01-Feb-2021

ଟରୋଣ୍ଟୋ (କାନାଡ଼ା):କମ୍ପ୍ୟୁଟର ଓ ମୋବାଇଲ୍ ରେ ଓଡିଆ ଲିପି ରେ ଟାଇପ୍ କରିବାରେ ଥିବା ବିଭିନ୍ନ ସମସ୍ୟା ତଥା ଆମ ଲିପିର ସୌନ୍ଦର୍ଯୀକରଣ ସମ୍ପର୍କରେ ଚର୍ଚ୍ଚା ପାଇଁ ଏକ ଆନ୍ତର୍ଜାତିକ ଓ୍ବେବିନାର୍ ରବିବାର ଦିନ ଅନୁଷ୍ଠିତ ହୋଇଯାଇଛି। କାର୍ଯ୍ୟକ୍ରମଟି 'ଆମେ ଓଡିଆ - ଆମ ଓଡିଶା' ଅନୁଷ୍ଠାନ ତରଫରୁ ଆୟୋଜିତ ହୋଇଥିଲା ଏବଂ ଓଡ଼ିଆ ଲିପିର ବିଶିଷ୍ଟ ଆର୍କିଟେକ୍ଟ୍ ତଥା ଏଥିରେ ପୁନାସ୍ଥିତ ସି-ଡାକ୍ ସଂସ୍ଥାର ଯୁଗ୍ମ ନିର୍ଦ୍ଦେଶକ ଶ୍ରୀ ସୁଧିର କୁମାର ପଟେଲ ଓଡିଆ ଲିପିର ବିଭିନ୍ନ ବ୍ଯାବହାରିକ ଦିଗର ବିସ୍ତୃତ ଚର୍ଚ୍ଚା କରିଥିଲେ। କାନାଡ଼ା ଦେଶର ଟରୋଣ୍ଟୋରେ ଅବସ୍ଥାନ କରୁଥିବା ବିଶିଷ୍ଟ ଭାଷାପ୍ରେମୀ ଓ ସାହିତ୍ଯିକ ପ୍ରଶାନ୍ତ ଭୂୟାଁ (ପ୍ରଭୂ) କାର୍ଯ୍ଯକ୍ରମଟିର ସୁଚାରୁ ପରିଚାଳନା କରିଥିଲେ।

ମୁଖ୍ୟବକ୍ତା ସୁଧିର କୁମାର ପଟେଲ୍ କହିଥିଲେ ଯେ ଆମ ପାରଂପରିକ ଓଡ଼ିଆ ଲିପିକୁ ଆଜିକାଲି କେତେକ ସ୍ଥଳରେ ବିକୃତ ରୂପରେ ପ୍ରକାଶ କରାଯାଉଛି, ଯାହାକି ଉଦ୍ବେଗର ବିଷୟ। ସେ ସ୍ଲାଇଡ଼୍ ମାଧ୍ୟମରେ  ଓଡ଼ିଶାର ବିଭିନ୍ନ ସମ୍ବାଦପତ୍ର, ଟେଲିଭିଜନ ଚ୍ୟାନେଲ୍ ଓ ହୋର୍ଡିଂ ଇତ୍ୟାଦିରେ ବ୍ୟବହୃତ ହେଉଥିବା ଲିପିର ଉଦାହରଣ ପ୍ରସ୍ତୁତ କରିଥିଲେ ଏବଂ ଦର୍ଶାଇଥିଲେ ଯେ ଏଥିରେ ବ୍ୟାପକ ସୁଧାରର ଅବକାଶ ରହିଛି। ୟୁନିକୋଡ଼୍ ଓଡ଼ିଆ ଲିପି, ନୂତନ ଶୈଳୀର ଲିପିର ଉପଲବ୍ଧତା ତଥା ଅନଧିକୃତ ଲିପିର ବ୍ୟବହାରରେ ଥିବା ଆଇନଗତ ବିପଦ ସଂପର୍କରେ ପ୍ରତିଭାଗୀମାନଙ୍କ ବିଭିନ୍ନ ପ୍ରଶ୍ନର ଉତ୍ତର ଦେଇଥିଲେ।
ଆମେରିକାରୁ ଧୀରେନ୍ଦ୍ର କର ନିଜର ବକ୍ତବ୍ୟରେ ମତ ରଖିଥିଲେ ଯେ ଓଡ଼ିଆ ଲିପିର ବ୍ୟାବସାୟିକ ଉପଯୋଗକାରୀମାନେ ଏହାର ଆଇନସଙ୍ଗତ ବ୍ଯବହାର ପାଇଁ ଆବଶ୍ୟକସ୍ଥଳେ ଅର୍ଥ ବ୍ୟୟ କରିବା ମଧ୍ଯ ପାଇଁ ପଛଘୁଞ୍ଚା ଦେବା ଉଚିତ ନୁହେଁ। କାର୍ଯ୍ୟକ୍ରମଟିର ସଫଳତା ପାଇଁ ସେ ସମସ୍ତଙ୍କୁ କୃତଜ୍ଞତା ଅର୍ପଣ କରିଥିଲେ। କାର୍ଯ୍ୟକ୍ରମର ଆରମ୍ଭରେ ନିହାର ଶତପଥୀ ସମସ୍ତ ଅତିଥିଙ୍କୁ ସ୍ବାଗତ କରିଥିଲେ।
ଦୈନିକ 'ସକାଳ'ର ସମ୍ପାଦକ ଡ଼. ଉମାଶଙ୍କର ମିଶ୍ର ନିଜର ବକ୍ତବ୍ୟରେ କହିଲେ ଯେ ଏହି ଓ୍ବେବିନାର ଓଡ଼ିଆ ଲିପିର କେତେକ ଗୁରୁତ୍ବପୂର୍ଣ ଦିଗ ଉପରେ ଯଥାଯଥ ଭାବେ ଆଲୋକପାତ କରିଛି ଏବଂ ଏହି ପ୍ରସଙ୍ଗଟିକୁ ଆହୁରି ଆଗକୁ ନେବାର ସମୟ ଆସିଛି। ସମ୍ବାଦ ପରିବାର ପକ୍ଷରୁ ଯୋଗଦେଇ ଡ଼. ଗୌରହରି ଦାସ ମତ ଦେଇଥିଲେ ଯେ ଲିପିର ସୁନ୍ଦରତା ବ୍ୟକ୍ତି ସାପେକ୍ଷ। ସେ କହିଥିଲେ ଯେ ନୂତନ ଭାବରେ ଗଢାହେଉଥିବା ଓଡ଼ିଆ ଲିପିଗୁଡ଼ିକ ସର୍ବସାଧାରଣଙ୍କ ବ୍ୟବହାର ପାଇଁ ବଜାରକୁ ଛଡାଯିବା ପୂର୍ବରୁ ଏକ ଅଧିକୃତ କର୍ତ୍ତୃପକ୍ଷଙ୍କ ଦ୍ବାରା ଅନୁମୋଦିତ ହେବାପାଇଁ ଆସିଥିବା ପ୍ରସ୍ତାବ ବିଚାରଯୋଗ୍ୟ। 
କାର୍ଯ୍ୟକ୍ରମଟିରେ ଯେଉଁ ଅନ୍ୟ ବକ୍ତାମାନେ ନିଜର ଅଭିମତ ରଖିଥିଲେ ସେମାନଙ୍କ ମଧ୍ୟରେ ଥିଲେ ମନୋଜ କୁମାର ମହାପାତ୍ର (ଗ୍ରନ୍ଥ ମନ୍ଦିର), ବିଜୟ ମିଶ୍ର (ହାର୍ଭାର୍ଡ, ଆମେରିକା), ଲାଲୁ ମାନସିଂହ (କାନାଡ଼ା), ସୁନନ୍ଦା ମିଶ୍ର ପଣ୍ଡା  (ଟରୋଣ୍ଟୋ), ଡଃ ତନ୍ମୟ ପଣ୍ଡା  (ଟରୋଣ୍ଟୋ), ଗଗନ ବିହାରୀ ପାଣିଗ୍ରାହୀ (ଟରୋଣ୍ଟୋ), କୁକୁ ଦାସ ('ଓସା' ସଭାପତି), ଦୁର୍ଗା ପ୍ରସାଦ ଦାସ  (ବାଙ୍ଗୋଲୋର୍‌) ଓ ଦେବେନ୍ଦ୍ର ନାଥ ରାଉତ (ନୂଆଦିଲ୍ଲୀ)।