25-Aug-2025

ଡୁଙ୍ଗୁରିପାଲି (ଅରବିନ୍ଦ ମିଶ୍ର): ଦିନେ ଅଣ ଓସାରିଆ ମାଟି ମୋରମ ରାସ୍ତା ଆଜି ୪ ଥାକିଆ ଜାତୀୟ ରାଜପଥ । କଳେବର ଯେତେ ବୃଦ୍ଧି ପାଉଛି, ସେତିକି ଦୁର୍ଘଟଣା ମଧ୍ୟ ବଢ଼ିବାରେ ଲାଗିଛି । ଦ୍ରୁତଗତି, ଅନଭିଜ୍ଞ ନାବାଳକ, ସଚେତନତାର ଅଭାବ ଓ ନିଶାଗ୍ରସ୍ତ ଚାଳକଙ୍କ ଯୋଗୁଁ ଦୁର୍ଘଟଣା ଘଟୁଛି । ସବୁଠାରୁ ଭୟଙ୍କର ନିଶାସକ୍ତଙ୍କ ଗାଡ଼ି ଚାଳନା। ଏକ ତଥ୍ୟ ଅନୁସାରେ, ବୃଦ୍ଧି ପାଉଥିବା ଦୁର୍ଘଟଣା ପଛରେ ନିଶାସକ୍ତଙ୍କ ଦ୍ରୁତ ଗାଡ଼ିଚାଳନାକୁ ଦାୟୀ କରାଯାଉଛି । ଅନାୟସରେ ବିଭିନ୍ନ ପ୍ରକାର ନିଶା ଲୋକେ ସହଜରେ ପାଉଥିବାରୁ ଏହା ସେବନ କରୁଛନ୍ତି । ଏଥିପାଇଁ ସମୟର ଧାରାବନ୍ଧା କି ନିୟମ ନାହିଁ । ନାବାଳକଠାରୁ ଆରମ୍ଭ କରି ବୟସ୍କ, ଅଧିକାଂଶ ଏହାକୁ ଆପଣେଇ ନେଉଛନ୍ତି । ଏମାନଙ୍କ ଗାଡ଼ି ଚାଳନା ଯୋଗୁଁ ନିଜେ ତ ଦୁର୍ଘଟଣାର ଶୀକାର ହେଉଛନ୍ତି ଅପରପକ୍ଷରେ ନିରୀହ ଲୋକେ ମଧ୍ୟ ପ୍ରାଣ ହରାଉଛନ୍ତି । ଗତ ୧୦ ଦିନ ମଧ୍ୟରେ ଡୁଙ୍ଗୁରିପାଲି ଅଞ୍ଚଳରେ ପୃଥକ ପୃଥକ ୩ଟି ଦୁର୍ଘଟଣାରେ ୩ଜଣଙ୍କ ମୃତ୍ୟୁ ହୋଇଥିବା ବେଳେ ୪ଜଣ ଗୁରୁତର ହୋଇ ବର୍ତ୍ତମାନ ଚିକିତ୍ସିତ ହେଉଛନ୍ତି । ଗତ ୩୧ ତାରିଖରେ ଡୁଙ୍ଗୁରିପାଲିର କଂଗ୍ରେସ କର୍ମୀ ସନ୍ତୋଷ ଭୋଇ (୮୧) ନିଜ ଚାଷ ଜମିରୁ ଘରକୁ ଫେରୁଥିବା ବେଳେ ରାମପୁର ରାସ୍ତାରେ ଏକ ବାଇକ୍ ଚାଳକ ତାଙ୍କୁ ଧକ୍କା ଦେଇଥିଲା । ସେଥିରେ ସନ୍ତୋଷ ଭୋଇଙ୍କ ମୃତ୍ୟୁ ହୋଇଥିବା ବେଳେ ବାଇକ୍ ଚାଳକ ଗୁରୁତର ହୋଇ ଚିକିତ୍ସାଧନ ରହିଛନ୍ତି । ଅନ୍ୟ ଏକ ଘଟଣା ଗତ ୫ ତାରିଖ ୨୬ନମ୍ବର ଜାତୀୟ ରାଜପଥ ଶିଶୁମନ୍ଦିର ଛକରେ ଘଟିଥିଲା । ଜଣେ ବାଇକ୍ ଚାଳକ ଲରିଆବାହାଲର ଜଣେ ସାଇକଲ ଆରୋହୀଙ୍କୁ ଧକ୍କା ଦେଇଥିଲେ। ସେ ଗୁରୁତର ହୋଇ ଡାକ୍ତରଖାନାରେ ଚିକିତ୍ସାନ ଅବସ୍ଥାରେ ମୃତ୍ୟୁବରଣ କରିଥିଲେ । ବାଇକ୍ ଆରୋହୀ ମଧ୍ୟ ଗୁରୁତର ହୋଇ ଚିକିତ୍ସାଧୂନ ରହିଛନ୍ତି । ଗତକାଲି ସଂଧ୍ୟାରେ ୨୬ ନମ୍ବର ଜାତୀୟ ରାଜପଥ ଚେରୁପାଲି ସ୍କୁଲ ସମ୍ମୁଖରେ ଦୁଇ ବାଇକ୍ ମଧ୍ୟର ଧକ୍କା ଫଳରେ ସାଲେଭଟା ଗ୍ରାମର ଜଣେ ରେଳ ବିଭାଗର କର୍ମଚାରୀଙ୍କ ପରଲୋକ ହୋଇଥିଲା । ଅନ୍ୟ ବାଇଜ୍‌ରେ ଥିବା କୁଶାମାଲ ଗ୍ରାମର ଦୁଇ ଭାଇ ନିଶାସକ୍ତ ରହିଥ‌ିବା ଲୋକେ ଅଭିଯୋଗ କରିଥିଲେ । ଅଧିକାଂଶ ଦୁର୍ଘଟଣାରେ ଚାଳକମାନେ ନିଶାସକ୍ତ ରହିଥ‌ିବା ଯୋଗୁଁ ଏହି ଦୁର୍ଘଟଣା ଘଟିଛି । ଏଥିପାଇଁ କଠୋର ନିୟମ କରାଯିବା ସହ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଆବଶ୍ୟକ ବୋଲି ବୁଦ୍ଧିଜୀବୀମାନେ ମତପ୍ରକାଶ କରୁଛନ୍ତି ।