17-Jun-2024

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲାର ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗ ରାଜ୍ୟମନ୍ତ୍ରୀମଣ୍ଡଳରେ ଏକ ଗୁରୁତ୍ୱପୂର୍ଣ୍ଣ କ୍ୟାବିନେଟମନ୍ତ୍ରୀ ପଦବୀ ପାଇଛନ୍ତି । ସ୍ୱାସ୍ଥ୍ୟ ଓ ପରିବାରକଲ୍ୟାଣ,ସଂସଦୀୟବ୍ୟାପର,ସୂଚନା ବୈଷୟିକମନ୍ତ୍ରୀ ପଦ ମିଳିବା ପରେ ସେ ପ୍ରଥମ କରି ବଲାଙ୍ଗୀର ଜିଲ୍ଲାକୁ ଗସ୍ତ କରିଛନ୍ତି । ଐହି ଅବସରରେ ତାଙ୍କୁ ତାଙ୍କ ନିର୍ବାଚନମଣ୍ଡଳି ତଥା ବଲାଙ୍ଗୀର ଜିଲ୍ଲାର ବିଭିନ୍ନ ଅନୁଷ୍ଠାନ ପକ୍ଷରୁ ଭବ୍ୟସ୍ୱାଗତ ସମ୍ବର୍ଦ୍ଧନା ଦିଆଯାଇଛି । ରବିବାର ଦିଇ ସେ ଅପରାହ୍ନ ୫ଟାରେ ତାଙ୍କ ନିଜନିର୍ବାଚନମଣ୍ଡଳିର ସୋନପୁର ଜିଲ୍ଲାର ସୀମାବର୍ତ୍ତିଗ୍ରାମ ବଇରାସରଠାରେ ଏଡଭୋକେଟ ରାଜେନ୍ଦ୍ର ସାହୁଙ୍କ ନେତୃତ୍ୱରେ ସ୍ଥାନୀୟଲୋକେ ମନ୍ତ୍ରୀଙ୍କୁ ସ୍ୱାଗତ କରିଥିଲେ । ବଇରାସର ଗ୍ରାମପଞ୍ଚାୟତଠାରେ ମନ୍ତ୍ରୀ ଏକ ବୃକ୍ଷରୋପଣ କରି ତାଙ୍କ ମନ୍ତ୍ରୀତ୍ୱ ସମୟର ଏକ ଚିହ୍ନ ଛାଡିଥିଲେ । ବଲାଙ୍ଗୀର ରେଞ୍ଜ ଅଫିସର ନବୀନକୁମାର ପଣ୍ଡା

ଏକ ଅଅଁଳା ଗଛ ନେଇ ମନ୍ତ୍ରୀଙ୍କ ହାତରେ ଲଗାଇଥିଲେ । ସେଠାରେ ସେ ବିଛୁପାଲିରେ ଥିବା ତପୋବନଆଶ୍ରମକୁ ଯାଇ ସ୍ୱାମୀଚିନ୍ମୟାନନ୍ଦ ସରସ୍ୱତୀଙ୍କୁ ଭେଟି ଆଶୀର୍ବାଦ ନେଇଥିଲେ । ବଇରାସରରୁ ବଲାଙ୍ଗୀର ପର୍ଯ୍ୟନ୍ତ ସାତମାଇଲଛକ,ବୁବେଲଛକ,ଗଇଁତଳା,ପୁଈଁତଳା ଇତ୍ୟାଦି ଗ୍ରାମରେ ମନ୍ତ୍ରୀଙ୍କୁ ସ୍ୱାଗତ କରିଥିଲେ । ବଲାଙ୍ଗୀର ସହରକୁ ପଶିବା ବେଳେ ସ୍ୱାସ୍ଥ୍ୟମନ୍ତ୍ରୀ ଡ.ମହାଲିଙ୍ଗ ଭୀମଭୋଇ ମେଡିକାଲ କଲେଜ ହସପିଟାଲକୁ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ । ମେଡିକାଲ କଲେଜର ଅଧିକ୍ଷିକା ଡ.ମାନସୀ ପଣ୍ଡା ମନ୍ତ୍ରୀଙ୍କୁ ହସପିଟାଲ ବୁଲାଇବା ସହିତ ସ୍ଥିତି ବିଷୟରେ ଅବଗତ କରିଥିଲେ । ହସପିଟାଲରେ ଯାହା ମଧ୍ୟ ସମସ୍ୟା ଅଛି ତାକୁ ସମାଧାନ କରାଯିବ ବୋଲି ମନ୍ତ୍ରୀ ପ୍ରତିଶୃତି ଦେଇଥିଲେ । ସେଠାରୁ ମନ୍ତ୍ରୀ ପାଟଣେଶ୍ୱରୀମନ୍ଦିର ଓ ସମଲେଶ୍ୱରୀମନ୍ଦିର ପହଞ୍ଚି ଦେବୀମାଁଙ୍କ ଦର୍ଶନ କରି ପୂଜାର୍ଚ୍ଚନା କରିଥିଲେ । ଏଠାରୁ ସେ ଗୋପାଳଜୀମନ୍ଦିରରୋଡରେ ଥିବା ଆରଏସଏସ କାର୍ଯ୍ୟାଳୟକୁ ପହଞ୍ଚି କର୍ମକର୍ତ୍ତାଙ୍କ ସହିତ ଆଲୋଚନା କରିଥିଲେ । ସ୍ଥାନୀୟ ସାମ୍ବାଦିକ ଭବନଠାରେ ଦୁଲଦୁଲୀ କଳାପରିଷଦ ପକ୍ଷରୁ ଆୟୋଜିତ ନାଗରିକ ସମ୍ବର୍ଦ୍ଧନା କାର୍ଯ୍ୟକ୍ରମରେ ଯୋଗଦେଇ ମନ୍ତ୍ରୀ କହିଲେ ଯେ,ଆମେ ଲୋକଙ୍କୁ ଯେଉଁ ପ୍ରତିଶୃତି ନିର୍ବାଚନ ପ୍ରତିଶୃତି ଦେଇଛୁ ତାକୁ ପୂରଣ କରିବୁ । ବିଜେପିଦଳ ଲୋକଙ୍କୁ ଯେଉଁ ପ୍ରତିଶୃତି ଦେଇଥିଲା ସେଥିରୁ କିଛି ମନ୍ତ୍ରୀ ପରିଷଦ ଗଠନ ହେବାର ୨୪ଘଣ୍ଟା ମଧ୍ୟରେ କାର୍ଯ୍ୟନ୍ୱୟନ କରାଯାଇଛି । ପୁରୀ ଶ୍ରୀମନ୍ଦିରରେ ଚାରିଦ୍ୱାର ଖୋଲାଯାଇଛି ,ଚାଷିଙ୍କ ଧାନର ମୁଲ୍ୟ ୩୧ଶହ ଟଙ୍କା କରିବା ପ୍ରକ୍ରିୟା ଆରମ୍ଭ  କରାଯାଇଛି । ବାକି ପ୍ରତିଶୃତିଗୁଡିକ ନିଶ୍ଚୟ ପୂରଣ ହେବ ବୋଲି କହିଥିଲେ । ଏଠାରେ ଦୁଲଦୁଲ କଳାପରିଷଦର ସଭାପତି ବାସୁଦେବ ସାଙ୍କ ସଭାପତିତ୍ୱ ଓ ସଂଦୀପ କୁଅଁରଙ୍କ ସଂଯୋଜନାରେ ଅନୁଷ୍ଠିତ ସଭାରେ ଗୁରୁଶ୍ରୀ ଡ.ଘାସିରାମ ମିଶ୍ର,ଶଶିଭୂଷଣ ଶତପଥି,ଡ.ଲଲିତ ସାହୁ,ନାଟ୍ୟଶ୍ରୀ ଗଦାଧର ବାରିକଙ୍କ ସହ ବଲାଙ୍ଗୀର ବରିଷ୍ଠନାଗରିକ ମଞ୍ଚ,ରାଜ୍ୟ ଆଉଟସୋର୍ସିଂ କର୍ମଚାରୀ ମହାସଂଘ,ଆୟୁର୍ବେଦିକ ଡାକ୍ତର ମହାସଂଘ,ହସପିଟାଲ କର୍ମଚାରୀ ମହାସଂଘ ସମେତ ଶତାଧିକ ସଂଗଠନ ମନ୍ତ୍ରୀଙ୍କୁ ସମ୍ବର୍ଦ୍ଧିତ କରିଥିଲେ । ସେହିପରି ବଲାଙ୍ଗୀର ସର୍କିଟ ହାଉସଠାରେ ବଲାଙ୍ଗୀର ଜିଲ୍ଲାପ୍ରଶାସନ ପକ୍ଷରୁ ଅତିରିକ୍ତ ଜିଲ୍ଲାପାଳ ଡ.ବିଜୟ ସେଠୀ,ଏସପି ଋଷିକେଶ ଖିଲାରୀଙ୍କ ନେତୃତ୍ୱରେ ମନ୍ତ୍ରୀଙ୍କୁ ସ୍ୱାଗତ କରାଯାଇଥିଲା । ସେହିପରି ଅହୁରି ଶତାଧିକ ସଂଗଠନର କର୍ମଚାରୀସଂଘମାନେ ମନ୍ତ୍ରୀଙ୍କୁ ଭେଟି ସମ୍ବର୍ଦ୍ଧିତ କରିବା ସହିତ ନିଜ ନିଜ ସଂଗଠନର ଦାବିପତ୍ର ପ୍ରଦାନ କରିଥିଲେ । ତେବେ ସବୁଠୁ ନିଆରା ଥିଲା ବିଧାୟକ ଥିବା ସମୟରେ ସାଙ୍ଗମାନଙ୍କ

ସହ ଯେଉଁ ଚାଖଟିରେ ଡ.ମହାଲିଙ୍କ ବସୁଥିଲେ ଏବେ କ୍ୟାବିନେଟ ମନ୍ତ୍ରୀ ହେଲାପରେ ସର୍କିଟ ହାଉସରାସ୍ତାର ସେରସୁଆଁଗୁଡି କମିଟିଠାରେ ଅଟକି ସାଙ୍ଗମାନଙ୍କ ସାଙ୍ଗରେ ଚା ପିଇଥିଲେ ଓ ବିଭିନ୍ନ ପ୍ରସଙ୍ଗରେ ଆଲୋଚନା କରିଥିଲେ । ଭାଜପା ଦଳ ପକ୍ଷରୁ ବଲାଙ୍ଗୀର ବିଧାୟକ ପ୍ରାର୍ଥି ଗୋପାଳଜୀ ପାଣିଗ୍ରାହୀ,ପିତାମ୍ବର ଖମାରୀ,ଶ୍ରୀକର ପଧାନ,ମହିଳା ମୋର୍ଚ୍ଚାର ପଙ୍କଜିନୀ ପଣ୍ଡା,ରଶ୍ମୀରେଖା ଦାନୀ,ଅନୀତା ମିଶ୍ର ପ୍ରମୁଖ ମନ୍ତ୍ରୀଙ୍କୁ ସ୍ୱାଗତ କରିଥିଲେ । ସାମ୍ବାଦିକ ଭବନଠାରେ ସୋନପୁର ଜିଲ୍ଲାର ପୂର୍ବତନ ସଭାପତି ବଳଦେବପ୍ରସାଦ ବେଦବାକ,ପୂର୍ବତନ ଯୁବମୋର୍ଚ୍ଚା ସଭାପତି ବେଣୀମାଧବ ବେଦବାକ,ବାପି ପ୍ରମୁଖ ମନ୍ତ୍ରୀଙ୍କୁ ସ୍ୱାଗତ କରିଥିଲେ ।