21-Jan-2025

ବଲାଙ୍ଗିର(ପ୍ରେରଣା ଖବର): ୨୨ତମ ବଲାଙ୍ଗିର ଲୋକ ଉତ୍ସବ ୨୦ ତାରିଖରୁ ସ୍ଥାନୀୟ କୋଶଳ କଳା ମଣ୍ଡଳ ଠାରେ ଆରମ୍ଭ ହୋଇଯାଇଛି।ଏହି ଲୋକ ଉତ୍ସବ ୨୩ ତାରିଖ ପର୍ଯ୍ୟନ୍ତ ଚାଲିବ। ଚଳିତ ବର୍ଷ ଲୋକ ଉତ୍ସବ ପାଳନ ହେବା ଅନିଶ୍ଚିତତା ମଧ୍ୟରେ ଥିଲା।ସ୍ଥାନୀୟ ବୁଦ୍ଧିଜୀବୀ, ଜନସାଧାରଣ,କଳାକାର ମାନଙ୍କ ଅକ୍ଲାନ୍ତ ଚେଷ୍ଟା ଯୋଗୁଁ ଏ ବର୍ଷ ଲୋକ ଉତ୍ସବ ପାଳନ ସଫଳ ହେଲା।୨୦ ତାରିଖ ଦିନ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓଙ୍କ କରକମଳରେ ୨୨ତମ ଲୋକଉତ୍ସବ ଉଦଘାଟିତ ହୋଇଥିଲା।ଚଳିତ ବର୍ଷ ଷ୍ଟେଜ ସାଜସଜ୍ଜା ଅନ୍ୟ ବର୍ଷ ଅପେକ୍ଷା ବହୁତ୍ ସୁନ୍ଦର୍ ହୋଇଥିବା ଦର୍ଶକ ମଧ୍ୟରେ ବେଶ୍ ଚର୍ଚ୍ଚା ଥିଲା।ସୁନ୍ଦର୍ ଭାବରେ ଷ୍ଟଲ୍ ଗୁଡ଼ିକ ନିର୍ମାଣ ହୋଇଥିବା ବେଳେ ପଡ଼ିଆରେ ଧୂଳି ତଥା ପ୍ରଦୂଷଣ ନ ହେବା ପାଇଁ ତଳେ ମେଟ୍ ପକା ଯାଇଥିଲା।ପଡିଆ ଭିତରେ ଇତସ୍ତତଃ ହୋଇ ତଳେ ବସୁଥିବା ଖୁଚୁରା ବ୍ୟବସାୟୀ ମାନଙ୍କୁ ବାରଣ ଥିବା ବେଳେ ଜନସାଧାରଣ ଆରାମରେ ବୁଲି ଲୋକ ଉତ୍ସବ ର ମଜା ନେଉଥିଲେ। ପଡିଆ ମ୍ୟାନେଜମେଣ୍ଟ ସବୁଠାରୁ ଉତ୍ତମ ଥିବା ପରିଲକ୍ଷିତ ହୁଏ। ଚଳିତ ବର୍ଷ ଲୋକ ଉତ୍ସବର ପ୍ରଥମ ଦିବସର ସାଂସ୍କୃତିକ ସନ୍ଧ୍ୟାରେ ପ୍ରଥମେ ବାହାର ରାଜ୍ୟର ସାଂସ୍କୃତିକ ଦଳକୁ ପ୍ରାଧାନ୍ୟ ଦେଇଥିବାରୁ ସ୍ଥାନୀୟ ଜନସାଧାରଣ ଏବଂ କଳାକାର ମାନଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା।ସନ୍ଧ୍ୟା କାର୍ଯ୍ୟକ୍ରମ ଦୁଇ ଘଣ୍ଟା ବିଳମ୍ବରେ ଆରମ୍ଭ ହେବା ଏବଂ ସ୍ଥାନୀୟ ସାଂସ୍କୃତିକ ଦଳ ମାନଙ୍କୁ ଅଣଦେଖା କରିବା ନେଇ

ଦର୍ଶକ ମାନଙ୍କ ମଧ୍ୟରେ ଚର୍ଚ୍ଚା ହୋଇଥିଲା।ଲୋକ ଉତ୍ସବ ନିଜ ଅଞ୍ଚଳର ଲୋକ କଳା ତଥା ଲୁକ୍କାୟିତ କଳା ଏବଂ ପ୍ରତିଭା କୁ ଲୋକ ଉତ୍ସବ ମାଧ୍ୟମରେ ପ୍ରଦର୍ଶିତ କରିବା ହେଉଛି ମୂଳଲକ୍ଷ୍ୟ।ସାଂସ୍କୃତିକ ସଭାରେ ଉପମୁଖ୍ୟମନ୍ତ୍ରୀ କନକବର୍ଦ୍ଧନ ସିଂହଦେଓ ନିଜ ଅଞ୍ଚଳର ସଂସ୍କୃତି,ଲୋକକଳାକୁ ପ୍ରାଧାନ୍ୟ ଦେବା ପାଇଁ କହିଥିବା ବେଳେ ଏଠି ତାର ବିପରୀତ ଦେଖାଦେଇଥିଲା।ପ୍ରଥମେ କର୍ଣ୍ଣାଟକ ରାଜ୍ୟର ଢାପ ନୃତ୍ୟ, ଦ୍ଵିତୀୟରେ ଯୋଡ଼ିଶଙ୍ଖ ଏବଂ ତୃତୀୟରେ ନିଜ ଅଞ୍ଚଳର ଡାଲଖାଇ ନୃତ୍ୟ ପରିବେଷଣ କରାଯାଇଥିଲା।ଏଣୁ ସାଂସ୍କୃତିକ କମିଟିକୁ ଅନୁରୋଧ,ପ୍ରଥମେ ନିଜ ଅଞ୍ଚଳର ସାଂସ୍କୃତିକ ଦଳକୁ ସୁଯୋଗ ଦେଲେ ଲୋକ ଉତ୍ସବର ପ୍ରକୃତ ଉଦ୍ଦେଶ୍ୟ ସାଧନ ହେବ।