08-Feb-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ଼ ସହରର ବହୁଚର୍ଚ୍ଚିତ ଲେଙ୍ଗୁ ମିଶ୍ର ଛକଠାରୁ ଜୀରାବ୍ରିଜ ଯାଏ ହୋଇଥିବା ରାସ୍ତା ଜବରଦଖଲ କେବେ ଉଚ୍ଛେଦ ହେବ, ତାକୁ ସହରବାସୀ ଚାହିଁ ବସିଛନ୍ତି। ଏ ନେଇ ଶୁକ୍ରବାର ଏହି ସ୍ଥାନ ଉଚ୍ଛେଦ ଦାବିର ନେତୃତ୍ୱ ନେଉଥିବା ବରଗଡ଼ ଜିଲା ଓକିଲ ସଂଘ ଏବଂ ସମଲେଶ୍ୱରୀ ସଂଘର ଏକ ପ୍ରତିନିଧି ଦଳ ପୌର ପରିଷଦ କାର୍ଯ୍ୟନିର୍ବାହୀ ଅଧିକାରୀ(ଇ.ଓ.) ଦେବାନନ୍ଦ ସାହୁଙ୍କୁ ଭେଟି ଆଲୋଚନା କରିଥିଲେ। ତେବେ ଆଗକୁ ଶୀଘ୍ର ଲେଙ୍ଗୁ ମିଶ୍ର ଛକଠାରୁ ଜୀରାବ୍ରିଜ ଯାଏ ରାସ୍ତା ଜବରଦଖଲ ଉଚ୍ଛେଦ ନେଇ ପୌର ପରିଷଦ କାର୍ଯ୍ୟନିର୍ବାହୀ ଅଧିକାରୀ ସାହୁ ସକାରାତ୍ମକ ସୂଚନା ଦେଇଥିବା ଜଣାପଡ଼ିଛି।
ସୂଚନା ଅନୁଯାୟୀ, ବରଗଡ଼ ସହରର ଲେଙ୍ଗୁ ମିଶ୍ର ଛକଠାରୁ ଜୀରାବ୍ରିଜ ଯାଏ ଜବରଦଖଲ ଉଚ୍ଛେଦ ସ୍ଥାନୀୟ ଲୋକଙ୍କ ଦୀର୍ଘଦିନର ଦାବି ହୋଇ ରହି ଆସିଛି। ଏହି ସ୍ଥାନ ଉଚ୍ଛେଦ ସପକ୍ଷରେ ଗତ ବର୍ଷକ ମଧ୍ୟରେ ଉଚ୍ଚ ନ୍ୟାୟାଳୟ ମଧ୍ୟ ୨ଥର ରାୟ ଦେଇ ସାରିଛନ୍ତି। ଏହାସତ୍ତ୍ୱେ ସମ୍ପୃକ୍ତ ଜବରଦଖଲ ସ୍ଥାନକୁ ଉଚ୍ଛେଦ କରିବା ବଦଳରେ ପ୍ରଶାସନ ବିଭିନ୍ନ ଆଳରେ ସମୟ ଗଡ଼ାଇ ଚାଲିଛି। ଅନ୍ୟପଟେ ସହରର ଗରିବ, ଠେଲା ଦୋକାନୀଙ୍କୁ ସ୍ବଳ୍ପକାଳୀନ ମୌଖିକ ନୋଟିସ୍‌ରେ ଉଚ୍ଛେଦ କରାଯାଉଛି। ଏହାକୁ ନେଇ ଚାପା ଅସନ୍ତୋଷ ଲାଗି ରହିଥିବାବେଳେ ଉଚ୍ଛେଦ ପ୍ରକ୍ରିୟାରେ ଏଭଳି ପାତରଅନ୍ତର ନୀତି ଯୋଗୁ ପ୍ରଶାସନ ଉପରେ ସହରବାସୀଙ୍କ ବିଷୋଦ୍‌ଗାର ପରିଲକ୍ଷିତ ହେଉଛି।
ଗତ ଧନୁଯାତ୍ରା ମହୋତ୍ସବ ଅବ୍ୟବହିତ ପୂର୍ବରୁ ଜୀରାନଦୀ କୂଳ ଅମ୍ବାପାଲି ନିକଟରେ ଜଣେ ବୃଦ୍ଧାଙ୍କ ଘରକୁ ଉଚ୍ଛେଦ କରିବାକୁ ଯାଇଥିବାବେଳେ ପ୍ରଶାସନ ବିରୋଧର ସମ୍ମୁଖୀନ ହୋଇଥିଲା। ସେହିପରି ବୁଧବାର ଦୋକାନ ଖାଲି କରିବାକୁ ମୌଖିକ ନିର୍ଦ୍ଦେଶ ଦେଇ ଶନିବାର ଅମ୍ବାପାଲି ଛକରେ ୩ଦୋକାନୀଙ୍କୁ ଉଚ୍ଛେଦ କରାଗଲା। ଅନ୍ୟପଟେ ଉଚ୍ଛେଦ ସପକ୍ଷରେ ଉଚ୍ଚ ନ୍ୟାୟାଳୟ ବାରମ୍ବାର ରାୟ ଦେବା ସତ୍ତ୍ୱେ ବର୍ଷାଧିକକାଳ ଧରି ଲେଙ୍ଗୁ ମିଶ୍ର ଛକଠାରୁ ଜୀରାବ୍ରିଜ ଯାଏ ଜବରଦଖଲ ଉଚ୍ଛେଦ କରିବା ପାଇଁ ପ୍ରଶାସନ କାହିଁକି ସାହସ ଜୁଟାଇ ପାରୁ ନାହିଁ ବୋଲି ସହରରେ ଚର୍ଚ୍ଚା ଜୋର୍‌ ଧରିଛି।
ତେବେ ଶୁକ୍ରବାର ଜିଲା ଓକିଲ ସଂଘ ଏବଂ ସମଲେଶ୍ୱରୀ ସଂଘର ପ୍ରତିନିଧିବୃନ୍ଦ ପୌର ପରିଷଦ କାର୍ଯ୍ୟନିର୍ବାହୀ ଅଧିକାରୀ ସାହୁଙ୍କୁ ଭେଟିବା ପରେ ଲେଙ୍ଗୁ ମିଶ୍ର ଛକଠାରୁ ଜୀରାବ୍ରିଜ ଯାଏ ଜବରଦଖଲ ଉଚ୍ଛେଦ ନେଇ ସବୁଜ ସଙ୍କେତ ମିଳିଛି। ପୌର ପରିଷଦ କାର୍ଯ୍ୟନିର୍ବାହୀ ଅଧିକାରୀ ସାହୁ କହିଛନ୍ତି, ଉଚ୍ଚ ନ୍ୟାୟାଳୟର ଆଦେଶକ୍ରମେ ସମ୍ପୃକ୍ତ ସ୍ଥାନ ଜବରଦଖଲ କରିଥିବା ଲୋକଙ୍କୁ ପର୍ଯ୍ୟାୟକ୍ରମେ ନୋଟିସ୍‌ କରାଯାଉଛି। ପ୍ରଥମ ପର୍ଯ୍ୟାୟରେ ୧୦ଜଣଙ୍କୁ ନୋଟିସ୍‌ ହୋଇଛି। ଆସନ୍ତା ୧୨ ଓ ୧୫ତାରିଖ ଉପଜିଲାପାଳଙ୍କ କାର୍ଯ୍ୟାଳୟରେ ଶୁଣାଣି ରହିଛି। ଜିଲାପାଳଙ୍କ ନିର୍ଦ୍ଦେଶକ୍ରମେ ସେଥିପାଇଁ ଏକ କମିଟି ମଧ୍ୟ ଗଠନ କରାଯାଇଛି। ପର୍ଯ୍ୟାୟକ୍ରମେ ସମସ୍ତ ଜବରଦଖଲକାରୀଙ୍କୁ ନୋଟିସ୍‌ ହେବ ଏବଂ ଶୀଘ୍ର ଶୁଣାଣି ଶେଷ କରି ସହରବାସୀଙ୍କ ସୁବିଧା ପାଇଁ ପଦକ୍ଷେପ ନିଆଯିବ ବୋଲି ସାହୁ କହିଥିଲେ।
ଏ ସମ୍ପର୍କରେ ଜିଲା ଓକିଲ ସଂଘର ସଭାପତି ଭୀଷ୍ମଦେବ ସରାଫ କହିଛନ୍ତି, ଜିଲା ଓକିଲ ସଂଘ ସ୍ଥାନୀୟ ସମଲେଶ୍ୱରୀ ସଂଘ ସହିତ ମିଳିତଭାବେ ଲେଙ୍ଗୁ ମିଶ୍ର ଛକଠାରୁ ପୁରୁଣା ଜୀରାବ୍ରିଜ ଯାଏ ଜବରଦଖଲ ଉଚ୍ଛେଦ ପାଇଁ ଜିଲାପାଳଙ୍କୁ ଦାବିପତ୍ର ପ୍ରଦାନ କରିଥିଲା। ଉଚ୍ଛେଦ ପ୍ରକ୍ରିୟା ମଧ୍ୟ ଆରମ୍ଭ ହୋଇଥିଲା। କିନ୍ତୁ ଉଚ୍ଚ ନ୍ୟାୟାଳୟ ଆଦେଶକ୍ରମେ ସେହି ପ୍ରକ୍ରିୟା ବନ୍ଦ ରହିଥିଲା। ଏପରି କି ଓକିଲ ସଂଘ ନାମରେ କିଛି ଲୋକ ମଧ୍ୟ କେସ୍‌ କରିଥିଲେ। କିନ୍ତୁ ଉଚ୍ଚ ନ୍ୟାୟାଳୟ ଉଚ୍ଛେଦ ସପକ୍ଷରେ ରାୟ ଦେଇଛନ୍ତି। ପ୍ରଶାସନ ଉଚ୍ଚ ନ୍ୟାୟାଳୟର ଆଦେଶକୁ ଭିତ୍ତି କରି ପ୍ରକ୍ରିୟା ଆରମ୍ଭ କରି ଦେଇଛନ୍ତି। ଫଳରେ ଶୀଘ୍ର ଉଚ୍ଛେଦ ଅଭିଯାନ ପୁଣି ଆରମ୍ଭ ହେବ ବୋଲି ସରାଫ କହିଛନ୍ତି। ସମଲେଶ୍ୱରୀ ସଂଘର ସଭାପତି ସମୀର ପ୍ରଧାନ ମଧ୍ୟ ଅନୁରୂପ ମତ ରଖିଛନ୍ତି।