ଅତିଥି ଭାବରେ ଯୋଗଦେଇଥିବା ଅବସରପ୍ରାପ୍ତ ରେଞ୍ଜର ଶ୍ରୀଯୁକ୍ତ ସଡାନନ୍ଦ ସୁନାନୀ ତାଙ୍କର ଭାଷଣରେ ମହାନ ବ୍ୟକ୍ତିତ୍ୱମାନଙ୍କ ଆଦର୍ଶକୁ ଅନୁସରଣ କରି ସମାଜକୁ ଆଗକୁ ନେବା ପାଇଁ ଯୁବ ପିଢିକୁ ପ୍ରେରଣା ଦେଇଥିଲେ। ମୁଖ୍ୟ ବକ୍ତା ଶ୍ରୀଯୁକ୍ତ ସୋମନାଥ ଖମାରୀ ସମାଜର ଅବହେଳିତ ଓ ପଛୁଆ ବର୍ଗଙ୍କ ଅଧିକାର, ସମାନତା ଓ ସଶକ୍ତିକରଣ ଉପରେ ଗଭୀର ଆଲୋଚନା କରିଥିଲେ।
ସମ୍ମାନିତ ଅତିଥି ଭାବେ ଶ୍ରୀଯୁକ୍ତ ମହେନ୍ଦ୍ର ସୁନାନୀ, ଭରତ ବାଗ, ମନ୍ଦାକିନୀ ବଘେଲ, ସନ୍ତୋଷ ନାୟକ ସହ ଝାରବନ୍ଧ ଓ ଘାଟମାଳ ସରପଞ୍ଚମାନେ, ମେଘନାଦ ଖରସେଲ ଓ ଗୋଦାବରୀଶ ନାୟକ ଯୋଗଦେଇ କାର୍ୟକ୍ରମକୁ ଗରିମାମୟ କରିଥିଲେ।
କାର୍ୟକ୍ରମର ଆରମ୍ଭରେ  ପ୍ରଧାନ ଶିକ୍ଷକ ଶ୍ରୀଯୁକ୍ତ ବିରାଲସେନ ନାଗେଶ  ସମସ୍ତ ଅତିଥି ଓ ଉପସ୍ଥିତ ଜନସାଧାରଣଙ୍କୁ ଆତ୍ମୀୟ ସ୍ୱାଗତ ଜଣାଇଥିଲେ। ଶ୍ରୀଯୁକ୍ତ ଶୋଭା ରାମ ମହାନନ୍ଦ ସୁଚାରୁ ଓ ସୁନ୍ଦର ପରିଚାଳନା  କରିଥିଲେ l 
ଏହି ପବିତ୍ର ଅବସରରେ ସମାଜ ପାଇଁ ନିରନ୍ତର ଅବଦାନ ରଖିଥିବା ଶ୍ରୀଯୁକ୍ତ ହୃଦାନନ୍ଦ ମେହେର, ଶ୍ରୀଯୁକ୍ତ ମନୋଜ ମହାନନ୍ଦ ଓ ପ୍ରଧାନ ଶିକ୍ଷକ ଶ୍ରୀଯୁକ୍ତ ପବିତ୍ର ଦୁରିଆଙ୍କୁ ଫୁଲମାଳା, ଉତ୍ତରୀୟ ଓ ସମ୍ମାନପତ୍ର ପ୍ରଦାନ କରି ଗରିମାମୟ ଭାବରେ ସମ୍ବର୍ଦ୍ଧିତ କରାଯାଇଥିଲା। ସେହି ମୁହୂର୍ତ୍ତରେ ଉପସ୍ଥିତ ସମସ୍ତଙ୍କ ମନରେ ଗର୍ବ ଓ ଭାବବିହ୍ୱଳତାର ଭାବ ପ୍ରକାଶ ପାଇଥିଲା।
ସମଗ୍ର କାର୍ୟକ୍ରମଟି ମୂଳନିବାସୀ ଏକତା ମଞ୍ଚ, ସିନାପାଲି ପକ୍ଷରୁ ସୁସଂଗଠିତ ଭାବରେ ସଫଳତାର ସହିତ ଆୟୋଜିତ ହୋଇଥିଲା।