04-Nov-2024

ଅତାବିରା(ଆକାଶ ମିଶ୍ର): ନ୍ୟାୟ ପାଇବାକୁ ଆଉ କେତେ ଦିନ ଅପେକ୍ଷା କରିବେ ? ସେମାନଙ୍କୁ ଥଇଥାନ କେବେ କରିବେ ସରକାର ? କେବେ ସ୍ଥାପିତ ହେବେ ବିସ୍ଥାପିତ ? କାହିଁକି ସରକାର କଲେ ଛଳନା ? ବିକାଶ ପାଇଁ ଭିଟାମାଟି ଛାଡିବା କଣ ତାଙ୍କର ଭୁଲ ଥିଲା ? ଆଜି ରକ୍ତର ସମ୍ପର୍କ   ପରସ୍ପର ଠାରୁ ବିଛିନ୍ନ ହୋଇଯାଇଛି ସେଥିପାଇଁ ଦାୟୀ କିଏ ? ଏମିତି ଅନେକ ଯନ୍ତ୍ରଣାଦାୟକ  କୋହ ଭରା ପ୍ରଶ୍ନ ସରକାରଙ୍କୁ ପଚାରୁଛନ୍ତି ହୀରାକୁଦ ନଦୀବନ୍ଧ ବିସ୍ଥାପିତ ପରିବାର ।ଆଜି ଅତାବିରା  ବ୍ଲକ ଅନ୍ତର୍ଗତ ସରଣ୍ଡା ହାଇସ୍କୁଲ ପଡ଼ିଆରେ  ହୀରାକୁଦ ବିସ୍ଥାପିତ  କଲ୍ୟାଣ ସମିତି  , ସମ୍ବଲପୁର ର ସଭାପତି ଲୋକନାଥ ସାହୁ ଙ୍କ ନେତୃତ୍ୱରେ ବିସ୍ଥାପିତ ପରିବାର ମାନଙ୍କୁ ନେଇ   ଏକ ବୈଠକ ହୋଇଥିଲା । ଉକ୍ତ ବୈଠକରେ  ଥଇଥାନ( ଜମିଡିହ ପଟ୍ଟା)ରୁ ବଞ୍ଚିତ ଥିବା ବିସ୍ଥାପିତ ପରିବାର ର ଶତାଧିକ ଲୋକ ଉପସ୍ଥିତ ରହି ତାଙ୍କର ହକ ପାଇଁ କରୁଥିବା ସଙ୍ଘର୍ଷ  ତଥା ସରକାର ଙ୍କ  ଛଳନା ଭରା ସ୍ଵନ୍ତନା ର ଇତି  କରିବା ପାଇଁ  ରଣହୁଙ୍କାର ଦେଇ ଯୋଜନା ପ୍ରସ୍ତୁତ କରିଥିଲେ ।ହୀରାକୁଦ ବିସ୍ଥାପିତ କଲ୍ୟାଣ ସମିତି ଦ୍ବାରା ପ୍ରଦତ୍ତ  ତଥ୍ୟ ଅନୁସାରେ ହୀରାକୁଦ  ନଦୀବନ୍ଧ ପାଇଁ ସମଗ୍ର ଅଞ୍ଚଳର ଦେଢ ଲକ୍ଷ ହେକ୍ଟର ଚାଷ ଜମି ବୁଡିଗଲା । ୭୫୦ ବର୍ଗ କିଲୋମିଟର ବ୍ୟାପି ଜଳ ଭଣ୍ଡାର ଅଞ୍ଚଳରେ ଥିବା ୩୬୯ ଟି ଗାଁ ପାଣିରେ ସମାଧି ହୋଇଗଲା । ଶହ ଶହ ମଠ ମନ୍ଦିର, ଧର୍ମାନୁଷ୍ଠାନ ସହ ଘର ଦ୍ବାର ସମ୍ପର୍କ ସମ୍ପତ୍ତି ବୁଡିଲା । ଏଥିପାଇଁ ୨୬ ହଜାର  ୫୦୧ ପରିବାର  ନିଜ ଭିତା ମାଟି ଛାଡ଼ି  ହେଲେ  ବିସ୍ଥାପିତ ।  ୬୫  ବର୍ଷ ପରେ  ଅନ ବିଭାଜିତ ହୋଇ  ଏହି ସଂଖ୍ୟା  ୯୬ ହଜାର କୁ ବୃଦ୍ଧି  ହେଲା।   ବିଳମ୍ବରେ ହେଲେ ମଧ୍ୟ   ଓଡ଼ିଶା ସରକାର ରାଜସ୍ବ ବିଭାଗ ଙ୍କ  ପତ୍ର ସଂଖ୍ୟା  ୫୫୩୧ ଅନୁସାରେ ଜିଲ୍ଲାପାଳ ଓ ଆର୍ ଡି ସି ମାନଙ୍କୁ  ନିର୍ଦ୍ଦେଶ ଦିଆଯାଇଥିଲା  ପ୍ରତି ବିସ୍ଥାପିତ ପରିବାର ଙ୍କୁ  ୧୦  ଡି ସିମିଲ  ଜମି  ଯୋଗାଇ ଦେବାପାଇଁ ।୨୨ ବର୍ଷ ପରେ ପରିସଂଖ୍ୟାନ ତଥ୍ୟ ଅନୁଯାୟୀ  ଝାରସୁଗୁଡ଼ା ର ୩୮୦୦ ପରିବାର, ବରଗଡ଼ ର ୧୧୨ ପରିବାର ଓ ସମ୍ବଲପୁର ର ୭୦୦ ପରିବାର ମୋଟ  ୪୫୦୦ ପରିବାର ଙ୍କୁ  ଜମି ପଟ୍ଟା ପ୍ରଦାନ କରାଯାଇଛି । କିନ୍ତୁ ଏବେ ସୁଦ୍ଧା  ୮୪ ହଜାର ପରିବାର ବଞ୍ଚିତ ଅଛନ୍ତି । ସେଥି ମଧ୍ୟରୁ ଅତାବିରା  ତହସିଲ  ରେ ସର୍ବାଧିକ ୧୩୭୫  ପରିବାର ଆବେଦନ କାରି ଅଛନ୍ତି ।ଏମାନେ  ଆବଶ୍ୟକ ପ୍ରମାଣ ପତ୍ର   ନ ମିଳିବା ହେତୁ ଅଥବା ପରିଚିତ ନେତା କିମ୍ବା ଅଧିକାରୀ ଙ୍କ  ସହାୟତା ର ହାତ ର ଅଭାବରୁ ସେମାନେ ଆଜି ଯାଏ ଜମି ପଟ୍ଟା ରୁ ବଞ୍ଚିତ । ଏମାନେ ଅନେକ ଥର  କାର୍ଯ୍ୟପାଳିକା ,ବ୍ୟବସ୍ଥାପିକା  ସଭା  କୁ ପ୍ରତିନିବେଦନ କରିଥିଲେ ହେଁ ଆଜି ସୁଦ୍ଧା କିଛି ଫଳପ୍ରଦ ହୋଇପାରି ନାହିଁ । ତାଙ୍କର ଦୋଷ ଏହା ଯେ ଦେଶର ଗୌରବ ପାଇଁ ରାଜ୍ୟର ଦୃତ ବିକାଶ ପାଇଁ ଭିଟାମାଟି ତ୍ୟାଗ କରିଛନ୍ତି । ଆଉ ଏହି ତ୍ୟାଗ ପରେ ଉଭୟ କେନ୍ଦ୍ର ଓ ରାଜ୍ୟ ସରକାର ସେମାନଙ୍କ ସହ ଯେଉଁ ଛଳନା କରିଛନ୍ତି ତାହା ଆଜିର ତୃତୀୟ ପୀଢି ମଧ୍ୟ ଶୁଣି ଦେଖି ଗୁମୁରି ଗୁମୁରି କାନ୍ଦୁଛନ୍ତି ସିନା ହେଲେ ତାଙ୍କ କାନ୍ଦ କୌଣସି ନିର୍ବାଚିତ ସରକାର ପାଖରେ ପହଞ୍ଚି ପାରୁନାହିଁ । ତେଣୁ  ଆଗାମୀ ଦିନରେ ଶକ୍ତିଶାଳୀ ସ୍ତମ୍ଭ ନ୍ୟାୟପାଳିକା   କୁ ଯିବା ପାଇଁ ପ୍ରସ୍ତୁତ ହେଉଛନ୍ତି । ଏହା ବ୍ୟତୀତ  ଆସନ୍ତା  ନଭେମ୍ବର   ୨୫ ତାରିଖ ଦିନ ଅତାବିରା ତହସିଲ କାର୍ଯ୍ୟାଳୟ ସମ୍ମୁଖରେ  ବିସ୍ଥାପିତ ୧୦୦ ପରିବାର  ଜମି ଡିହ ପାଇଁ ଗବ ଧାରଣା ଦେବେ ବୋଲି ବୈଠକରେ ନିଷ୍ପତ୍ତି ନିଆଯାଇଥିବା ଜଣାପଡିଛି । ଏହି ବୈଠକରେ   ସମିତି ର ବରଗଡ଼ ବ୍ଲକ  ଉପ ସଭାପତି  ବିନୋଦ ଡନସନା , ଅତାବିରା ବ୍ଲକ ସଭାପତି  ଶଙ୍କର ମେହେର , ଭଟିଲି ବ୍ଲକ ସଭାପତି  ସନ୍ତୋଷ ମିର୍ଦ୍ଧା ଙ୍କ ସମେତ   ୫୦ ରୁ ଉର୍ଦ୍ଧ୍ବ ବିସ୍ଥାପିତ ପରିବାର ସାମିଲ ହୋଇଥିଲେ ।