27-Apr-2024

ଡୁଙ୍ଗୁରିପାଲ(ଅରବିନ୍ଦ ମିଶ୍ର)- ସୁବର୍ଣ୍ଣପୁର ଜିଲ୍ଲା  ୬ଟି ବ୍ଲକ ମଧ୍ୟରୁ ଡୁଙ୍ଗୁରିପାଲି ବିଭିନ୍ନ କ୍ଷେତ୍ରରେ ଏହାର ସ୍ୱତନ୍ତ୍ରତା ରହିଛି । ଏଠାରେ ଶିକ୍ଷା, ସ୍ୱାସ୍ଥ୍ୟ, ଗମନାଗମନ, ବାଣିଜ୍ୟ ବ୍ୟବସାୟ, ରାଜନୈତିକ , କୃଷି ତଥା ଅନ୍ୟାନ୍ୟ ଦୃଷ୍ଟିରୁ ଏହି ବ୍ଲକ ତାର ସ୍ୱତନ୍ତ୍ର  ଗାରିମ ରକ୍ଷା କରି ଆସୁଅଛି । ଏଠାକାର ସରଳ,ପରୋପକାର, ସହ ଯୋଗୀ ମନୋଭାବ ଯୋଗୁଁ ଏହି ଅଂଚଳକୁ ଲୋକେ କାର୍ଯ୍ୟ କରିବା ପାଇଁ ପସନ୍ଦ କରିଥାନ୍ତି । କିନ୍ତୁ ଏହି ଶାନ୍ତିପ୍ରିୟ ଅଂଚଳରେ ବେଆଇନ, ବେଧଡକ ନିଶାକାରବାର ଯୋଗୁଁ ଅଶାନ୍ତ ହୋଇ ଉଠୁଛି । ଗତ କିଛି ଦିନ ମଧ୍ୟରେ ଡୁଙ୍ଗୁରିପାଲି ପୋଲିସ ପକ୍ଷରୁ ଗଞ୍ଜେଇ ଚାଲାଣ, କଫ ସିରଫ ଗୋଷ୍ଠିକୁ ଧରିବାରେ ସଫଳ ହୋଇଥିବା ବେଳେ ନିଜର ମୂଳ କର୍ତ୍ତବ୍ୟ ହୋଇଥିବା ଅବକାରୀ ବିଭାଗର ଦେଖା ନାହିଁ । ଡୁଙ୍ଗୁରିପାଲି ବ୍ଲକରେ ପଣ୍ଡକିଟାଲ ଏବଂ ଡୁଙ୍ଗୁରିପାଲିରେ ଦୁଇଟି ବିଦେଶୀ ମଦ ଦୋକାନ ରହିଛି । ଉଭୟ ଦୋକାନରୁ ବେଧଡ ଭାବରେ ଖୋଲାଖୋଲି ଭାବରେ ଚଢା ଦରରେ ୨୪ଘଣ୍ଟିଆ ମଦ ବିକ୍ରୀ ଚାଲିଛି । ଯାହାକି ଉଦ୍ୱେଗ ଜନକ । ଗତ ହୋଲିର ପୂର୍ବ ଦିନ ସଂଧ୍ୟାରେ ଏଠାରୁ ଟାଟା ଏସ ଗାଡିରେ ବାହାରକୁ ବିଦେଶୀ ମଦ ଚାଲାଣ ହେଉଥିଲା । ଏ ସଂପର୍କରେ ଜିଲ୍ଲା ଅବାକାରୀ ଅଧିକ୍ଷକ, ବିନିକା ଅବକାରୀ ବିଭାଗକୁ ଜଣାଇ ଦିଆଯାଇଥିଲା । ଜିଲ୍ଲା ମୁଖ୍ୟ ପ୍ରବୀର କୁମାର ସାମଲ ଏହାର ତଦନ୍ତ କରିବାକୁ ନିର୍ଦ୍ଦେଶ ବିନିକା ବିଭାଗକୁ ଦେଇଥିବା ପ୍ରକାଶ କରିଥିଲେ ।  ଏ ସଂପର୍କରେ ବିନିକା ଅବକାରୀ ବିଭାଗ କର୍ମଚାରୀ ଅଭାବ ଦର୍ଶାଇ ତଦନ୍ତକୁ ବିଳମ୍ବ କରିଥିବା ପ୍ରକାଶ କରିଥିଲେ । ବର୍ତ୍ତମାନ ସୁଦ୍ଧା ତଦନ୍ତ ହୋଇଛି କି ନାହିଁ ଜାଣିବା ପାଇଁ ଯୋଗାଯୋଗ କରାଯାଇଥିଲେ ମଧ୍ୟ ସେ ଆମ ପ୍ରତିନିଧିର ଫୋନ ଉଠାଉ ନାହାନ୍ତି ।  ଆହୁରି ମଧ୍ୟ ଏଠାରେ ଥିବା  ଦେଶୀ ମହୁଲି ଭାଟି ଖୂଣ୍ଟପାଲି, ସୁନାପାଲି, ମହୁଲପାଲି, ଗିଧମାଲ ପ୍ରମୁଖ ଭାଟି ଗୁଡିକରେ ରାତି ଅଧିଆ ଖୋଲା ମଦ ବିକ୍ରି ଚାଲିଛି । ଏହା ସହିତ ପଡୋଶୀ ଜିଲ୍ଲାର ବିଭିନ୍ନ ସ୍ଥାନରୁ ଦୈନିକ ଶହ ଶହ ଲିଟର ଦେଶୀ ରନ୍ଧା ମଦ ଏହି ବ୍ଲକକୁ ଆସୁଅଛି । ଏଠାକାର ଦେଶୀ ଭାଟି ଗୁଡିକ ମଧ୍ୟ ବସ୍ତା ବସ୍ତା ମଦ ବିଭିନ୍ନ ଗ୍ରାମର କୁଚିଆ ମଦ ବେପାରୀଙ୍କ ଠାରେ ବିକ୍ରୀ କରୁଛନ୍ତି । ଯାହାକୁ ଏହାର ଗାଇଡ ଲାଇନକୁ ଉଲଙ୍ଘନ ସହିତ ଅଂଚଳରେ  ଏହାର କୁପ୍ରଭାବ ପଡୁଛି । ବିଦେଶୀ ଭାଟି ଗୁଡିକରେ ମଧ୍ୟ ଚଢା ଦରରେ ବିନା ବିଲରେ ମଦ ବିକ୍ରୀ କରିଚାଲିଛନ୍ତି । ବିଲ ମାଗିଲେ  ଜିଏସଟିର ନାଁରେ ଅଧିକ ହେବ କହି ଗ୍ରାହକଙ୍କୁ ଶୋଷଣ କରୁଥିବା ଅଭିଯୋଗ ହେଉଛି । ଏ ସଂପର୍କରେ ବିଭିନ୍ନ ସଚେନତ ବ୍ୟକ୍ତି କ୍ଷୋଭ ପ୍ରକାଶ କରି ସେମାନେ ନିଜର ମତବ୍ୟକ୍ତ କରିଛନ୍ତି ।
 

୧. ବିପ୍ରଚରଣ ସାହୁ , ବ୍ଲକ କୃଷକ ସଂଘ ସଭାପତି- ବେଆଇନ ଦେଶୀ ବିଦେଶୀ ମଦର ପ୍ରାବଳ୍ୟ ଯୋଗୁଁ ଅଂଚଳରେ ଅଶାନ୍ତି ସୃଷ୍ଟି କରୁଛି ।  ସଂଧ୍ୟା ସମୟରେ ମହିଳା ମାନେ ନିଜକୁ ଅସୁରକ୍ଷିତ ମନେ କରି ବାହାରି ପାରୁ ନାହାନ୍ତିା ସଂଧ୍ୟା ନଇଁଲେ ଗାଁ ଗୁଡିକରେ ମଦୁଆମାନଙ୍କ କବ୍ଚାକୁ ଗାଁ ଚାଲି ଯାଉଛି । ଅବକାରୀ ବିଭାଗ ନିଜର ମାସିକିଆ କୋଟା ପାଇ ଖୁସ ଥିବା ବେଳେ ନିରିହ ଗ୍ରାମବାସୀ ଏହାର ଦୁଃଖ ଭୋଗୁଛନ୍ତି ।  ଅଭିଯୋଗ କିମ୍ବା ଗଣମାଧ୍ୟମରେ ଖବର ପ୍ରକାଶ ହେଲେ ମଧ୍ୟ କେହି ନଶୁଣିବା ଅଧିକ ଦୁଃଖ ଦାୟକ ଅଟେ । ଏଣୁ  ଉଚ୍ଚକର୍ତ୍ତୃପକ୍ଷ ଏ ଦିଗରେ ବିହିତ ପଦକ୍ଷେପ ଗ୍ରହଣ କରିବା ଉଚିତ । 
 

୨. କିସନ କୁମାର ଅଗ୍ରୱାଲ- ବରିଷ୍ଠ ସାମ୍ବାଦିକ- ସରକାରଙ୍କ ଗାଇଡ ଅନୁସାରେ ସବୁକିଛି ହେବା କଥା । ମନଇଚ୍ଛା ନିଜକୁ ସୁହାଇଲା ଭଳି ବିକ୍ରୀ କରିବା ଠିକ୍ ନୁହେଁ ।  ନିର୍ଦ୍ଦିଷ୍ଟ ସମୟ ଏବଂ ଅନୁପାତରେ ବିକ୍ରି ହେବା କଥା । ସକାଳରୁ ମଧ୍ୟ ରାତ୍ରୀ ପର୍ଯ୍ୟନ୍ତ ମନ ଇଚ୍ଛା ଏବଂ ଯିଏ ଯେତେ ଚାହିଁଲା ତାଙ୍କୁ ସେତିକି ଦେବା ଠିକ୍ ନୁହେଁ । ଗ୍ରାମାଞ୍ଚଳରେ ଏହାର ବହୁଲ ବିକ୍ରୀ ଯୋଗୁଁ  ଚୋରୀ, ଡକାୟତି, ରାହାଜାନୀ ପ୍ରଭୃତି ଘଟଣା ଦେଖିବାକୁ ମିଳୁଛି । ଏଣୁ ସରକାରଙ୍କ ଗାଇଡ ଲାଇନକୁ ଦୃଷ୍ଟି ଦେଇ ଦେଶୀ ବିଦେଶୀ ମଦ ଦୋକାନ ଚଳାଇବା ସହିତ ବିଭିନ୍ନ ସମୟରେ  ଚାଢାଉ, ଧଡପଗଡ କରାଯାଉ ।