29-Nov-2025

ବିନିକା(ହିମାଂଶୁ ଶେଖର ପୁଟେଲ)ବିନିକା ବ୍ଲକ ଅନ୍ତର୍ଗତ ଫୁଲମୁଠି ବ୍ରଜବିହାରି ନୃତ୍ୟ କଳା ପରିଷଦ ତରଫରୁ ଚାଲିଥିବା ଗୋକୁଳାଷ୍ଟମୀ ମହୋତ୍ସବର ଶନିବାର ପଞ୍ଚମ ଦିବସରେ ଗୋପପୁରେ ନଟଖଟିଆ କୃଷ୍ଣ ଗୋପାଳ ପୁଅଙ୍କ ସହିତ ଲୁଚି ଛପି ବିଭିନ୍ନ ଘରକୁ ଯାଇ ଲହୁଣୀ ଚୋରୀ କରି ଖାଇବା,ଖେଳକୁଦରେ ମଜ୍ଜି ରହିବା,ମାଁ ଯଶୋଦାଙ୍କୁ ଧରାଛୁଁଆ ନଦେବା ଆଦି କଳାକାର ମାନଙ୍କ ଦ୍ଵାରା ମଞ୍ଚସ୍ଥ ଦୃଶ୍ୟ ଗୁଡିକ ଅତି ମନୋହର ଥିଲା ।ସେପଟେ ମଥୁରାଧିପତି ମହାରାଜ କଂସ ତାଙ୍କ ସୈନ୍ୟ ସାମନ୍ତଙ୍କ ସହିତ ଏକ ରଥରେ ଦରବାରକୁ ଆସିଥିଲେ ।ଦେବକୀର ଅଷ୍ଟମ ଗର୍ଭ ସନ୍ତାନ ହାତରେ କଂସର ମୃତ୍ୟୁ ଲେଖା ଅଛି ଭାବି କଂସ ଅତ୍ୟନ୍ତ ବିଚଳିତ ହୋଇପଡ଼ିଥିଲେ । ଡଗର ଠାରୁ ପୂତୁନା ରାକ୍ଷାସୁଣୀ ବଧ ଖବର ପାଇବା ପରେ ମର୍ମାହତ କଂସ ମନ୍ତ୍ରୀଙ୍କ ପରାମର୍ଶ କ୍ରମେ ଦୁଗ୍ଧ ପିଆ ଶିଶୁକୁ ମାରିବା ପାଇଁ ବକାସୁର ରାକ୍ଷସକୁ ପ୍ରେରଣ କରିଥିଲେ।ହେଲେ ଦଇବ ସାହା ହେଲାନାହିଁ ।ପ୍ରଭୁ ଶ୍ରୀକୃଷ୍ଣ ଵକାସୁର ସହିତ ଯୁଦ୍ଧ କରି ତାକୁ ନିଧନ କରିଥିଲେ ଆଦି ଅନେକ ଦୃଶ୍ୟ ଉଭୟ ଗୋପପୁର ଓ ମଥୁରା ନଗରୀରେ ପ୍ରଦର୍ଶିତ ହୋଇଥିଲା।ସେପଟେ ବନ ଦୁର୍ଗା ପ୍ରାଙ୍ଗଣରେ ଅନୁଷ୍ଟିତ କଂସ ଦରବାରରେ ରାଜକୀୟ ମୁଖ୍ୟ ଅତିଥି ଭାବେ ଗ୍ରାମର ସଚେତନ ନାଗରିକ ପ୍ରମୋଦ କୁମାର ଦାଶ ଯୋଗଦେଇ ସାଂସ୍କୃତିକ ବାର୍ତ୍ତା ପ୍ରଦାନ କରିଥିଲେ।ଏହି ଅବସରରେ କମିଟି ସଦସ୍ୟ ଉପସ୍ଥିତ ଥିଲେ ।