08-Dec-2023

ବଲାଙ୍ଗୀର(ପ୍ରେରଣା ଖବର ):  ସ୍ୱାଧୀନତା ପର ଠାରୁ ସମସ୍ତ ବିକାଶମୂଳକ କାର୍ଯ୍ୟ କ୍ଷେତ୍ରରେ ଉଦ୍ଦେଶ୍ୟମୂଳକ ଭାବରେ ବଲାଙ୍ଗୀର ଜିଲ୍ଲା ଆଂଚଳିକ ବୈଷମ୍ୟର ଶୀକାର ହେଉଛି ବୋଲି ବଲାଙ୍ଗୀର ନାଗରିକ କମିଟି ତୀବ୍ର ପ୍ରତିକ୍ରିୟା ପ୍ରକାଶ କରିଛି ।

ଜିଲ୍ଲାର ଶିକ୍ଷା, ସ୍ୱାସ୍ଥ୍ୟ, କୃଷି, ଗମନାଗମନ ତଥା ଶିଳ୍ପ କ୍ଷେତ୍ରରେ ମଧ୍ୟ ସରକାର ଘୋର ପାତରଅନ୍ତର ନୀତି ଅବଲମ୍ବନ କରି ବଲାଙ୍ଗୀରକୁ ଅଣଦେଖା କରୁଥୁବା ଅଭିଯୋଗ ହେଉଛି । ଇତି ମଧ୍ୟରେ ରାଜ୍ୟ ସରକାର ୧୯ଟି ବିଭିନ୍ନ ଉନ୍ନତିମୂଳକ ପ୍ରକଳ୍ପକୁ ସିଙ୍ଗଲ ୱିଣ୍ଡୋ  ଅନୁମୋଦନ ଦେଇଥିବା ବେଳେ ବଲାଙ୍ଗୀର ଜିଲ୍ଲାକୁ ଗୋଟିଏ ମଧ୍ୟ ପ୍ରକଳ୍ପକୁ ମଂଜୁରି ଦେଇ ନାହାନ୍ତି । ବଲାଙ୍ଗୀର ଜିଲ୍ଲାରେ ୭୧ହଜାର ହେକ୍ଟର ଜମିରେ କପା ଚାଷ ହେଉଛି । ସେହିପରି ପଡୋଶୀ ଜିଲ୍ଲା କଳାହାଣ୍ଡି, କୋରାପୁଟ ଓ ସୋନପୁର ଜିଲ୍ଲାରେ ମଧ୍ୟ ଅଧିକ ଉକୃଷ୍ଟ ମାନର କପା ଉତ୍ପାଦାନ ହେଉଛି । ବାରମ୍ବାର ଦାବି ସତ୍ୱେ ବଲାଙ୍ଗୀରରେ ଲୁଗା କଳ ସ୍ଥାପନ ବଦଳରେ କେନ୍ଦ୍ରପଡା ଠାରେ ଏହି ପ୍ରକଳ୍ପ ଖୋଲିବା ପାଇଁ ଓ ଚୌଦ୍ୱାର ଲୁଗା କଳାକୁ ପୁନଃକାର୍ଯ୍ୟକ୍ଷମ କରିବା ପାଇଁ ସରକାର ନିଷ୍ପତ୍ତି ନେଇଛନ୍ତି । ପୂର୍ବରୁ ବଲାଙ୍ଗୀରରେ ଲୁଗା କାରଖାନା ପ୍ରତିଷ୍ଠା ପାଇଁ ନାଗରିକ କମିଟି ବାରମ୍ବାର ମୁଖ୍ୟମନ୍ତ୍ରୀ, ବିଭାଗୀୟ ମନ୍ତ୍ରୀ, ୫-ଟି ସଚିବ, ବିଧାୟକ ଓ ସାଂସଦ ମାନଙ୍କ ଦୃଷ୍ଟି ଆକର୍ଷଣ କରି ଆସିଛି । ଏ ଅଂଚଳରୁ  ପ୍ରତିବର୍ଷ ଉକୃଷ୍ଟ ମାନର ପ୍ରାୟ ୫ଲକ୍ଷ ବେଲ୍‌ସ ରୁ ଉର୍ଦ୍ଧ୍ୱ କପା ଅମଳ ହେଉଥିବା ବେଳେ ଅନ୍ୟ ଦୂର ସ୍ଥାନରେ କାରଖାନା ପ୍ରତିଷ୍ଠା ନିଷ୍ପତ୍ତି   ବ୍ରିଟିଶ ସରକାରଙ୍କ ନୀତି ଅବଲମ୍ବନ ସଦୃଶ  ବୋଲି ନାଗରିକ କମିଟି କହିଛି । ଏ ଅଂଚଳରେ ଏକ କଟନ୍ କରିଡର୍ ସହ ମାର୍କେଟିଙ୍ଗ ବ୍ୟବସ୍ଥା କଲେ ଏଠାକାର  ଦାଦନ ସମସ୍ୟାକୁ କିଛିକାଂଶରେ ରୋକାଯାଇ ପାରନ୍ତା । ନାଗରିକ କମିଟି ତରଫରୁ ବାରମ୍ବାର କୃଷିଭିତ୍ତିକ କାରଖାନା ଯଥା ଦେଓଗାଁ ଚିନିକଳକୁ ପୁନଃ କାର୍ଯ୍ୟକ୍ଷମ କରିବା, ସୁତା କଳ, କପାର ଖୋଲା ବଜାର ବ୍ୟବସ୍ଥା, ବଲାଙ୍ଗୀରରେ ସରକାରଙ୍କ ପ୍ରସ୍ତାବିତ ଦ୍ୱିତୀୟ କୃଷି ବିଶ୍ୱବିଦ୍ୟାଳୟ ସ୍ଥାପନ ଦାବି ବିଭିନ୍ନ ପ୍ରସଙ୍ଗକୁ ନେଇ ନାଗରିକ କମିଟି ଆନ୍ଦୋଳନ କରି ଆସିଛି । ଏହିପରି ଭାବରେ ରାଜ୍ୟ ସରକାର ଏପରି ପାତରଅନ୍ତର ନୀତି ଅବଲମ୍ବନ କଲେ ବଲାଙ୍ଗୀର ନାଗରିକ କମିଟି ଆଗାମୀ ଦିନରେ ଆନ୍ଦୋଳନାତ୍ମକ ପନ୍ଥା ଅବଲମ୍ବନ କରିବ ବୋଲି କମିଟିର ସଭାପତି ଇଂ. ବେଲାରସିଂ ଭୋଇ ଓ ସଂପାଦକ ମନୋରଂଜନ ସାହୁ ଏକ ମିଳିତ ପ୍ରେସ ବିବୃତିରେ ଚେତାବନୀ ଦେଇଛନ୍ତି ।