16-Apr-2025

ଅତାବିରା(ଆକାଶ ମିଶ୍ର): ଆମ ମାତୃଭାଷା ଓଡ଼ିଆର ବ୍ୟାପକ ପ୍ରଚାର ପ୍ରସାର ଓ ସଠିକ୍ ବ୍ୟବହାର ଉପରେ ବିଶେଷ ପଦକ୍ଷେପ ନେଉଛନ୍ତି ରାଜ୍ୟ ସରକାର। ଏଥିପାଇଁ ଏପ୍ରିଲ ୧ ତାରିଖ ଓଡ଼ିଶା ଦିବସ ଠାରୁ ଏପ୍ରିଲ ୧୪ ତାରିଖ ଓଡ଼ିଆ ନବବର୍ଷ ପର୍ଯ୍ୟନ୍ତ ରାଜ୍ୟବ୍ୟାପୀ ପାଳନ ହେଉଛି ଓଡ଼ିଆ ପକ୍ଷ । ଏହି ଅବସରରେ ରାଜ୍ୟର ସମସ୍ତ ଦୋକାନ ଓ ବାଣିଜ୍ୟିକ ପ୍ରତିଷ୍ଠାନର ନାମଫଳକ ସ୍ପଷ୍ଟ ଭାବେ ଓଡ଼ିଆ ଭାଷାରେ ଲେଖ‌ିବା ସୁନିଶ୍ଚିତ କରିବା ପାଇଁ ଆରମ୍ଭ ହୋଇଛି ସାରା ରାଜ୍ୟରେ ବ୍ୟାପକ ଅଭିଯାନ । ଓଡ଼ିଶା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ଆଇନ (୧୯୫୬) ଅନୁଯାୟୀ ଓଡ଼ିଆ ଭାଷାରେ ସ୍ପଷ୍ଟ ଭାବରେ ନାମଫଳକ ଲେଖୁବା ବାଧ୍ୟତାମୂଳକ । ଏଥିରୁ ଖୂଲାପକାରୀଙ୍କ ବିରୋଧରେ ମକଦ୍ଦମା ରୁଜୁ ସହ ଜରିମାନା ଆଦାୟ ଭଳି ଦଣ୍ଡବିଧାନ ରହିଛି । ଏ ନେଇ ଆଜି  ବରଗଡ଼ ଜିଲ୍ଲା ଶ୍ରମ ଅଧିକାରିଣୀ ସସ୍ମିତା ବିଶ୍ଵାଳ  ଅତାବିରା ରେ ପହଞ୍ଚି ଓଡ଼ିଆରେ ନାମ ଫଳକ ଅଭିଯାନରେ ୮ ଟି ଦୋକାନକୁ ନୋଟିସ ଜାରି କରିଥିବା ଜଣାପଡିଛି ।  ଉକ୍ତ ଦୋକାନ ଗୁଡ଼ିକର ନାମ ଫଳକ ସଂପୂର୍ଣ୍ଣ  ଇଂରାଜୀ ଥିବାରୁ ତାଙ୍କୁ ଏହି ନୋଟିସ ଜାରି କରାଯାଇଛି । ସାତ ଦିନ ମଧ୍ୟରେ ଯଦି ନାମ ଫଳକ ଓଡ଼ିଆରେ ଲେଖା ନଥିବା ତେବେ  ଓଡ଼ିଶା ଦୋକାନ ଓ ବାଣିଜ୍ୟିକ ପ୍ରତିଷ୍ଠାନ ଆଇନ ୧୯୫୬ , ଧାରା ୩୮  ଜରିଆରେ ସେମାନଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଶ୍ରମ ଅଧିକାରୀ ଉକ୍ତ ଦୋକାନୀ ଉପରେ ମୋକଦ୍ଦମା କରି   ଏନ୍ ଏ ସି କୁ  ଜଣାଇବେ ।ଏନ୍ ଏ  ସି ଏହା ଉପରେ ବିଚାର କରି ବିହୀତ ପଦକ୍ଷେପ ନେବେ ବୋଲି ଶ୍ରମ ଅଧିକାରୀଙ୍କ ସୂତ୍ରରୁ ଜଣା ପଡ଼ିଛି ।ଏଣୁ ଯେଉଁ  ଦୋକାନୀ ମାନେ ଏପର୍ଯ୍ୟନ୍ତ ନିଜର ଦୋକାନ ଓ ବାଣିଜ୍ୟ ପ୍ରତିଷ୍ଠାନ ଗୁଡ଼ିକରେ ଓଡ଼ିଆ ଭାଷାରେ ନାମଫଳକ ଲେଖୂ ନାହାନ୍ତି, ସେମାନେ ଯଥାଶୀଘ୍ର ଏଥିପ୍ରତି ଯତ୍ନବାନ ହୁଅନ୍ତୁ । ନିର୍ଭୁଲ ଏବଂ ସ୍ପଷ୍ଟ ଭାବେ ଓ ସୁଦୃଶ୍ୟ ଭାବେ  ଓଡ଼ିଆ ଭାଷାରେ ନାମଫଳକ  ଲେଖି ଏହାର ଫଟୋଉତ୍ତୋଳନ କରି  ଜିଲ୍ଲା ଶ୍ରମ କାର୍ଯ୍ୟାଳୟ ରେ  ଦାଖଲ କରିବେ ନତୁବା ତାଙ୍କ ବିରୁଦ୍ଧରେ  କାହିଁକି ଆଇନ ଗତ କାର୍ଯ୍ୟାନୁଷ୍ଠାନ  ନିଆଯିବ ନାହିଁ ତାର କାରଣ ଦର୍ଶାଇବା ବୋଲି  ନୋଟିସ ରେ ଉଲ୍ଲେଖ ରହିଛି । ସେହିପରି  ବରଗଡ଼  ପୌରାଞ୍ଚଳରେ  ୧୦  ଟି ଦୋକାନ, ବରପାଲି ରେ ୧୪ , ପଦମପୁର ରେ ୫ ଟି  ଓ ବିଜେପୁର ରେ ୮ ଟି ସମୁଦାୟ ୪୪ ଟି ଦୋକାନକୁ ଏହି ନୋଟିସ ଦିଆଯାଇଥିବା ଜଣା ପଡ଼ିଛି ।