09-Feb-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଦେଓଗାଁ ବ୍ଲକର ଐତିହାସିକ ଜରାସିଂହା ଗ୍ରାମଠାରେ ଆଜି ବଲାଙ୍ଗୀରର ଟାଙ୍ଗିଆଜାମ କମିଟି ପକ୍ଷରୁ ପରିବେଶ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଟାଙ୍ଗିଆଜାମ କମିଟିର ସଭାପତି ତଥା ପରିବେଶକର୍ମି ପ୍ରକୃତିବନ୍ଧୁ ଗୋପାଳ ହୋତାଙ୍କ ସଭାପତିତ୍ୱ ଓ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ମୁଖ୍ୟଅତିଥି ଭାବରେ ବଲାଙ୍ଗୀର ଓକିଲସଂଘର ସଭାପତି ଅମ୍ବରିଶ ତ୍ରୀପାଠୀ,ସମ୍ମାନୀତ ଅତିଥି ଭାବରେ ପଥରଚେପା ଆଦର୍ଶବିଦ୍ୟାଳୟର ଅଧ୍ୟକ୍ଷ କ୍ଷମାନିଧି ଝାଙ୍କର,ବରିଷ୍ଠ ସାମ୍ବାଦିକ

ପୂର୍ଣ୍ଣଚନ୍ଦ୍ର ପଣ୍ଡା,ଶିକ୍ଷାବିଦ ମନୋରଂଜନ ସାହୁ,ଜିଲ୍ଲାପରିଷଦ ସଭ୍ୟା ସୁମତି ସେଠ୍‌, ଆଇନଜୀବି ଭକ୍ତଚରଣ ନାଏକ, ଜରାସିଂହାର ବରିଷ୍ଠ ନାଗରିକ ଦୟାନିଧି ମେହେର ଓ ବିଏନଏଏ କ୍ଲବର ସଭାପତି କରୁଣାକର ମେହେର, କୁମାର ଷାଣ୍ଢ ଓ ଦେବପ୍ରସାଦ ମେହେର ପ୍ରମୁଖ ଯୋଗଦେଇ ପରିବେଶ ସୁରକ୍ଷା ଉପରେ ଉପସ୍ଥିତ ଜନସାଧାରଣଙ୍କୁ କହିଥିଲେ । ଅତିଥିଗଣ ତାଙ୍କ ବକ୍ତବ୍ୟରେ ଜଙ୍ଗଲସୁରକ୍ଷା,ବନାଗ୍ନୀ ରୋକିବା, ବନୀକରଣ କରାଇବା ଓ ସର୍ବୋପରି ଆଗାମୀପିଢୀ ପାଇଁ ପରିବେଶକୁ ସୁରକ୍ଷା କରିବା ପାଇଁ ସମସ୍ତେ ଧ୍ୟାନଦେବାକୁ ଅନୁରୋଧ କରିଥିଲେ । ଟାଙ୍ଗିଆଜାମ କମିଟିର ସଭାପତି ଏଡଭୋକେଟ ଗୋପାଳ ହୋତା ପରିବେଶ ସୁରକ୍ଷାର ଆଧ୍ୟାତ୍ମିକ ଦିଗ ଉପରେ ବକ୍ତବ୍ୟ ରଖି ମାଟି, ପାଣି, ପବନ, ଆକାଶ ଓ ଅଗ୍ନୀ ଉପରେ ଲୋକଙ୍କୁ ବୁଝାଇଥିଲେ । ବୃକ୍ଷଦ୍ୱାରା କିଭଳି ଜଳଚକ୍ର,ପବନଚକ୍ର ଓ ଜୀବଚକ୍ର ପରିଚାଳିତ ହେଉଛି ସେଉପରେ ଲୋକଙ୍କୁ ବୁଝାଇଥିଲେ । ବୃକ୍ଷ ହିଁ ପୃଥିବୀପୃଷ୍ଠରେ ଜୀବଜଗତକୁ ବଞ୍ଚାରଖି ପାରିବ ବୋଲି କହି ତାହାର ସୁରକ୍ଷା ନିତାନ୍ତ ଆବଶ୍ୟକ ବୋଲି କହିଥିଲେ । ସେହିପରି ଓଏଭିର ଅଧ୍ୟକ୍ଷ ତାଙ୍କ ବକ୍ତବ୍ୟରେ ସାହାରା ମରୁଭୂମୀ କିଭଳି ଏକ ଶସ୍ୟଶ୍ୟାମଳ ଅଞ୍ଚଳରୁ ମରୁଭୂମୀ ହେଲା,୩୦୦ ବର୍ଷ ପୂର୍ବରୁ ବିଶ୍ନୋଇମାନଙ୍କ ବୃକ୍ଷସୁରକ୍ଷା ପାଇଁ ବଳିଦାନ, ଚିଫକୋ ଆନ୍ଦୋଳନ ସହିତ ଆଜିର ଗନ୍ଧମାର୍ଦ୍ଦନ ଆନ୍ଦୋଳନ ଉପରେ ବକ୍ତବ୍ୟ ରଖିଥିଲେ । ଠିକ ସେହିପରି ସାମ୍ବାଦିକ ପୂର୍ଣ୍ଣଚନ୍ଦ୍ର ପଣ୍ଡା ଦେଓଗାଁ ଅଞ୍ଚଳବାସୀ ସୁଲିଆଜଙ୍ଗଲଠାରୁ ଆରମ୍ଭ କରି ଭୀମଡୁଙ୍ଗୁରୀ,ମୁରସିଂହ,କିରିବାଞ୍ଜି ଓ ଚାନ୍ଦଲି ପାହାଡ ଅଞ୍ଚଳରେ ଜନସାଧାରଣ ସଚେତନ ହୋଇ ଜଙ୍ଗଲସୁରକ୍ଷା ସାଙ୍ଗକୁ କିଭଳି ପାହାଡ ସୁରକ୍ଷା କରୁଛନ୍ତି ତାହା ବର୍ଣ୍ଣନା କରିଥିଲେ । ଏହା ସହିତ ମହୋତ୍ସବ ଜରିଆରେ ଦେଓଗାଁ ଅଞ୍ଚଳରେ ଲୋକମାନେ ଜଙ୍ଗଲ ଓ ପାହାଡ ସୁରକ୍ଷା ସାଙ୍ଗକୁ ପରିବେଶ ସୁରକ୍ଷାରେ ସଫଳ ହୋଇଥିବାରୁ ତାହାକୁ ଉଚ୍ଚପ୍ରଶଂସା କରିଥିଲେ । ଶିକ୍ଷାବିଦ ମନୋରଂନ ସାହୁ ପରିବେଶ ଅସନ୍ତୁଳନ ଓ ବିଶ୍ୱତାପାୟନ ଉପରେ ବକ୍ତବ୍ୟ ରଖିଥିଲେ । ଆଇନଜୀବି ଅମ୍ବରିଶ ତ୍ରୀପାଠୀ ଓ ଭକ୍ତବନ୍ଧୁ ନାଏକ ଟାଙ୍ଗିଆଜାମ କମିଟିର ପରିବେଶଧର୍ମି କାର୍ଯ୍ୟକ୍ରମକୁ ପ୍ରଶଂସା କରିଥିଲେ । ସଭାକାର୍ଯ୍ୟ ପୂର୍ବରୁ ଦେଓଗାଁ ଓ ଜରାସିଂହା ପଞ୍ଚାୟତର ୱାର୍ଡସଭ୍ୟ/ସଭ୍ୟା,ପଞ୍ଚାୟତସମିତି ସଭ୍ୟ/ସଭ୍ୟା,ସାମ୍ବାଦିକ ଓ ଜିଲ୍ଲାପରିଷଦ ସଭ୍ୟା ତଥା ଅଞ୍ଚଳର ବିଶିଷ୍ଟ ବ୍ୟକ୍ତିଙ୍କୁ ପାଦଧୋଇ ଉତ୍ତରିୟ ଦେଇ ପଞ୍ଚବଟି ବୃକ୍ଷ ଯଥା-ବର,ପିପ୍ପଳ,ଆମ୍ବ,ଜାମୁ ଓ ଅଁଳାଗଛ ରୋପଣ କରି ତାକୁ

ଜତ୍ନନେବାକୁ ଶପଥପାଠ କରାଯାଇଥିଲା । ମହିଳାମାନେ ଭାଇଜିଉଁତିଆ ଭଳି ଜିଉଁତିଆବାନ୍ଧି ବୃକ୍ଷସୁରକ୍ଷାର ଶପଥ କରାଇଥିଲେ । ଏହି କାର୍ଯ୍ୟକ୍ରମରେ ଜରାସିଂହା ସମେତ ଆଖପାଖ ଅଞ୍ଚଳର ଶତାଧିକ ପୁରୁଷ/ମହିଳା ଯୋଗ ଦେଇଥିଲେ । ପ୍ରକାଶ ଯେ,ଟାଙ୍ଗିଆଜାମ କମିଟି ପକ୍ଷରୁ ପ୍ରତ୍ୟେକମାସ ୧ ତାରିଖରେ ଟାଙ୍ଗିଆବନ୍ଦ କରି ଗଛ ନକାଟିବାକୁ ଅନୁରୋଧ କରାଯାଉଛି । ଏହା ସହିତ ବର୍ଷାଦିନେ ଗାଁଗାଁରେ ଚାରା ବଣ୍ଟନ କରାଯାଇ ବନୀକରଣକୁ ପ୍ରୋତ୍ସାହିତ କରାଯାଉଛି । ପ୍ରତିବର୍ଷ ହଜାର ହଜାର ଗଛ ଲୋକଙ୍କୁ ବଣ୍ଟନ କରାଯାଇ ଆସୁଛି । କେବଳ ସେତକି ନୁହେଁ ଗ୍ରୀଷ୍ମଦିନେ ଜଙ୍ଗଲରେ ନିଆଁ ନଲଗାଇବା,ଜଙ୍ଗଲକୁ ସୁରକ୍ଷା କରିବା, ବନ୍ୟଜନ୍ତୁଙ୍କୁ ହତ୍ୟା ନକରିବା ବିଷୟ ନେଇ ଲୋକଙ୍କ ମଧ୍ୟରେ ସଚେତନା କାର୍ଯ୍ୟକ୍ରମ କରାଯାଇ ଆସୁଛି । ଏକ ଆଧ୍ୟାତ୍ମିକ ମାର୍ଗରେ ଲୋକଙ୍କୁ ବୃକ୍ଷ ଓ ପରିବେଶର ଉପକାରୀତା ବିଷୟରେ ବୁଝାଯାଉଥିବାରୁ ଲୋକଙ୍କ ମଧ୍ୟ ଏଥିପ୍ରତି ଆଗ୍ରହ ପ୍ରକାଶ ପାଉଛି ।