05-Dec-2020

ବଲାଙ୍ଗୀର/ସଇଁତଳା,-ସାରା ରାଜ୍ୟରେ ଉପାନ୍ତ ଅଞ୍ଚଳରେ ସ୍ୱାସ୍ଥ୍ୟସେବା ଅପହଞ୍ଚ ହେଉଥିବା ବିଭିନ୍ନ ସମୟରେ ଅଭିଯୋଗ ହେଉଛି । ସେପଟେ ସରକାର ଜାତୀୟ ସ୍ୱାସ୍ଥ୍ୟମିଶନ ଯୋଜନାରେ କୋଟି କୋଟି ଟଙ୍କା ଖର୍ଚ୍ଚକରୁଛନ୍ତି । କିନ୍ତୁ ଲୋକଙ୍କୁ ଆବଶ୍ୟକ ତଥା ଉଚିତ ସମୟରେ ଚିକିତ୍ସା ସୁବିଧା ମିଳୁନାହିଁ । ଜାତୀୟ ସ୍ୱାସ୍ଥ୍ୟମିଶନର ଟଙ୍କା ଅପବ୍ୟବହାର କରାଯାଇ ବ୍ୟାପକ ବାଟମାରଣା କରାଯାଉଛି । ସ୍ୱାସ୍ଥ୍ୟସେବାର ଭିତ୍ତିଭୂମୀ ପାଇଁ ଲକ୍ଷାଧିକ ଟଙ୍କାର ବିଲ୍ଡିଂଗୁଡିକ ନିର୍ମାଣ ହେଉଛି କିନ୍ତୁ ତାହାର ସଠିକ ଉପେଯାଗ ହୋଇପାରୁନାହିଁ । ଏଭଳି ଏକ ଦୃଷ୍ଟାନ୍ତ ହେଉଛି ସଇଁତଳା ବ୍ଲକର କନ୍ଧକେଲଗାଁର ସ୍ୱାସ୍ଥ୍ୟକେନ୍ଦ୍ର । ସଇଁତଳାଠାରୁ ୧୨କିମି ଦୁରରେ ଥିବା ଏହି କନ୍ଧକେଲଗାଁ ପଞ୍ଚାୟତ କାର୍ଯ୍ୟାଳୟର ସଦରମହକୁମାରେ ଏକ ସ୍ୱାସ୍ଥ୍ୟଉପକେନ୍ଦ୍ର ନିମା କରିବାକୁ ୨୦୧୬ରେ ସରକାର ନିସ୍ପତ୍ତି ନେଇଥିଲେ । ସଇଁତଳା ସିଏଚସି ଅଧିନରେ ଏହାକୁ ପରିଚାଳିତ କରିବାକୁ ପ୍ରସ୍ତାବ କରାଯାଇଥିଲା । ସେହି କ୍ରମରେ ହସପିଟାଲ ବିଲ୍ଡିଂ,ଡଙ୍ର ଓ ଷ୍ଟାଫ କ୍ୱାର୍ଟର ନିର୍ମାଣ ପାଇଁ ଅନୁଦାନ ଆସିଲା । କନ୍ଧକେଲଗାଁ ପତ୍ରଫଡି ପାଖରେ ଜମିଚିହ୍ନଟ ହୋଇ ବିଲ୍ଡିଂ ନିର୍ମାଣ ହେଲା । ଏଠାରେ ଗୋଟିଏ ହସପିଟାଲ ଘର,ଡାକ୍ତରଙ୍କ କ୍ୱାର୍ଟର,ଏଏନଏମ କ୍ୱାଟଙର ଓ ଅନ୍ୟାନ୍ୟ କର୍ମଚାରୀଙ୍କ ପାଇଁ କ୍ୱାର୍ଟର ନିର୍ମାଣ ହେଲା । ବିଲଡିଂଟି ସୁନ୍ଦର ଆକାରରେ ମାର୍ବଲ ଖଚିତ ହୋଇ ନିର୍ମାଣ ହେଲା ଓ ଗତ ୨୦୧୮ ମସିହାରେ ଉଦଘାଟନ ମଧ୍ୟ ହେଲା । ଗତ ୨୩.୧.୨୦୧୮ରେ ତତକାଳିନ ଖାଦ୍ୟ ଯୋଗାଣ,ଖାଉଟିକଲ୍ୟାଣ ଓ ସମବାୟମନ୍ତ୍ରୀ ସୂର୍ଯ୍ୟନାରାୟଣ ପାତ୍ର ମୁଖ୍ୟଅତିଥି ଭାବରେ ଯୋଗଦେଇ ତତକାଳିନ ସାଂସଦ କଳିକେଶନାରାୟଣ ସିଂଦେଓ,ଟିଟିଲାଗଡ ବିଧାୟୀକା ଟୁକୁନୀ ସାହୁ,ଜିଲ୍ଲାପରିଷଦ ସଦସ୍ୟା ସରୋଜିନି ସାହୁ,ସରପଞ୍ଚ ଭାରତୀ ପଣ୍ଡା ଓ ସଇଁତଳା ବିଡିଓ ଡା.ସୁଧା ବାର୍ଲାଙ୍କ ଉପସ୍ଥିତିରେ ଏହାର ଶୁଭଉଦଘାଟନ କରିଥିଲେ । କିନ୍ତୁ ପରବର୍ତ୍ତି ପର୍ଯ୍ୟାୟରେ ସରକାରୀ ନିସ୍ପତ୍ତି ବଦଳି ଗଲା । ରାଜନୀତିକରି କନ୍ଧକେଲଗାଁର ନିକଟବର୍ତ୍ତି ବୁଡାବାହାଲକୁ ଏହି ହସପିଟାଲ ଉଠାଇ ନିଆଗଲା । ସେଠାରେ ପୁଣି ନୂଆ ବିଲ୍ଡିଂ ତିଆରି କରି ହସପିଟାଲ ସ୍ଥାପନ କରାଗଲା । କୁଆଡେ ତତକାଳିନ ସାଂସଦ କଳିକେଶନାରାୟଣ ସିଂଦେଓ ବୁଡାବାହାଲ ଗାଁକୁ ଆଦର୍ଶଗ୍ରାମ ଭାବରେ ଘୋଷଣା କଲେ ଓ କନ୍ଧକେଲଗାଁର ହସପିଟାଲକୁ ସେଠିକି ଉଠାଇ ନେଲେ ବୋଲି ଅଭିଯୋଗ ହେଉଛି ।

ସେହିଦିନଠାରୁ କନ୍ଧକେଲଗାଁର ହସପିଟାଲ ବିଲ୍ଡିଂ ଭୁତକୋଠି ହୋଇ ପଡିରହିଛି । ଏବେ ଗତ କିଛିଦିନ ହେଲା ସେହି ବିଲ୍ଡିଂର ଝରକା,କବାଟ ସବୁ ଚୋରି ହୋଇଗଲାଣି । ସ୍ୱାସ୍ଥ୍ୟ ବିଭାଗ ଚାହିଁଥିଲେ ଏହି ବିଲ୍ଡିଂକୁ କୌଣସି ବ୍ୟବହାରରେ ଲଗାଇ ପାରନ୍ତେ । କିନ୍ତୁ ତାହା କରାଯାଇ ନାହିଁ । ବିଲ୍ଡିଂଟି ଗତ ଦୁଇବର୍ଷ ହେଲା  ଭୁତକୋଠି ହୋଇ ପଡିରହିଛି । ଫଳରେ କନ୍ଧକେଲଗାଁ ପଞ୍ଚାୟତବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି । ସ୍ୱାସ୍ଥ୍ୟବିଭାଗର ଏଭଳି ଅବ୍ୟବସ୍ଥାକୁ ନେଇ ବଲାଙ୍ଗୀର ସିଡିଏମଓ ଡ.ଭୀମ ସାହୁଙ୍କୁ ପଚାରିବାରୁ ସେ ବିଷୟରେ ସେ ଜାଣିନାହାଁନ୍ତି । ସେ ସେ ବିଷୟରେ ପଚାରିବେ ଓ କହିବେ ବୋଲି କହିଛନ୍ତି । ଜିଲ୍ଲାପାଳ ତୁରନ୍ତ ଏଦିଗରେ ପଦକ୍ଷେପ ନେବାକୁ ଦାବି ହେଉଛି ।