22-Sep-2024

ବଲାଙ୍ଗୀର (ପ୍ରେରଣା ଖବର): କେନ୍ଦ୍ର ସରକାର ଆଦିବାସୀଙ୍କୁ ମୂଳପୋଛ କରିବା ପାଇଁ ଅହରହ ଷଡଯନ୍ତ୍ର ରଚୁଛନ୍ତି | କେତେବେଳେ ଆଦିବାସୀ କୋଟା ଉଠେଇବା ପାଇଁ ଗୋଟି ଚାଳନା କରୁଥିବାବେଳେ କେତେବେଳେ ଆଦିବାସୀଙ୍କୁ ଦେଶର ମୁଖ୍ୟ ଶ୍ରୋତରେ ସାମିଲ କରିବା ବାହାନାରେ ଜମିରୁ ସର୍ବହରା କରିବା ପାଇଁ ଯୋଜନା ଚାଲିଛି | କେନ୍ଦ୍ର ସରକାର ଆଦିବାସୀ ମାନଙ୍କ ମଧ୍ୟରେ କ୍ରିମି ଲେୟାର କରି ଜାତି ଜାତି ମଧ୍ୟରେ ବିଭେଦ କରି ଆଦିବାସୀଙ୍କୁ ନିଜ ନିଜ ମଧ୍ୟରେ ଲଢେଇ କରିବାକୁ ମଧ୍ୟ ଷଡଯନ୍ତ୍ର କରୁଛି | ଆଦିବାସୀ ରାଜ୍ୟର ମୁଖ୍ୟମନ୍ତ୍ରୀ ଓ ଦେଶର ଉଚ୍ଚ ଆସନ ମହାମହିମ ରାଷ୍ଟ୍ରପତି ପଦବୀରେ ଅଳଙ୍କୃତ ହୋଇଥିବା ବେଳେ ଆଦିବାସୀ ମାନଙ୍କ ଭିତରେ ଉଚ୍ଚ ଶିକ୍ଷିତ ନୁହନ୍ତି ବୋଲି ସରକାର କନିଷ୍ଠ ଶିକ୍ଷକ ପଦବୀରୁ ମଧ୍ୟ ବଞ୍ଚିତ କରିବା ଦୁଃଖର ବିଷୟ | ବିଗତ ଗ୍ରାମ ପଞ୍ଚାୟତ ନିର୍ବାଚନରେ ମଧ୍ୟ ଆଦିବାସୀ ମାନଙ୍କୁ ଅଣଦେଖା କରାଯାଇଥିଲା |  ଆଦିବାସୀଙ୍କ ସାମ୍ବିଧାନିକ ଅଧିକାର ଛଡେଇ ନକଲି ଆଦିବାସୀ ରାଜ କରୁଥିବାବେଳେ ଆଦିବାସୀ ମାନେ ନକଲି ଆଦିବାସୀ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଯେତେ ଆପତ୍ତି ଅଭିଯୋଗ କଲେ ମଧ୍ୟ ସରକାର କୁମ୍ଭକର୍ଣ୍ଣ ନିଦ୍ରାରେ |  ସରକାର ଆଦିବାସୀଙ୍କ ନାଁ ରେ ଯୋଜନା ଉପରେ ଯୋଜନା କରି ଆଦିବାସୀ ବିକାଶ ନାଁ ରେ ଆସୁଥିବା ଟଙ୍କା ହରିଲୁଟ କରି ଚାଲିଛନ୍ତି | ସମ୍ବିଧାନ ସଂଶୋଧନ ନାଁ ରେ ସଂରକ୍ଷଣ ଉଠେଇବା ପାଇଁ, ଏଟ୍ରୋସିଟି ଏକ୍ଟକୁ ଦୁର୍ବଳ କରିବା ପାଇଁ ଅନେକ ଷଡଯନ୍ତ୍ର ରଚନା କରୁଛନ୍ତି କେନ୍ଦ୍ର ସରକାର | ଆଦିବାସୀ ମାନଙ୍କ ଉପରେ ବାରମ୍ବାର ଷଡଯନ୍ତ୍ର କରୁଥିବା କେନ୍ଦ୍ର ସରକାର ବିରୋଧରେ ବିଗତ ଦିନରେ ଅନେକ ଆନ୍ଦୋଳନ ହୋଇଥିବା ବେଳେ ଆଗକୁ ମଧ୍ୟ ଆଦିବାସୀ ମାନେ ଆନ୍ଦୋଳନ କରିବା ପାଇଁ ସଜବାଜ ହେଉଛନ୍ତି |  କେନ୍ଦ୍ର ସରକାର ର ଆଦିବାସୀ ବିରୋଧୀ କାର୍ଯ୍ୟକ୍ରମ ଆଗାମୀ ଦିନରେ କେନ୍ଦ୍ର ସରକାରକୁ ହରଡ଼ ଘଣାରେ ପକେଇଦେବ ସମୟ କହିବ  |  ଆଦିବାସୀ ମାନଙ୍କ ଅସନ୍ତୋଷ ଦିନେନା ଦିନେ ସରକାରକୁ ଗାଡିଚ୍ୟୁତ କରିଦେବ |  ଦୁଇଦିନ ପୂର୍ବରୁ ହୋଇଥିବା ବଲାଙ୍ଗୀର ଜିଲ୍ଲାପରିଷଦ ବୈଠକରେ ମଧ୍ୟ ଜଣେ ଶାସକ ଦଳର ବିଧାୟକ ଓ. ଆର. ଭି. ଆକ୍ଟ ବିରୋଧ ରେ ଟିପ୍ପଣୀ ଦେବା ଦୁଃଖ ଦାୟକ | ଆଜି ଟିଟିଲାଗଡ଼ ବ୍ଲକ ବିଜେପୁର ଠାରେ ଜିଲ୍ଲା ଆଦିବାସୀ କଲ୍ୟାଣ ସଂଘ ଆହ୍ୱାନ କ୍ରମେ ବ୍ଲକ ସ୍ତରୀୟ ନୁଆଁଖାଇ ଭେଟଘାଟ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା |  ପ୍ରଥମେ ଧରନି ପୀଠରେ ଇଷ୍ଟଦେବୀଙ୍କୁ ପୂଜାର୍ଚନା ସାରି ଡକା ବାଦ୍ୟ ବଜେଇ  ବଜେଇ କାର୍ଯ୍ୟକ୍ରମରେ ଯୋଗଦେଇଥିବା ମୁଖ୍ୟ ଅତିଥି ପଶ୍ଚିମ ଓଡିଶା ଆଦିବାସୀ ମହାସଂଘର ମହାସଚିବ ତଥା ରାଜ୍ୟସଭା ସାଂସଦ ଶ୍ରୀଯୁକ୍ତ ନିରଞ୍ଜନ ବିଶିଙ୍କୁ ଗ୍ରାମରେ ଭବ୍ୟ ଶୋଭାଯାତ୍ରାରେ ସଭାମଞ୍ଚ ପାଖକୁ ପାଛୋଟି ନେଇଥିଲେ ହଜାର ସଂଖ୍ୟାରେ ଉପସ୍ଥିତ ଥିବା ଆଦିବାସୀ  | ବ୍ଲକ ସଭାପତି ଶ୍ରୀ ପଦ୍ମନ ପଧାନୀ ଙ୍କ ସଭାପତିତ୍ୱରେ ଅନୁଷ୍ଠିତ ହୋଇଥିବା ସଭାରେ ରାଜ୍ୟସଭା ସାଂସଦ  ଶ୍ରୀ ବିଶି ମୁଖ୍ୟ ଅତିଥି ଭାବରେ ଯୋଗଦେଇ ଆଦିବାସୀ ମାନଙ୍କ ହକ ଅଧିକାର, ସାମ୍ବିଧାନିକ ଅଧିକାର,

ସଂସ୍କୃତି ପରମ୍ପରା, ଦେବଦେବୀ ପୀଠରେ ସୁରକ୍ଷା, ପ୍ରଥା ପରମ୍ପରା, ଜଳ ଜଙ୍ଗଲ ଜମିର ସୁରକ୍ଷା କରି ଦେଶର ମୁଖ୍ୟ ଶ୍ରୋତରେ ସାମିଲ ହେବାକୁ ଆହ୍ୱାନ ଦେଇଥିଲେ | କେନ୍ଦ୍ର ସରକାର ସବୁବେଳେ ଆଦିବାସୀ ମାନଙ୍କ ଉପରେ ଷଡଯନ୍ତ୍ର କରୁଥିବାରୁ କେନ୍ଦ୍ର ସରକାର ବିରୋଧରେ ଦୁର୍ବାର ଆନ୍ଦୋଳନ କରିବା ପାଇଁ ଆହ୍ୱାନ ଦେଇଥିଲେ | ଆଜିର ନୁଆଁଖାଇ ଭେଟଘାଟ କାର୍ଯ୍ୟକ୍ରମ ରେ ସଂଘର ଇନ୍ଦ୍ରମଣି ମାଝୀ, ନିତ୍ୟାନନ୍ଦ ମାଝୀ, ଜଗନ୍ନାଥ ମାଝୀ, ଚକ୍ର ଯାନୀ, ମନୋରଞ୍ଜନ ଭୋଇ, ବନଳତା ମାଝୀ, ଚୂଡ଼ାମଣି ମାଝୀ, ବନସିଂ ପଧାନୀ, ପ୍ରଫୁଲ୍ଲ ପଧାନୀ, ସୁଶୀଲ ଭୋଇ,ପୃଥ୍ୱୀରାଜ ମାଝୀ, ଲକ୍ଷ୍ମଣ ମାଝୀ, ବିଭୀଷଣ ମାଝୀ, ପର୍ଶୁରାମ ମାଝୀ ପ୍ରମୁଖ ନେତୃବୃନ୍ଦ  ଉପସ୍ଥିତ ଥିବାବେଳେ ହଜାର ସଂଖ୍ୟାରେ ଆଦିବାସୀ ଭାଇ ଭଉଣୀ ଯୋଗଦେଇଥିଲେ  | ସଭାକୁ ସୁନୀଲ ମାଝୀ ପରିଚାଳନା କରିଥିଲେ |