15-Nov-2020

ନର୍ଲା, (ସଞ୍ଜୀବ ଦାସ) - କଳାହାଣ୍ଡି ଜିଲ୍ଲା ନର୍ଲା ବ୍ଲକ ଗିଗିନା ଗ୍ରାମ ପଞ୍ଚାୟତ ଅଧୀନସ୍ଥ ଶ୍ରୀପୁର ଗ୍ରାମ ନିକଟରେ ପ୍ରବାହିତ ସାନ୍ଦୁଲ୍ ନଦୀ କୂଳରେ ଥିବା ନୀଳଗିରି ଜଙ୍ଗଳକୁ ଶନିବାର ରାତିରେ ଦୁଇଟି ଜଙ୍ଗଲି ହାତୀ ଆସି ରହିଥିବା ସ୍ଥାନୀୟ ଲୋକେ ରବିବାର ଦିନ ସକାଳେ ଦେଖିବାକୁ ପାଇଥିଲେ । ଏହି ଘଟଣା ଜଣାପଡିବା ପରେ ନୀଳଗିରି ଜଙ୍ଗଲକୁ ହାତୀ ଦେଖିବା ପାଇଁ ଲୋକଙ୍କ ସୁଅ ଛୁଟିବାରେ ଲାଗିଛି । ଶ୍ରୀପୁର ଗ୍ରାମ ସମେତ ନଦୀକୂଳରେ ଥିବା ରାକ୍ସି ଓ ଲମସିଂହା ଗ୍ରାମର ଶହଶହ ଲୋକ ନଦୀର ଉଭୟ ପାର୍ଶ୍ୱରେ ରହି ହାତୀ ଦେଖୁଛନ୍ତି,  ଫଳରେ ଲୋକଙ୍କ ହୋହଲ୍ଲା ଓ ଫୋଟକା ଫୁଟାଇବାରୁ ହାତୀ ଦୁଇଟି ଏପଟେ ସେପଟେ ଧାଁ ଦୌଡ କରି ଲୋକଙ୍କୁ ଆକ୍ରମଣ ପାଇଁ ମଧ୍ୟ ଦୌଡାଇଥିବା ଦେଖିବାକୁ ମିଳିଥିଲା । ଶ୍ରୀପୁର ଗ୍ରାମର ଆଲୋକ ବାଗଙ୍କୁ ହାତୀ ଦୌଡାଉଥିବା ବେଳେ ସାହଶର ସହ ବେଗ ସାହୁ ତାଙ୍କୁ ଉଦ୍ଧାର କରିଥିଲେ। ନଦୀ କୂଳରେ ଥିବା ଉପେନ୍ଦ୍ର ଭୋଇଙ୍କ ନୀଳଗିରୀ ଗଛ, ଭାଗିରଥି ପଧାନଙ୍କ ହରଡ ଚାଷ, କିର୍ତ୍ତନ ପଧାନଙ୍କ ଆମ୍ୱଗଛ ଓ ଅନେକ ଜମିରେ ବୁଣା ଯାଇଥିବା ମୁଗଗଜା ନଷ୍ଟ୍ ହୋଇଥିବା ଦେଖିବାକୁ ମିଳିଛି । ଏବାବଦରେ ଜଙ୍ଗଲ ବିଭାଗ ଓ ପଲମ ପୋଲିସ ଖବର ପାଇବା ପରେ ଘଟଣାସ୍ଥଳରେ ପହଞ୍ଚି ଲୋକଙ୍କୁ ଘଉଡାଇବା ସହ ହାତୀ ଉପରେ ନଜର ରଖିଛନ୍ତି । ମ.ରାମପୁର ରେଞ୍ଜର କେଶବ ମାଝୀ, ଫରେଷ୍ଟର ଦୀପକ ସା, ନର୍ଲା ଫରେଷ୍ଟର ଭବାନୀ ନାଏକ, ରୁପ୍ରାରୋଡ ଫରେଷ୍ଟର ଯୁଧିଷ୍ଠିର ଜାଲ, କଶୃପଡା ଫରେଷ୍ଟର ଯଶୋବନ୍ତ ନାଏକ, କର୍ମଚାରୀ ତପନ ବେହେରା, ନିଗମ ସାହୁ, ଫକୀର ବିଶ୍ୱାଲ ଓ ପଲମ ଫାଣ୍ଡି ଅଧିକାରୀ ଅସିତ ପଣ୍ଡା ଓ ବଜରଗଡ ଜଙ୍ଗଲ କମିଟି ସଭାପତି ଲକ୍ଷ୍ମଣ ଭୋଇ ପ୍ରମୁଖ ଜଗି ରହିଛନ୍ତି । କ୍ଷୟକ୍ଷତି ହୋଇଥିବା ଚାଷୀ ମାନଙ୍କୁ କ୍ଷତିପୁରଣ  ଯୋଗାଇ ଦେବାକୁ ଚାଷୀମାନେ ଦାବୀ କରିଛନ୍ତି ।