03-Nov-2025

ସୁବର୍ଣ୍ଣପୁର(ମନୋରଞ୍ଜନ ତ୍ରିପାଠୀ): ଓପନ୍ ହାର୍ଟ ସର୍ଜରୀ ପରେ ଦୀର୍ଘ ୫ଦିନ ଧରି କଟକ ବଡ଼ ଡ଼ାକ୍ତରଖାନାର ଭେଣ୍ଟି ଲେଟରରେ ଚିକିତ୍ସିତ ଥିବା ସୋନପୁରର ୧୫ ବର୍ଷର ବାଳକ ହର୍ଷବର୍ଦ୍ଧନ ଆଜି ଜେନେରାଲ ୱାର୍ଡକୁ ଫେରିଛି l ତା'ର ସୁସ୍ଥତା ଯୋଗୁଁ ପରିବାର ଲୋକେ କିଛିଟା ଆଶ୍ୱସ୍ତି ଅନୁଭବ କରିଛନ୍ତି l ମାଁ ସୁରେଶ୍ଵରୀ, ପ୍ରଭୁ ନରସିଂହ ବାବା ଓ ସୋନପୁରର ସବୁ ଦେବା ଦେବୀଙ୍କ ଆଶୀର୍ବାଦରୁ ସୁବର୍ଣ୍ଣପୁର ଜିଲ୍ଲା ପ୍ରଶାସନ, ପୋଲିସ୍ ପ୍ରଶାସନ,  କଟକ ଏସ୍ ସି ବି ର କାର୍ଡିଓଲୋଜି ବିଭାଗ ମୁଖ୍ୟ ଡାକ୍ତର ମନୋଜ ପଟ୍ଟନାୟକଙ୍କ ନେତୃତ୍ବରେ ଏକ ଆଠ ଜଣିଆ ଡାକ୍ତରୀ ଦଳଙ୍କ ପ୍ରଚେଷ୍ଟା ତଥା ସୋନପୁର ମାଟିରେ ଜନ୍ମଗ୍ରହଣ କରିଥିବା କଟକର ଜଣେ ସୁନାମଧନ୍ୟ ବରିଷ୍ଠ ଡାକ୍ତରଙ୍କ ପ୍ରଚେଷ୍ଟାରେ ଗତ ୨୯ ତାରିଖ ବୁଧବାର ଦିନ ହର୍ଷବର୍ଦ୍ଧନଙ୍କ ହାର୍ଟ ର ମେଜର ସର୍ଜରୀ ସଫଳ ହୋଇଥିଲା l ପୂର୍ବରୁ  ବିଭିନ୍ନ ଘରୋଇ ମେଡିକାଲ୍ ରେ ଚିକିତ୍ସା ଆରଂଭ କରାଇ ଅପରେସନ ପାଇଁ ୧୦ ଲକ୍ଷରୁ ଉର୍ଦ୍ଧ୍ବ ଟଙ୍କା ଖର୍ଚ୍ଚ ହେବ ବୋଲି ଜାଣିବା ପରେ ନିରୀହ ହର୍ଷବର୍ଦ୍ଧନଙ୍କ ପରିବାର ଲୋକେ ନିରାଶ ହୋଇ ଘରକୁ ଫେରି ଆସିଥିଲେ l ଓଡ଼ିଶା ସାମ୍ୱାଦିକ ସଂଘ ସୁବର୍ଣ୍ଣପୁର ଜିଲ୍ଲା ଶାଖାର କର୍ମକର୍ତ୍ତାଙ୍କ ଠାରୁ ଏ ଖବର ପାଇ ସୁବର୍ଣ୍ଣପୁର ଜିଲ୍ଲାପାଳ ଡ଼. ନୃପରାଜ ସାହୁ, ଏସପି ନାରାୟଣ ନାଏକ ଓ କଟକ ର ଜଣେ ବରିଷ୍ଠ  ଡାକ୍ତର , ସାମ୍ୱାଦିକଙ୍କ ସହ ହର୍ଷବର୍ଦ୍ଧନଙ୍କ ସୋନପୁର ବାସଭବନକୁ ପହଞ୍ଚି ସ୍ବାସ୍ଥ୍ୟ ଅବସ୍ଥା ଦେଖି କଟକ ବଡ଼ ଡ଼ାକ୍ତରଖାନାର ଡାକ୍ତରୀ ଦଳ ସହ ଅପରେସନ ପାଇଁ ଅନେକ ଥର ଯୋଗା ଯୋଗ ରଖି ଆସିଥିଲେ l

ଶେଷରେ ହାର୍ଟ ଅପରେସନ ପାଇଁ କଟକ ମେଡିକାଲ୍ କୁ ପଠାଇବାକୁ ଜିଲ୍ଲାପାଳଙ୍କ ଉପସ୍ଥିତିରେ ସମସ୍ତ ବ୍ୟବସ୍ଥା କରାଗଲା l ଅପରେସନ ଥିଏଟରକୁ ଯିବା ଆଗରୁ ହର୍ଷବର୍ଦ୍ଧନ ଙ୍କୁ ମାଁ ସୁରେଶ୍ଵରୀ, ପ୍ରଭୁ ନରସିଂହ ବାବା ଓ ମାଁ କଟକ ଚଣ୍ଡୀ ଙ୍କ ଆଶିର୍ବାଦ କାମନା କରାଯାଇ ଥିଲା ଓ ଜିଲ୍ଲାପାଳ ମଧ୍ଯ ହର୍ଷ ବର୍ଦ୍ଧନ ଙ୍କୁ ଭିଡ଼ିଓ କଲ୍ ଜରିଆରେ ତା'ର ଶୁଭମନାସି ଅସ୍ତ୍ରୋପଚାର ର ସଫଳତା କାମନା କରି ଥିଲେ l ୨୯ ତାରିଖ ଅପରେସନ ବେଳେ ଓଡ଼ିଶା ସାମ୍ୱାଦିକ ସଂଘର ରାଜ୍ୟ ସଭାପତି ଶଶି ଭୂଷଣ ପ୍ରହରାଜ, ଉପସଭାପତି ରମଣୀ ରଂଜନ ଦାସ, ସଂପାଦକ  ଦୁର୍ଯ୍ୟୋଧନ ମହାରଣା ,ମାନସ ଓଝା ପ୍ରମୁଖ ଉଚ୍ଚ ସ୍ତରୀୟ ପ୍ରତିନିଧି ଦଳ ସମେତ ସୁବର୍ଣ୍ଣପୁର ଜିଲ୍ଲା ଶାଖା କର୍ମକର୍ତ୍ତା ପୁରା ସମୟ ଉପସ୍ଥିତ ରହି ଦାୟିତ୍ଵରେ ଥିବା ଡାକ୍ତରୀ ଦଳ ସହ ସାକ୍ଷାତ ଓ ଆଲୋଚନା କରିଥିଲେ l ମାଁ ସୁରେଶ୍ଵରୀ ଏ ଡ଼ାକ୍ତରୀ ଟିମ୍ ଙ୍କୁ ଶକ୍ତି ଓ ଆଶୀର୍ବାଦ ପ୍ରଦାନ କରନ୍ତୁ ଯେ, ଚିକିତ୍ସା ବିଜ୍ଞାନ କ୍ଷେତ୍ରରେ ସେମାନେ ଜଣେ ଜଣେ  ଧ୍ରୁବତାରା ଭଳି ଆଦର୍ଶ ହୋଇ ରୋଗୀ ସେବାରେ ସଫଳ ହୁଅନ୍ତୁ ଓ ଯଶ ଲାଭ କରନ୍ତୁ l  ଓ ଜିଲ୍ଲା ପ୍ରଶାସନ, ଡାକ୍ତରୀ ଦଳ ର ଉଦ୍ୟମ ଯୋଗୁଁ ଓ ହର୍ଷବର୍ଦ୍ଧନଙ୍କ ଆଶୁ ଆରୋଗ୍ୟ କାମନା କରି ସାମୁହିକ ମହା ମୃତ୍ୟୁଞ୍ଜୟ ମନ୍ତ୍ରପଠନ ଓ ପ୍ରାର୍ଥନା କରିଥିବା ସୋନପୁର ସହରର ସମସ୍ତ ସ୍ବେଛାସେବୀ ଓ ଶିକ୍ଷା ଅନୁଷ୍ଠାନ ଓ ବ୍ୟକ୍ତି ବିଶେଷଙ୍କ ଠାରେ ଓଡ଼ିଶା ସାମ୍ୱାଦିକ ସଂଘ ସୁବର୍ଣ୍ଣପୁର ଜିଲ୍ଲା ଶାଖା ଚିରଦିନ କୃତଜ୍ଞ ରହିବ l ମାଁ ସୁରେଶ୍ଵରୀ ଆଶୀର୍ବାଦ କରନ୍ତୁ ହର୍ଷବର୍ଦ୍ଧନ ସଂପୂର୍ଣ୍ଣ ସୁସ୍ଥ ହୋଇ ନିଜ ଘରକୁ ଫେରନ୍ତୁ ଓ ନିଜେ ହସି ସମସ୍ତ ଶୁଭେଛୁଙ୍କ ମୁହଁରେ ହସ ଫୁଟାନ୍ତୁ ବୋଲି ସମସ୍ତ ଶୁଭେଛୁ ଆଶା ବାନ୍ଧିଛନ୍ତି l