28-Mar-2023

କଣ୍ଟାମାଳ, (ପ୍ରେରଣା ଖବର)
ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ ଅନ୍ତର୍ଗତ ଦପଲା  ପଞ୍ଚାୟତ ରାଜୀବ ଭବନ ପରିସରରେ ବୌଦ୍ଧ ଜିଲ୍ଲାପାଳ ଓ ଜିଲ୍ଲା ଆରକ୍ଷୀ ଅଧିକ୍ଷକଙ୍କ ଯୁଗ୍ମ ଜନ ଶୁଣାଣୀ ଓ ସମାଧାନ ଶିବିର ଅନୁଷ୍ଠିତ ହୋଇଯାଇଛି ।ଏହି ଶିବିରରେ ଜିଲ୍ଲାପାଳ ସତ୍ୟରଞ୍ଜନ ସାହୁ, ଡି ଏସ ପି ସାଲେଷ୍ଟାଇନ ଟିଗା , ଜିଲ୍ଲା ପରିଷଦ ନିର୍ବାହୀ ଅଧିକାରୀ ଅଶ୍ୱିନୀ କୁମାର ମେହେର, ଉପଜିଲ୍ଲାପାଳ ରବିନ୍ଦ୍ରନାଥ କହଁର, ଜିଲ୍ଲା ପରିଷଦ ଉପାଧ୍ୟକ୍ଷ ଶଙ୍କର୍ଷଣ ପ୍ରଧାନ,  ବିଡ଼ିଓ କଳାକୃଷ୍ଣ ପ୍ରଧାନ, ତହସିଲଦାର କର୍ଣ୍ଣ ମଲ୍ଲିକ ,  ଜିଲ୍ଲା ସାମାଜିକ ସୁରକ୍ଷା ଅଧିକାରୀ ସୁଧାଂଶୁ ଶେଖର ପୁଜାହାରୀ, ଜିଲ୍ଲା ଶିଶୁ ସୁରକ୍ଷା ଅଧିକାରୀ ରାହୁଲ ପ୍ରଧାନ, ଜିଲ୍ଲା ମୁଖ୍ୟ ଚିକିତ୍ସାଧିକାରୀ, ଜିଲ୍ଲା ଯୋଗଣ ଅଧିକାରୀଙ୍କ ସମେତ ଜିଲ୍ଲା ଓ ବ୍ଲକ ସ୍ତରୀୟ ଅଧିକାରୀ ମାନେ ଯୋଗଦାନ କରି ଲୋକମାନଙ୍କ ଆପତ୍ତି ଅଭିଯୋଗ  ଶୁଣିଥିଲେ । ଦପଲା ପଞ୍ଚାୟତ ସରପଞ୍ଚ , ପଞ୍ଚାୟତ ନିର୍ବାହୀ ଅଧିକାରୀ ଶ୍ରୀକାନ୍ତ ପ୍ରଧାନ, ଗ୍ରାମ ରୋଜଗାର ସେବକ ଙ୍କ ସହ ପଞ୍ଚାୟତର ସମସ୍ତ କର୍ମଚାରୀ ଶିବିର ପରିଚାଳନାରେ ସହଯୋଗ କରିଥିଲେ ।ଏହି ଶିବିରରେ ସମୁଦାୟ ୧୦୬ଟି ମାମଲା ପଞ୍ଜୀକୃତ ହୋଇଥିବା ବେଳେ ୧୦୧ ଟି ବ୍ୟକ୍ତିଗତ ଓ ୫ଟି ମାମଲା ସାମୁହିକ ମାମଲା ପଞ୍ଜୀକୃତ ହୋଇଥିଲା ।୬୭ ଗୋଟି ମାମଲାର ତ୍ୱରିତ ସମାଧାନ କରାଯାଇଥିବା ବେଳେ ୨୬ଜଣଙ୍କୁ ମୁଖ୍ୟମନ୍ତ୍ରୀ ରିଲିଫ ପାଣ୍ଠିରୁ ମୋଟ ୨ଲକ୍ଷ ୪୫ ହଜାର ଟଙ୍କା ଓ ୧୩ଜଣଙ୍କୁ ରେଡକ୍ରସ ପାଣ୍ଠିରୁ ମୋଟ ୭୦ହଜାର ଟଙ୍କା ଆର୍ଥିକ ସହାୟତା ପ୍ରଦାନ କରାଯାଇଥିଲା । ୫ଜଣଙ୍କୁ ତିନି ଚକିଆ ସାଇକେଲ, ୫ଜଣଙ୍କୁ ହ୍ବିଲ ଚେୟାର ଓ ୨ଜଣକୁ ସିପି ଚେୟାର ପ୍ରଦାନ କରାଯାଇଥିଲା ।ସେହିଭଳି ୩ ଜଣକୁ  ବିଧବା , ଜଣକୁ ବିକଳାଙ୍ଗ ଓ ୩ଜଣକୁ ବାର୍ଦ୍ଧକ୍ୟ ଭତ୍ତା ପ୍ରଦାନ କରାଯାଇଥିବା ସୂଚନା ମିଳିଛି । ଏହି ଅବସରରେ ଜିଲ୍ଲାପାଳ ଶ୍ରୀଯୁକ୍ତ ସାହୁ ଦପଲା ଓ  ଶୁଣ୍ଢିପଦର୍ ଉଚ୍ଚବିଦ୍ୟାଳୟ ପରିଦର୍ଶନ କରି ନିର୍ମାଣ କାର୍ଯ୍ୟର ମାନ ଓ ମନ୍ଥରତା ନେଇ ଅସନ୍ତୋଷ ପ୍ରକାଶ କରିଥିଲେ ଏବଂ କାର୍ଯ୍ୟରେ ସ୍ବଚ୍ଛତା ସହ ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଇଥିଲେ । ପରେ ପଦରପଡ଼ାର ଅରବିନ୍ଦ ବିଦ୍ୟାଳୟ ପରିଦର୍ଶନ କରି ସେଠାରେ ଏକ ସ୍ବାସ୍ଥ୍ୟ ଶିବିର ଆୟୋଜନ କରିବାକୁ ପରାମର୍ଶ ଦେଇଥିଲେ । ସେଠାରୁ ଖଇରମାଲ, ଜୁନାନି,ଦମାମୁଣ୍ଡା, ଘୁଲଘୁଲାପଦର୍ ଓ ଦେଉଳି ବିଦ୍ୟାଳୟ ପରିଦର୍ଶନ କରି ମରାମତି କାର୍ଯ୍ୟ ତୁରନ୍ତ କରିବା ସହିତ ବିଦ୍ୟାଳୟ ପରିବେଶ ସ୍ବଚ୍ଛତା ଓ ପରିଷ୍କାର ପରିଚ୍ଛନ୍ନତା ରଖିବାକୁ ପରାମର୍ଶ ଦେଇଥିଲେ । ପରେ ଜିଲ୍ଲାପାଳ ଶ୍ରୀଯୁକ୍ତ ସାହୁ ବାଉଁଶୁଣି ର ସ୍ବେଚ୍ଛାସେବୀ ସଂସ୍ଥା ୱାଇ ସି ଡ଼ି ଏ ପରିଦର୍ଶନ କରିଥିଲେ ।