13-Feb-2026

ବଲାଙ୍ଗିର(ପ୍ରେରଣା ଖବର): ବଲାଙ୍ଗୀର ଜିଲ୍ଲାରେ ପ୍ରତିବର୍ଷ ଶହଶହ ହେକ୍ଟର ଜଙ୍ଗଲ ବନାଗ୍ନୀରେ କ୍ଷତିଗ୍ରସ୍ତ ହେଉଛି। ହଜାର ହଜାର ଜୀବଜନ୍ତୁ ମଧ୍ୟ ମୃତ୍ୟୁବରଣ କରୁଛନ୍ତି। ତେଣୁ ବନାଗ୍ନୀକୁ ପ୍ରତିରୋଧ କରିବାକୁ ଚଳିତବର୍ଷ ବନବିଭାଗ ବ୍ୟାପକ ବ୍ୟବସ୍ଥା କରିଥିବା ଆଜି ଡିଏଫଓଙ୍କ କାର୍ଯ୍ୟାଳୟର ସଭାକକ୍ଷରେ ବନବିଭାଗ ପକ୍ଷରୁ ଆୟୋଜିତ ଏକ ସାମ୍ବାଦିକ ସମ୍ବିଳନୀରେ ସୂଚନା ଦିଆଯାଇଛି। ବନାଗ୍ନୀ ପ୍ରତିରୋଧ ପାଇଁ ପ୍ରତେକ ରେଞ୍ଜରେ ଏକ ଗାଡି, ନିର୍ବାପନଯନ୍ତ୍ର ସହିତ ୧୦ ଜଣିଆ ଟିମ୍ ସବୁବେଳେ ସଜାଗ 

ରହିବେ। ଏହା ସହିତ ପ୍ରତ୍ୟେକ ରେଞ୍ଜରେ ଏକ ୨୪ ଘଣ୍ଟିଆ କମସେଣ୍ଟର ମଧ୍ୟ ରହିବ ଓ ଲୋକଙ୍କଠାରୁ ଅଭିଯୋଗ ନିଆଯିବ । ପ୍ରତିବର୍ଷ ଭଳି ଗତ ୨୦୨୧ ମସିହାରୁ ୨୦୨୫ ମସିହା ପର୍ଯ୍ୟନ୍ତ କରାଯାଇଥିବା ବନୀକରଣ ସ୍ଥଳି ଚାରିକଡେ ଫାୟାରଲାଇନ କଟାଯାଇଛି। ବିଭିନ୍ନ ରିଜର୍ଭ,ଗ୍ରାମ୍ୟଜଙ୍ଗଲରେ ମଧ୍ୟ ବନାଗ୍ନୀରୁ ରକ୍ଷାପାଇଁ ଫାୟାରଲାଇନ କଟାଯାଇଥିବା ସାମ୍ବାଦିକ ସମ୍ବିଳନୀରେ ସୂଚନା ଦିଆଯାଇଛି।

ଏହା ସହିତ ବନବିଭାଗ ଓ କେନ୍ଦୁପତ୍ର ବିଭାଗ ମଧ୍ୟରେ ଆଲୋଚନା କରାଯାଇ ଯେଭଳି ଗୁଚ୍ଛାକଟା ସମୟରେ କେହି ନିଆଁ ନଲଗାଇବେ ସେଥିପାଇଁ ଯତ୍ନବାନ ହେବାକୁ କୁହା ଯାଇଛି। ଜନସାଧାରଣ ସଚେତନ ରହି ବନସମ୍ପଦକୁ ସୁରକ୍ଷା କରିବାକୁ ବନବିଭାଗ ସହିତ ସହ ଯୋଗ କରିବାକୁ ବଲାଙ୍ଗୀର ବନଖଣ୍ଡ ଅଧିକାରୀ ଅଜିତ ବିଶି ଗଣମାଧ୍ୟମ ଜରିଆରେ ଅନୁରୋଧ ଜଣାଇଛନ୍ତି। ଆଜିର ଏହି ସାମ୍ବାଦିକ ସମ୍ବିଳନୀରେ ଡିଏଫଓ ଶ୍ରୀ ବିଶିଙ୍କ ସହିତ ଏସିଏଫ ମାନସରଂଜନ ବେହେରା, ମୁରାରୀପ୍ରସାଦ ପଣ୍ଡା, ବଲାଙ୍ଗୀର ରେଞ୍ଜ ଅଫିସର ନବୀନ କୁମାର ପଣ୍ଡା ଉପସ୍ଥିତ ଥିଲେ ।