20-Oct-2025

ନୂଆପଡ଼ା (ପରମେଶ୍ଵର ମେହେର): ନୂଆପଡ଼ା ବିଧାନସଭା ଉପନିର୍ବାଚନ ପାଖେଇ ଆସିବା ସହିତ ରାଜନୈତିକ ତାପମାତ୍ରା ଉର୍ଦ୍ଧ୍ବଗାମୀ ହୋଇଛି । ତିନୋଟି ପ୍ରମୁଖ ଦଳ— ବିଜେଡି, ବିଜେପି ଓ କଂଗ୍ରେସ— ପ୍ରଚାର ଯୁଦ୍ଧରେ ନିମଗ୍ନ । ଏହି ମଧ୍ୟରେ ବିଜୁ ଜନତା ଦଳ ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ ଆଜି ନୂଆପଡା ଟାନୱାଟ ଗାଁରେ ପୂଜାର୍ଚ୍ଚନା କରି ନିଜ ପ୍ରଚାର ଅଭିଯାନ ଆରମ୍ଭ କଲେ । ଶ୍ରୀମତୀ ସ୍ନେହାଙ୍ଗିନୀ ଛୁରିଆ କଣାଭଇରା ମା’ଙ୍କ ମନ୍ଦିରରେ ପୂଜା କରି ସ୍ଥାନୀୟ ବିଜେଡି କର୍ମୀ ଓ ଗାଁ ମୁଖିଆମାନଙ୍କ ସହ ଲୋକ ସଂପର୍କ ଆରମ୍ଭ କଲେ । ସ୍ନେହାଙ୍ଗିନୀ ଏକ ସାକ୍ଷାତକାରରେ କହିଛନ୍ତି, “ନବୀନ ପଟ୍ଟନାୟକଙ୍କ ବିକାଶ ମାଡ଼ି ଆମର ମୁଖ୍ୟ ଆସ୍ତ୍ର । ନୂଆପଡା ଲୋକଙ୍କ ହୃଦୟରେ ମୁଁ ଅଛି ଓ ସେମାନେ ମୋତେ ନିଜ ଝିଅ ଭାବରେ ଦେଖୁଛନ୍ତି । ସେ ବିଜେପି ସରକାର ଉପରେ ଆକ୍ରମଣ କରି କହିଛନ୍ତି, “ଦେଢ଼ ବର୍ଷରେ ଚାକିରି ବିକ୍ରି, ଦରଦାମ ବୃଦ୍ଧି, ମହିଳା ଅସୁରକ୍ଷା — ସବୁଠି ବିଜେପି ଅସଫଳ ହୋଇଛି ।” ବିପକ୍ଷ ଆରୋପ ଉପରେ ସେ ଉତ୍ତର ଦେଇ କହିଛନ୍ତି, “ମୁଁ ପଦ୍ମପୁର ଅଞ୍ଚଳର ଝିଅ ହେଲେ ମଧ୍ୟ ନୂଆପଡା ମୋର ଘର । ମୋ ମାମୁଁ ଘର ଏଠାରେ ଅଛି, ଏବଂ ମୁଁ ଏଠାରେ ଦଳୀୟ ଅବ୍ଜରଭର ଥିଲି । ଜିଲ୍ଲା ବିକାଶ ସମ୍ପର୍କରେ ସେ କହିଛନ୍ତି, “ରାସନ, ଭତ୍ତା, ବିଜୁଳି ଓ ଆଦିବାସୀ ଯୋଜନା ପ୍ରତି ଘରକୁ ପହଞ୍ଚିବ ଏହା ମୋର ପ୍ରଥମ ଲକ୍ଷ୍ୟ । ବିଜେପି ପ୍ରାର୍ଥୀ ଜୟ ଢୋଲକିଆ ସମ୍ପର୍କରେ ସେ କହିଛନ୍ତି, “କିଏ ଆସିଲା କିଏ ଗଲା ଫରକ ପଡେ ନାହିଁ । ରାଜେନ୍ଦ୍ର ଢୋଲକିଆ ବିଜେଡିର ନେତା ଥିଲେ, ତାଙ୍କ ଫଟୋକୁ ବିଜେପି ପୋଷ୍ଟରରେ ଲଗାଇବା ମାନେ ତାଙ୍କ ପ୍ରତି ଅସମ୍ମାନ । ସ୍ନେହାଙ୍ଗିନୀ ଆଶା ବ୍ୟକ୍ତ କରିଛନ୍ତି “ଭଗବାନ ଓ ଲୋକଙ୍କ ଆଶୀର୍ବାଦରେ ନୂଆପଡାର ସେବା ପାଇଁ ମୁଁ ବିଜୟୀ ହେବି । ଏହି ନିର୍ବାଚନୀ ପ୍ରଚାରରେ ଦେବୀ ପ୍ରସାଦ ମିଶ୍ର, ପ୍ରଣବ ପ୍ରକାଶ ଦାସ(ବବି), ସଞ୍ଜୟଦାସ ବର୍ମା, ଅରୁଣ ସାହୁ, ରୋମଚନ ରଞ୍ଜନ ବଳିୟାରସିଂ, ପ୍ରଦୀପ ମାଝୀ, ପ୍ରତାପ ଜେନା, ବର୍ଷା ସିଂ ବରିହା, ପ୍ରୀତି ରଞ୍ଜନ ଘଡେଇ, ଟୁକୁନି ସାହୁ, ମନୋରମା ମହାନ୍ତି ତଥା ବିଗତ ସରକାର ବିଜେଡିର ପୂର୍ବତନ ମନ୍ତ୍ରୀ ମାନେ ତଥା ବିଜେଡିର ତୁଙ୍ଗ ନେତାମାନେ ଯୋଗ ଦେଇଥିଲେ ।