26-Jul-2024

ବୌଦ୍ଧ: ତିନିଦିନ ହେଲା ରାଜ୍ୟରେ ଲଗାଣ ବର୍ଷା ଜାରି ରହିଥିବାବେଳେ ମହାନଦୀ ଓ ଶାଖା ନଦୀ ଗୁଡ଼ିକରେ ଜଳ ପ୍ରବାହ ବୃଦ୍ଧି ପାଇଛି । ଆଗକୁ ପୁଣି ଏକ ଲଘୁଚାପ ଆସୁଥିବା ନେଇ ପାଣିପାଗ ବିଭାଗ ପକ୍ଷରୁ ସତର୍କ କରାଯିବା ପରେ ହୀରାକୁଦ ରୁ ପ୍ରଥମ ବନ୍ୟାଜଳ ନିଷ୍କାସନ ନେଇ ନିଷ୍ପତି ଗ୍ରହଣ କରା ଯାଇଛି । ଲଗାଣ ବର୍ଷା ଯୋଗୁଁ ମହାନଦୀ ଓ ଶାଖା ନଦୀ ଗୁଡ଼ିକ ଦୁଇ କୂଳ ଖାଇ ବର୍ଷା ଜଳ ପ୍ରବାହିତ ହେଉଥିବାବେଳେ ହୀରାକୁଦ ବନ୍ୟାଜଳ ଯୋଗୁଁ ତଳମୁଣ୍ଡରେ ବନ୍ୟା ଆଶଙ୍କା କରାଯାଉଅଛି । ତେଣୁ ରାଜ୍ୟ ସରକାର ଙ୍କ ପକ୍ଷରୁ ହୀରାକୁଦ ତଳ ମୁଣ୍ଡରେ ଥିବା ଜିଲ୍ଲା ଗୁଡ଼ିକ ବନ୍ୟା ପରିସ୍ଥିତିର ମୁକାବିଲା ପାଇଁ ସତର୍କ ରହିବାକୁ ପରାମର୍ଶ ଦିଆଯାଇଛି । ଗୁରୁବାର ଏନେଇ ବୌଦ୍ଧ ଜିଲ୍ଲାପାଳ ଜେ, ସୋନାଲ ବନ୍ୟା ପରିସ୍ଥିତି ପାଇଁ ସତର୍କ ରହିବାକୁ ଓ ଯେକୌଣସି ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ରହିବାକୁ ନିର୍ଦ୍ଦେଶ ଜାରି କରିଛନ୍ତି । ଏହି ସମୟ ମଧ୍ୟରେ କୌଣସି ଅଧିକାରୀ ମୁଖ୍ୟାଳୟ ଛାଡ଼ି ନଯିବାକୁ ଜିଲ୍ଲାପାଳଙ୍କ କାର୍ଯ୍ୟାଳୟ ପକ୍ଷରୁ ନିର୍ଦ୍ଦେଶ ଜାରି କରାଯାଇଛି । ଜିଲ୍ଲା ଜଳ ବିଭାଜନ ପାଖରୁ କଣ୍ଟ୍ରୋଲ ରୁମ୍ ଖୋଲାଯାଇ ମହାନଦୀ ର ଜଳ ପତ୍ତନ ଉପରେ ଦୃଷ୍ଟି ରଖାଯାଇଛି । ସେହିପରି ଜିଲ୍ଲାପାଳ ଙ୍କ କାର୍ଯ୍ୟାଳୟରେ ଓ ସମସ୍ତ ବ୍ଲକ୍ କାର୍ଯ୍ୟାଳୟ ରେ କଣ୍ଟ୍ରୋଲ ରୁମ ଖୋଲାଯାଇଛି । ପୂର୍ବ ପ୍ରସ୍ତୁତି ଅନୁଯାୟୀ ବନ୍ୟା ଆଶ୍ରୟ ସ୍ଥଳୀ ଗୁଡ଼ିକ ପ୍ରସ୍ତୁତ କରି ରଖାଯିବା ସହିତ ଆବଶ୍ୟକୀୟ ଶୁଖିଲା ଖାଦ୍ୟ ,ଔଷଧ ଆଦି ମହଜୁଦ ରଖାଯାଇଛି । ଏନ୍ଏସି ନିର୍ବାହୀ ଅଧିକାରୀ ଓ ବ୍ଲକ୍ ର ବିଡ଼ିଓ ମାନଙ୍କୁ ସମସ୍ତ ପ୍ରସ୍ତୁତି ର ସମୀକ୍ଷା କରିବା ସହ କୌଣସି ପରିସ୍ଥିତି ସୃଷ୍ଟି ହେଲେ ତୁରନ୍ତ ମୁଖ୍ୟ କଣ୍ଟ୍ରୋଲ ରୁମ୍ ଏବଂ ଜିଲ୍ଲାପାଳ ଙ୍କୁ ଅବଗତ କରାଇବାକୁ ନିର୍ଦ୍ଦେଶ ଦିଆଯାଇଛି । ସୂଚନା ମୁତାବକ ବୌଦ୍ଧ ଠାରେ ମହାନଦୀର ଜଳ ପତ୍ତନ ବିପଦ ସଙ୍କେତ ଠାରୁ ପ୍ରାୟ ତିନି ମିଟର ତଳେ ରହିଛି । ତେଣୁ ପରିସ୍ଥିତି ଆୟତାଧିନ ରହିଥିବା ଜଣାଯାଇଛି ।