19-Jun-2024

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଲାଲଟିକ୍ରାଠାରେ ଥିବା ସ୍ୱରାଜ ମଲ୍ଟିସ୍ପେସାଲିଟି ହସପିଟାଲରେ ବିରୁୁଦ୍ଧରେ ଏକ ସାଂଘାତିକ ଅଭିଯୋଗ ଆସିଛି । ଜଣେ ପ୍ରସୂତୀଙ୍କୁ ଚିକିତ୍ସାରେ ଅବହେଳା କାରଣରୁ ତାଙ୍କର ଇନଫେକ୍ସନ ହୋଇ ରୋଗୀ ଜଣକର ମୃତ୍ୟୁ ହୋଇଥିବା ପ୍ରସୂତୀଙ୍କ ପରିବାର ଅଭିଯୋଗ କରି ଶବଧରି ରାତିରେ ଆନ୍ଦୋଳନ କରିବା ସହିତ ଟାଉନ ଥାନାରେ ଲିଖିତ ଅଭିଯୋଗ କରିଛନ୍ତି l ତେବେ ଅଭିଯୋଗକୁ ହସପିଟାଲ କତ୍ତୃପକ୍ଷ ସଂପୂର୍ଣ୍ଣ ଖଣ୍ଡନ କରି ଚିକିତ୍ସlରେ କୌଣସି ଅବହେଳା କରାଯାଇ ନାହିଁ ବରଂ ରୋଗୀର ଅତ୍ୟଧିକ ରକ୍ତଚାପ ଯୋଗୁଁ ଏଭଳି ହୋଇଥିବା ଓ ରୋଗୀକୁ ଏଠାରେ ରେଫର କଲା ବେଳେ ବଞ୍ଚିଥିଲା ବୋଲି କୁହାଯାଇଛି। ଅଭିଯୋଗରୁ ଜଣାଯାଇଛି ଯେ,ପାଟଣାଗଡର ଶ୍ରଦ୍ଧାଞ୍ଜଳି ମହାନନ୍ଦ ନାମ୍ନୀ ଜଣେ ଗର୍ଭବତୀ ଗତ ଜୁନ ୧୨ ତାରିଖରେ ପ୍ରସବ ପାଇଁ ବଲାଙ୍ଗୀର ଲାଲଟିକ୍ରାସ୍ଥିତ ସ୍ୱରାଜ ମଲ୍ଟି ସ୍ପେସାଲିଟି ହସପିଟାଲରେ ଭର୍ତ୍ତି ହୋଇଥିଲେ। ସେତେବେଳେ ତାଙ୍କର ଅତ୍ୟଧିକ ରକ୍ତଚାପ ରହିଥିଲା। ସେଥିପାଇଁ ସେହି ଦିନ ହିଁ ତାଙ୍କର ସିଜରିଆନ ଅପରେସନ କରାଯାଇ ପ୍ରସବ କରାଯାଇଥିଲା। କିନ୍ତୁ ପରଦିନ ତାଙ୍କର ସ୍ୱାସ୍ଥ୍ୟସ୍ଥିତିରେ ଅବନତୀ ଘଟିଲା। ସେଥିପାଇଁ ଆଇସିୟୁରେ ତାଙ୍କୁ ରଖାଯାଇଥିଲା । ସେତେବେଳେ ରୋଗୀର ହୃଦରୋହ ଥିବା ସନ୍ଦେହ କରାଯାଉଥିବା ହସପିଟାଲ କତ୍ତୃପକ୍ଷ କୁଆଡେ କହିଥିଲେ। କିନ୍ତୁ ପରେ ପରେ ଶ୍ରଦ୍ଧାଞ୍ଜଳିଙ୍କ ସ୍ଥିତିରେ କୌଣସି ଉନ୍ନତି ନହୋଇ ବରଂ ଆହୁରି ବିଗିଡିବାରେ ଲାଗିଥିଲା। ଶେଷରେ ୧୭ ତାରିଖରେ ତାଙ୍କୁ ଅନ୍ୟ ବଡହସପିଟାଲକୁ ନେଇ ଚିକିତ୍ସା କରାଇବାକୁ ରେଫର କରି ଦିଆଗଲା । ନେବା ବେଳକୁ ରୋଗୀର ହୋସ ନଥିଲା । ରୋଗୀର ପରିଜନ ବରଗଡ ବିକାଶ ହସପିଟାଲକୁ ନେଇ ଥିଲେ। କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିବା ସହ ବହୁ ସମୟ ପୂର୍ବରୁ ଶ୍ରଦ୍ଧାଞ୍ଜଳିଙ୍କ ମୃତ୍ୟୁ ହୋଇଯାଇଥିବା କହିଥିଲେ ବୋଲି ରୋଗୀର ପରିବାରବର୍ଗ ଅଭିଯୋଗ କରିଛନ୍ତି। ତେବେ ପରିବାର ଲୋକ ଶ୍ରଦ୍ଧାଞ୍ଜଳିଙ୍କ ଶବକୁ ଧରି ଆସି ସ୍ୱରାଜ ହସପିଟାଲ ସାମନାରେ ରଖି ଆନ୍ଦୋଳନ କରିଥିଲେ। ସ୍ୱରାଜ ହସପିଟାଲରେ ଚିକିତ୍ସାରେ ଅବହେଳା କରାଯାଇଥିବା କାରଣରୁ ଶ୍ରଦ୍ଧାଞ୍ଜଳିଙ୍କ ମୃତ୍ୟୁ ହୋଇଯାଇଥିବା ଅଭିଯୋଗ କରିବା ସହିତ ହସପିଟାଲ କତ୍ତୃପକ୍ଷଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେଇ କ୍ଷତିପୂରଣ ଦେବାକୁ ଦାବି କରାଯାଇଥିଲା । ଘଟଣାର ଖବର ପାଇ ଟାଉନଥାନା ଆଇଆଇସି ବିଶ୍ୱଜିତ ମନବୋଧ ଆନ୍ଦୋଳନକାରୀଙ୍କ ସହିତ ଆଲୋଚନା କରିଥିଲେ । ଘଟଣାର ତଦନ୍ତ କରାଯାଇ ଦୋଷୀ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରି ଟାଉନଥାନାରେ ଏକ ଲିଖିତ ଅଭିଯୋଗ ମଧ୍ୟ ହୋଇଛି । ସେପଟେ ଏଭଳି ଅଭିଯୋଗକୁ ସ୍ୱରାଜ ହସପିଟାଲ କତ୍ତୃପକ୍ଷ ଖଣ୍ଡନ କରିଛନ୍ତି । ଡ.ସୁଜ୍ଞାନ ମିଶ୍ରଙ୍କୁ ପଚାରିବାରୁ ସେ କହିଛନ୍ତି ଯେ,ରୋଗୀ ଏପମିଟ ହେବା ସମୟରେ ଅତ୍ୟଧିକ ରକ୍ତଚାପ ରହିଥିଲା । ସେଥିପାଇଁ ସାଙ୍ଗେ ସାଙ୍ଗେ ତାର ସିଜରିଆନ କରାଯାଇଥିଲା । ଅମେ ସବୁ ପ୍ରକାର ଉଦ୍ୟମ କଲା ପରେ ମଧ୍ୟ ସ୍ୱାସ୍ଥ୍ୟରେ ଅବନତି ହେବାରୁ ଆମେ ରେଫର କରିଦେଲୁ । ସେମାନେ ବରଗଡ ବିକାଶ ହସପିଟାଲକୁ ନେଇ ଭର୍ତ୍ତି କରିଥିଲେ ଓ ସେଠାରେ ରୋଗୀକୁ ଚିକିତ୍ସା ମଧ୍ୟ କରାଯାଇଥିବା ପ୍ରମାଣ ଆମ ପାଖରେ ରହିଛି ବୋଲି ଡ.ସୁଜ୍ଞାନ ମିଶ୍ର କହିଛନ୍ତି ।