28-Jul-2022

ବଲାଙ୍ଗୀର(ଅନ୍ତର୍ଯ୍ୟାମୀ ସାହୁ): ବଲାଙ୍ଗୀର ସରକାରୀ ମହାବିଦ୍ୟାଳୟର ଛାତ୍ରୀ ନିବାସରେ ଦେଖାଯାଇଥିବା ଅବ୍ୟବସ୍ଥା ଓ ଏଠାରେ ନିୟୋଜିତ କର୍ମଚାରୀ ଙ୍କ ଅସନ୍ତୋଷ ବଢ଼ିବାରେ ଲାଗିଛି । ଛାତ୍ରୀ ନିବାସ ର ପରିଚାଳନା ପାଇଁ ନିୟୋଜିତ କର୍ମାଚରୀ ମାନଙ୍କ ବିଭିନ୍ନ ଦାବି ପୂରଣ ପାଇଁ ଏମାନେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି । ତେବେ ଛାତ୍ରୀ ନିବାସରେ ଦେଖାଦେଇଥିବା ଅଚଳାବସ୍ଥାର ଶୀଘ୍ର ସମାଧାନ ପାଇଁ ଆଜି ବଲାଙ୍ଗୀର ନାଗରିକ କମିଟିର ଏକ ପ୍ରତିନିଧି ଦଳ ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟକୁ ଯାଇ କଲେଜର ଅଧ୍ୟକ୍ଷ ମନୋରଂଜନ ମିଶ୍ରଙ୍କ ସହ ଆଲୋଚନା କରିଛନ୍ତି । ସୂଚନାରୁ ପ୍ରକାଶ ଯେ ଏହି ବଲାଙ୍ଗୀର ସରକାରୀ ମହିଳା ମହାବିଦ୍ୟାଳୟର ଛାତ୍ରୀ ନିବାସରେ ୨ଠଠ ଜଣ ଛାତ୍ରୀ ରହୁଥିବା ବେଳେ ଏମାନଙ୍କ ପାଇଁ ୧୨ ଜଣ କର୍ମଚାରୀ ରହିଛନ୍ତି । ଏହି କର୍ମାଚରୀ ମାନଙ୍କ ଦରମା ବୃଦ୍ଧି ଓ ଅନ୍ୟାନ୍ୟ ଆନୁସଙ୍ଗିକ ବ୍ୟବସ୍ଥା କରିବା ପାଇଁ କଲେଜ କର୍ତ୍ତପକ୍ଷ ଙ୍କୁ ଅନୁରୋଧ କରାଯାଇଥିଲେ ମଧ୍ୟ କୌଣସି ସୁଫଳ ମିଳି ନାହିଁ । ଆଜି ବଲାଙ୍ଗୀର ନାଗରିକ କମିଟିର ସଭାପତି ବେଲାର ସିଂ ଭୋଇ ଓ ସାଧାରଣ ସଂପାଦକ ମନୋରଞ୍ଜନ ସାହୁଙ୍କ ନେତୃତ୍ୱରେ ଏକ ଟିମ୍ ବଲାଙ୍ଗଗୀର ମହିଳା ବିଦ୍ୟାଳୟ ହଷ୍ଟେଲର ପରିଚାଳନାଗତ ସମସ୍ୟାର ସମାଧାନ ପାଇଁ ଅଧ୍ୟକ୍ଷ ଶ୍ରୀ ମିଶ୍ରଙ୍କୁ ଅନୁରୋଧ କରିଥିଲେ । ଆଲୋଚନାରେ ନାଗରିକ କମିଟିର ଅଶୋକ କୁମାର ମିଶ୍ର, ଏଡ୍‌ଭୋକେଟ ଜୟରାମ ମିଶ୍ର ପ୍ରମୁଖ ସାମିଲ ହୋଇଥିଲେ ।