10-Feb-2025

ନୂଆଁପଡ଼ା(ପରମେଶ୍ୱର ମେହେର): ନୂଆପଡ଼ା ଜିଲ୍ଲା କୋମନା ବ୍ଲକ ଅନ୍ତର୍ଗତ ଟିକ୍ରାପଡା ପଞ୍ଚାୟତର ମହୁଲଭଟା ଗ୍ରାମର ଚୈତନ୍ୟ ଶବରଙ୍କ ସହ ତାଙ୍କ ପରିବାରର ଛଅ ଜଣ ଗତ ଦୁଇ ମାସରୁ ତେଲେଙ୍ଗାନାର ଏନ୍‌ଜେବି ଇଟା ଭାଟିରେ କାମ କରି ଆସୁଥିଲେ ହେଲେ ସେଠାରେ ଇଟା ଭାଟିର ମାଲିକଙ୍କ ଅକଥନୀୟ ଅତ୍ୟାୟର ଓ ଅମାନୁଷିକ ବ୍ୟବହାର ଯୋଗୁଁ ଭୟଭୀତ ହୋଇ ଏନେଇ ନୂଆପଡ଼ା ଜିଲ୍ଲା ଶ୍ରମ ଅଧିକାରୀଙ୍କୁ ଜଣାଇଥିଲେ।ଏହି ଅଭିଯୋଗ ଆସିଲା ପରେ ଶୁକ୍ରବାର ଜିଲ୍ଲା ଉପ ଶ୍ରମ ଅଧିକାରୀ  ମନୋରଞ୍ଜନ ନାୟକ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ଇଟା ଭାଟି ମାଲିକଙ୍କ ସହ ଯୋଗାଯୋଗ କରି ତୁରନ୍ତ ସେମାନଙ୍କୁ ନିଜ ଗାଁକୁ ଫେରାଇ ଦେବାକୁ ନିର୍ଦ୍ଦେଶ ଦେଇଥିଲେ। ଯାହା ଫଳରେ ଇଟାଭାଟି ମାଲିକ ଛଅ ଜଣ ଶ୍ରମିକଙ୍କୁ  ଗାଁକୁ ପଠାଇ ଦେଇ ଥିଲେ। ଶନିବାର ସମସ୍ତ ଦାଦନ ଶ୍ରମିକମାନେ ସୁରକ୍ଷିତ ଭାବରେ ନିଜ ଗାଁକୁ ଫେରିଥିବା ଜିଲ୍ଲା ଉପ ଶ୍ରମ ଅଧିକାରୀ ସୂଚନା ଦେଇଛନ୍ତି । ଉଦ୍ଧାର ହୋଇଥିବା ଦାଦନ ଶ୍ରମିକମାନେ ହେଲେ ଚୈତନ୍ୟ ଶବର, ଫୁଲମତି ଶବର, ମୋତିଲାଲ ହାତୀ, ଦେବକୀ ଶବର, କିଶୋର ଶବର ଓ ଅମ୍ବିକା ଶବର। ଏମାନେ ସମସ୍ତେ ନିଜ ଭିଟାମାଟି ମହୁଲଭଟାକୁ ସୁରକ୍ଷିତ ଭାବରେ ପହଁଚି ପରେ ଜିଲ୍ଲା ଶ୍ରମ ଅଧିକାରୀଙ୍କୁ ଧନ୍ୟବାଦ ଜଣାଇଛନ୍ତି।