14-May-2025

ବରଗଡ଼:(ନିରଞ୍ଜନ ତ୍ରିପାଠୀ)-ବରଗଡ଼ ଜିଲ୍ଲାରେ ନିର୍ବାଚିତ ପ୍ରତିନିଧି ଏବଂ ଜିଲ୍ଲା ପ୍ରଶାସନ ତରଫରୁ ରବି ଋତୁର ଧାନ ବିକ୍ରି ପାଇଁ  ବିଭିନ୍ନ ଧାନ ମଣ୍ଡି ଉଦ୍ଘାଟନ କରାଯାଇଛି। ଏହି ସମୟରେ ଜୟ କିସାନ ଆନ୍ଦୋଳନର ଏକ ପ୍ରତିନିଧି ମଣ୍ଡଳୀ ଟୋକନ ଜନିତ ସମସ୍ୟାକୁ ନେଇ  ଜିଲ୍ଲାପାଳଙ୍କ ଦ୍ବାରସ୍ଥ ହୋଇ ଲିଖିତ ଅଭିଯୋଗ କରିଛନ୍ତି। ଚଳିତ ବର୍ଷ ରବି ଫସଲ ସମୟରେ ରୋଗ ପୋକ ଓ କାଳବୈଶାଖୀର ତାଣ୍ଡବ ନୃତ୍ୟରେ ଚାଷୀମାନଙ୍କୁ ବହୁ କ୍ଷତି ସହିବାକୁ ପଡିଛି ଏବଂ ଅଧିକ ଖର୍ଚ୍ଚାନ୍ତ ହେବାକୁ ପଡିଛି  । ଏବେ ଯେତେବେଳେ ଧାନ ବିକ୍ରି କରିବାର ସମୟ ଆସିଛି ସେତେବେଳେ ଟୋକନ ଆସିଛି ମାତ୍ର ୩ ୪ କ୍ବିଣ୍ଟାଲର।  ପଞ୍ଜିକରଣ ସମୟରେ ଉପଯୁକ୍ତ କାଗଜ ପତ୍ର ଦେଇଥିଲେ ସୁଦ୍ଧା ଏପରି ସମସ୍ୟା ଦେଖିବାକୁ ମିଳିଛି। ଭଟଲି ବ୍ଲକ ସୁଲୁସୁଲିଆ ଗ୍ରାମର ଚାଷୀ ବାସୁଦେବ ସାହୁଙ୍କ ଧାନ ବିକ୍ରି ପାଇଁ ଟୋକନ ଆସିଛି ମାତ୍ର ୩ କ୍ବିଣ୍ଟାଲ  ୧୨ କେଜି , ନାରଙ୍ଗପୁର ଗ୍ରାମ ର ଚାଷୀ  କାର୍ତ୍ତିକ ନାୟକ ଙ୍କ ୧୧ କ୍ବିଣ୍ଟାଲ ୭୦ କେଜି,  ସେହିପରି  ସୋହେଲା ବ୍ଲକ ସାମକଟା ର ଚାଷୀ ସୁରଶେନ ବାରିକ ଙ୍କ ୪୪ କ୍ବିଣ୍ଟାଲ ୭୦ କେଜି ।

ଏହି ପରିପ୍ରେକ୍ଷୀରେ ଉପନିବନ୍ଧକ ବରଗଡ଼ କହୁଛନ୍ତି ଯେ ସେଟଲାଇଟ୍ ସର୍ଭେରେ ଏହା କଟିଛି। ଏବଂ ସଂପୃକ୍ତ ଚାଷୀମାନେ ପ୍ରାଥମିକ କୃଷି ସମବାୟ ସମିତିରେ ରେ ଅଭିଯୋଗ କଲେ ଆମେ ରାଜସ୍ୱ ନିରୀକ୍ଷକଙ୍କ ମାଧ୍ୟମରେ ଆଉ ଥରେ ଜମି କୁ ଯାଇ ସର୍ଭେ କରି ଭୁବନେଶ୍ବର ପଠେଇ ଦେବୁ। ସେଟଲାଇଟ୍ ର ଭୁଲ ସର୍ଭେ ଯୋଗୁଁ ଚାଷୀମାନେ ଏପରି କ୍ଷତି ସହୁଛନ୍ତି ବୋଲି ସଂଗଠନ ତରଫରୁ ଅଭିଯୋଗ କରାଯାଇଛି। ଚାଷୀ କେତେ କଷ୍ଟରେ ଧାର କରଜ କରି ଚାଷ କରି ଧାନ ବିକ୍ରି କରି ପରିବାର ପରିପୋଷଣ କରିବା ଆଶା ରଖିଥିଲା କିନ୍ତୁ କେତେବଳେ ପ୍ରକୃତି ତ ଆଉ କେତେବେଳେ ସରକାରଙ୍କ ଭୁଲ ନୀତି କାରଣରୁ ହନ୍ତସନ୍ତ ହେଉଥିବା ପରିଲକ୍ଷିତ ହୋଇଛି। ଜିଲ୍ଲାପାଳଙ୍କ  ଅନୁପସ୍ଥିତରେ ଅତିରିକ୍ତ ଜିଲ୍ଲାପାଳ ମଧୁଛନ୍ଦା ସାହୁଙ୍କ ସହିତ ଆଲୋଚନା କରି ଏକ ଲିଖିତ ଅଭିଯୋଗ ଦେଇଥିଲେ। ଏହି ସମୟରେ ଜୟ କିସାନ ଆନ୍ଦୋଳନର ଜିଲ୍ଲା ସାଧାରଣ ସଂପାଦକ ହର ବଣିଆଁ, ସୁରେନ୍ଦ୍ର ମେହେର, ସୁରଶେନ ବାରିକ, ତପୋବନ୍ତ ନାୟକ, ବିଜୟ ପ୍ରଧାନ କିଶୋର ସାହୁ ପ୍ରମୁଖ ଚାଷି ନେତା ଉପସ୍ଥିତ ଥିଲେ।