27-Aug-2025

ସୁବର୍ଣ୍ଣପୁର,( ମନୋରଞ୍ଜନ ତ୍ରିପାଠୀ) ଅଗଷ୍ଟ ୧ ତାରିଖରୁ ରାଜ୍ୟରେ ପୋଲିସ ବିଭାଗ ପକ୍ଷରୁ ଆରମ୍ଭ ହୋଇଥିବା ଅପରେସନ୍ ଗରୁଡ଼ ରେ ପୋଲିସ ବିଭାଗ କୁ ମିଳିଛି ବଡ ସଫଳତା । ଏ ନେଇ ଗତକାଲି  ଜିଲ୍ଲା ପୋଲିସ କାର୍ଯ୍ୟାଳୟରେ ଆୟୋଜିତ ଏକ ସମ୍ବାଦିକ ସମ୍ମିଳନୀରେ ସମ୍ବଲପୁର ଆଇଜି ହିମାଂଶୁ ଲାଲ ସୂଚନା ଦେଇଛନ୍ତି । ଜିଲ୍ଲାର ସମସ୍ତ ଥାନା ଅଞ୍ଚଳରେ ଆରମ୍ଭ ହୋଇଥିବା ଗରୁଡ ଅଭିଯାନରେ ସଫଳତା ମିଳିଥିବା ବେଳେ ଅପରେସନ ଗରୁଡକୁ ଆହୁରି ଜୋରଦାର କରାଯିବାକୁ ଆଇଜି ସୂଚନା ଦେଇଛନ୍ତି । ଏବଂ ଏବେ ଗଞ୍ଜେଇ ଚାଲାଣ ଫରୱାର୍ଡ ରେ ନୁହେଁ ଯେଉଁ ମାନେ ବେକ୍ ୱାର୍ଡ ରେ କାମ କରୁଛନ୍ତି ସେମାନଙ୍କୁ ଖୋଜି ବାହାର କରାଯିବା ପ୍ରୟାସ ଚାଲିଛି ଏବଂ କିପରି ସମୁଳେ ବିନାଶ ପାଇଁ ଚେଷ୍ଟା ଚାଲିଥିବା ଆଇଜି କହିଛନ୍ତି । ଆଇଜିଙ୍କ ସୂଚନା ଅନୁଯାୟୀ, ଗତ ଅଗଷ୍ଟ ୧ରୁ ୨୫ତାରିଖ ମଧ୍ୟରେ ଜିଲ୍ଲାର ବିଭିନ୍ନ ଥାନା ଅଂଚଳରେ ୧୦ ଗୋଟି ଗଞ୍ଜେଇ ଚୋରାଚାଲାଣ ମାମଲା ରୁଜୁ ହୋଇଥିବା ବେଳେ ୧୩ କ୍ୱିଣ୍ଟାଲ ୪୦କେଜି ୨୯୧ ଗ୍ରାମ ଗଞ୍ଜେଇ ଜବତ ହୋଇଛି । ଯାହାର ବଜାର ମୂଲ୍ୟ ପ୍ରାୟ ୧୩ କୋଟି ୪୦ ହଜାର ଟଙ୍କା ହେବ। ଏଥିରେ ସମ୍ପୃକ୍ତ   ୪ ଟି ଦୁଇ ଚକିଆ, ଗୋଟିଏ ତିନି ଚକିଆ ଯାନ ଓ ୪ ଟି ଚାରି ଚକିଆ ଯାନ ଏବଂ ୬ ଟି ମୋବାଇଲ ଜବତ କରାଯାଇଥିବା ବେଳେ ୧୦ ଜଣଙ୍କୁ ଗିରଫ  କୋର୍ଟ ଚାଲାଣ କରାଯାଇଥିବା ସୂଚନା ଦେଇଛନ୍ତି ଶ୍ରୀ ଲାଲ । ସେହିପରି ବଲାଙ୍ଗୀର ଜିଲ୍ଲାରେ ୩ ଟି ଗଞ୍ଜେଇ ଚୋରା ଚାଲାଣ ମାମଲା ରୁଜୁ ହୋଇଥିବା ବେଳେ ୩ କ୍ୱିଣ୍ଟାଲ ୩୫ କେଜି ଗଞ୍ଜେଇ ଜବତ ହୋଇଥିବା ବେଳେ ଏଥିରେ ସମ୍ପୃକ୍ତ ୪ଜଣଙ୍କୁ ଗିରଫ କରାଯାଇଛି ।  ସେହିପରି ଜାନୁଆରୀ ୧ରୁ ଅଗଷ୍ଟ ୨୫ତାରିଖ ମଧ୍ୟରେ ଜିଲ୍ଲାର ବିଭିନ୍ନ ଥାନା ଅଞ୍ଚଳରେ ମୋଟ ୫୭ଟି ଗଞ୍ଜେଇ ଚୋରାଚାଲାଣ ମାମଲା ରୁଜୁହୋଇ ମୋଟ ୩୬ କ୍ୱିଣ୍ଟାଲ ୫୮ କେଜି
୬୯୭ ଗ୍ରାମ ଗଞ୍ଜେଇ ଜବତ ହୋଇଛି ଯାହାର ବଜାର ମୂଲ୍ୟ ପ୍ରାୟ ୩୬ କୋଟି ୫୮ ଲକ୍ଷ ଟଙ୍କା ହେବ। ଏହି ସବୁ ମାମଲାରେ ୮୧ ଜଣଙ୍କୁ କୋର୍ଟ ଚାଲାଣ କରାଯିବା ସହ ଅଭିଯୁକ୍ତ ମାନଙ୍କ ନିକଟରୁ ୨୦ଲକ୍ଷ ୨୨ହଜାର ଟଙ୍କା ଜବତ ହୋଇଛି ଏବଂ ୩୮ଟି ଦୁଇ ଚକିଆ
ଯାନ, ଗୋଟିଏ ତିନି ଚକିଆ ଯାନ, ୧୦ଟି ଚାରି ଚକିଆ ଯାନ, ୨ଟି ଟ୍ରକ୍, ୭୩ଟି ମୋବାଇଲ ଜବତ ହୋଇଥିବା ସୂଚନା ଦିଆଯାଇଛି। ଜିଲ୍ଲାରେ ବେଆଇନ ନିଶା କାରବାର, ନିଶାଶକ୍ତ ଅବସ୍ଥାରେ ଗାଡି ଚାଳନା, ବେଆଇନ ମାଦକ ଦ୍ରବ୍ୟ ଚାଲାଣ, ମାରଣାସ୍ତ୍ର ଚୋରା ଚାଲାଣ, ଜାମିନ ବିହୀନ ଗିରଫ ପରଓ୍ବାନା ଗୁଡିକୁ କାର୍ଯ୍ୟକାରୀ କରିବା, ଅପରାଧିକ କାର୍ଯ୍ୟକଳାପ ଦମନ ସହ ମହିଳାଙ୍କ ସୁରକ୍ଷାକୁ ସୁନିଶ୍ଚିତ କରିବା ପାଇଁ ବ୍ୟାପକ ପଦକ୍ଷେପ ନିଆଯିବ ବୋଲି କହିଥିଲେ। ସୁବର୍ଣ୍ଣପୁର ଏସପି ନାରାୟଣ ନାୟକଙ୍କ ନେତୃତ୍ୱରେ ଅପରେସନ ଗରୁଡକୁ ସଫଳତା ମିଳିଥିବା ସମ୍ବାଦିକ ସମ୍ମିଳନୀରେ ସୂଚନା ଦେଇଥିଲେ ଆଇଜି ଶ୍ରୀ ଲାଲ ।