06-Oct-2025

ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ବ୍ଲକ ଏକ ଦାଦନ ପ୍ରବଣ, ମରୁଡି ପ୍ରପୀଡ଼ିତ, ଛୁଆ ବିକ୍ରୀ, ଶିଶୁବଳି ଭଲି ଅପଯଶ ପାଇଁ ବେଶ୍ ପରିଚିତ। ତେବେ ଏପରି ସ୍ଥିତିରେ ଅଲଣ୍ଡା ପଞ୍ଚାୟତ ମଧ୍ୟ ଅଛୁଆଁ ନୁହେଁ। କିଛି ବର୍ଷ ତଳେ ଧାନ ବିକ୍ରୀ ପାଇଁ ପଞ୍ଜିକରଣ କରିଥିବା ଚାଷୀ ମାନଙ୍କ ଟୋକନ ଲ୍ୟାପ୍ସ ହୋଇଯାଇଥିବା ଦେଖି ତତ୍କାଳୀନ ବଙ୍ଗୋମୁଣ୍ଡା ତହସିଲଦାର ଚାଷୀ ମାନଙ୍କ ଘରକୁ ଘର ଯାଇ ସ୍ଥିତି ଦେଖି ଅବାକ୍ ହୋଇଯାଇଥିଲେ। କାରଣ ପେଟପାଟଣା ପାଇଁ କିଏ ଘରେ ପାଠ ପଢୁଥିବା ଝିଅ ସାଙ୍ଗରେ ଛୋଟ ଛୋଟ ଶିଶୁମାନଙ୍କୁ ଛାଡି କାମ ଅନ୍ବେଷଣରେ ବାହାର ରାଜ୍ୟ ଯାଇଛି ତ କିଏ ବୃଦ୍ଧ ବୃଦ୍ଧା ମାନଙ୍କ ଭରସାରେ ଛୋଟ ଛୋଟ ଶିଶୁମାନଙ୍କୁ ଛାଡି ଯାଇଛି। ଆଉ କିଛି ଘରମାନଙ୍କରେ ତାଲା ଝୁଲୁଥିବା ଭଲି ସ୍ଥିତି ଦେଖାଯାଇଥିଲା। ଘଟଣାଟି ଗଣମାଧ୍ୟମ ର ପୃଷ୍ଠା ମଣ୍ଡନ କରିବାପରେ ଏକ ୧୦ ମ ପଢୁଥିବା ଝିଅ ପ୍ୟାକ୍ସ ରେ ନିଜ ବାପା ନାଁ ରେ ଥିବା ଧାନ ବିକ୍ରୀ କରିଥିଲା। ଏପରି ଏକ ପଞ୍ଚାୟତ ରେ ଶିକ୍ଷା ଅପେକ୍ଷା ପେଟପାଟଣା ଗୁରୁତ୍ବପୂର୍ଣ୍ଣ। ସରକାର ମନରେଗା ଯୋଜନାରେ କାମ ଯୋଗାଇ ଦେଉଥିବାରୁ ବର୍ତ୍ତମାନ ସ୍ଥିତି ଗୋଟିଏ ପ୍ରକାର ଠିକ୍ ଥିଲେ ହେଁ ଶିକ୍ଷା କୁ ପ୍ରାଥମିକତା ଜରୁରୀ ଅଟେ।
ତେଣୁ ଅଲଣ୍ଡା ପଞ୍ଚାୟତ ସରପଞ୍ଚ ନିବେଦିତା ବାଗ ଏକ ନିଆରା ପଦକ୍ଷେପ ଗ୍ରହଣ କରିଥିବା ଦେଖିବାକୁ ମିଳିଛି। ଏଣିକି ଅଲଣ୍ଡା ପଞ୍ଚାୟତ ରେ ଥିବା ମାଟ୍ରିକ ୧୦ ମ ଶ୍ରେଣୀ ର ସମସ୍ତ ଛାତ୍ରଛାତ୍ରୀଙ୍କୁ ମାଗଣାରେ (କୋଚିଂ) ଟ୍ୟୁସନ ପଢାହେବ। ଏଥିପାଇଁ ପଞ୍ଚାୟତ କାର୍ଯ୍ୟାଳୟର ଏକ କୋଠା କୁ ବହୁତ ସୁନ୍ଦର ଭାବେ ବିଭିନ୍ନ ଗଠନମୂଳକ ଚିତ୍ର ତଥା ମୋଟିଭେସନ ଲେଖା କାନ୍ଥ ମାନଙ୍କରେ ଲଗାଯାଇଛି। ଫଳରେ କୋଠରୀ ଭିତରକୁ ପ୍ରବେଶ କଲାମାତ୍ରେ ପାଠପଢ଼ା ପାଇଁ ପରିବେଶ ଅନୁକୂଳ ଥିଲା ଭଲି ମନେ ହେଉଛି। ଏ ଅଞ୍ଚଳର ଅଧିଷ୍ଠାତ୍ରୀ ଦେବୀ ମାଁ ଦ୍ୱାରସେହ୍ନୀ ଙ୍କ ପ୍ରସିଦ୍ଧ ଦଶହରା ଯାତ୍ରାର ବିଜୟା ଦଶମୀ ଦିନ ଶୁଭାରମ୍ଭ କରାଯାଇଛି। ଏଥିରେ ମୁଖ୍ୟ ଅତିଥି ଭାବରେ କଣ୍ଟାବାଞ୍ଜି ବିଧାୟକ ଲକ୍ଷ୍ମଣ ବାଗ, ସମ୍ମାନୀୟ ଅତିଥି ଭାବେ ଓଡ଼ିଶା ୟୂନିଅନ ଅଫ ଜର୍ଣ୍ଣାଲିଷ୍ଟ ବଲାଙ୍ଗୀର ଜିଲ୍ଲା ଟ୍ରିବ୍ୟୁନାଲ ଅଧ୍ୟକ୍ଷ ଅନୀଲ କୁମାର ତ୍ରିପାଠୀ, ମୁଖ୍ୟ ବକ୍ତା ଭାବେ ଅଲଣ୍ଡା ହାଇସ୍କୁଲର ପ୍ରଧାନ ଶିକ୍ଷକ ସୁଧାଂଶୁ ଶେଖର ରାଉତରାୟ , ମାନସ ରଞ୍ଜନ ପୁରୋହିତ, ଜ୍ଞାନେନ୍ଦ୍ର ସ୍ବାଇଁ, ଯୁବନେତା ଯୁବରାଜ ବାଗ , ସମସ୍ତ ଓ୍ବାର୍ଡ ସଭ୍ୟ ଓ ସଭ୍ୟା, ପଞ୍ଚାୟତ ର ସମସ୍ତ କର୍ମଚାରୀ, ଛାତ୍ରଛାତ୍ରୀ, ପଞ୍ଚାୟତ ର ଅଭିଭାବକ ତଥା ସମସ୍ତ ଭଦ୍ରବ୍ୟକ୍ତି ଉପସ୍ଥିତ ଥିଲେ।