25-Dec-2022

ବଲାଙ୍ଗୀର(ପ୍ରେରଣା ଖବର): ଆଜି ସ୍ଥାନୀୟ ବଲାଙ୍ଗୀର ଷ୍ଟୁଡେଣ୍ଟ୍ ଷ୍ଟୋର୍ ପରିସରରେ ଜିଲ୍ଲା ଲେଖକ ପରିଷଦର ଆଗାମୀ ୧୬ତମ ବଲାଙ୍ଗୀର ବହିହାଟ - ୨୦୨୩ ର ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି । ପରିଷଦର ସଭାପତି ମଳୟ ମିଶ୍ରଙ୍କ ଅଧ୍ୟକ୍ଷତାରେ ଆଜି ସନ୍ଧ୍ୟାରେ ଅନୁଷ୍ଠିତ ଏହି ବୈଠକରେ ପରିଷଦର କର୍ମକର୍ତ୍ତା, ସଦସ୍ୟ ଓ ଅନ୍ୟାନ୍ୟ ସହଯୋଗୀମାନେ ଯୋଗଦେଇଥିଲେ । ଏଥିରେ ଆଗାମୀ ଫେବୃଆରୀ ୧୪ରୁ ୨୩ ତାରିଖ ପର୍ଯ୍ୟନ୍ତ ୧୦ଦିନ ବ୍ୟାପି କୋଶଳ କଳା ମଣ୍ଡଳ ପଡିଆରେ ହେବାକୁ ଥିବା ଏହି ରାଜ୍ୟସ୍ତରୀୟ ପୁସ୍ତକମେଳାରେ ପୂର୍ବପରି ବିଭିନ୍ନ କାର୍ଯ୍ୟକ୍ରମମାନ ଆୟୋଜନ କରାଯିବାକୁ ସ୍ଥିର ହୋଇଛି । ଏଥିମଧ୍ୟରେ  ଗଳ୍ପ ଆଲୋଚନା, କବିତା ଆଲୋଚନା, ଶିଶୁ ସାହିତ୍ୟ, ବହୁଭାଷୀ କବିତା ପାଠ, କୁଇଜ୍, ହାସ୍ୟବ୍ୟଙ୍ଗ ଆସର, ସମ୍ବର୍ଦ୍ଧନା ପର୍ବ, ପରିଷଦର ମୁଖପତ୍ର 'କୋଶଳାୟନ' ର ପ୍ରକାଶନ, ବହିହାଟ ପୁରସ୍କାର, ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶନ ଇତ୍ୟାଦି କରାଯିବାକୁ ସର୍ବସମ୍ମତିକ୍ରମେ ନିଷ୍ପତ୍ତି ନିଆଯାଇଛି । ଚଳିତବର୍ଷ ୧୦୦ଟି ବୁକ୍ ଷ୍ଟଲ୍ କରାଯିବ ଓ ଏଥିପାଇଁ କମିଟିର କାର୍ଯ୍ୟକର୍ତ୍ତାମାନେ ରାଜ୍ୟ ପୁସ୍ତକମେଳା 'ଅକ୍ଷର' ଭୁବନେଶ୍ଵରକୁ ଯାଇ ପୁସ୍ତକବିକ୍ରେତା ଓ ପ୍ରକାଶକମାନଙ୍କୁ ସମ୍ପର୍କ ସ୍ଥାପନ କରିଥିବା ପ୍ରକାଶ କରିଥିଲେ ।    ଚଳିତବର୍ଷ ବହିହାଟର ସୁପରିଚାଳନା ନିମନ୍ତେ ବୁଦ୍ଧିଜିବୀ, ଲେଖକ, କଳାକାର ଓ ସାମ୍ବାଦିକଙ୍କୁ ନେଇ ଏକ ଆୟୋଜକ କମିଟି ଗଠନ କରାଯାଇଛି । ଏଥିରେ ପରିଷଦର ସମ୍ପାଦକ କପିଳେଶ୍ବର ଖମାରୀ, ସହସମ୍ପାଦକ ରଘୁନନ୍ଦନ ସିଂ, ସୁବର୍ଣ୍ଣପୁର ଜିଲ୍ଲାର ଉପସଭାପତି ଦେବେନ୍ଦ୍ର ନାଏକ(ତରଭା), କୋଷାଧ୍ୟକ୍ଷ ଅଜିତ କୁମାର ମହାନ୍ତି , ମୁରଲୀଧାରୀ ପତି , ରତ୍ନମୟ ତ୍ରିପାଠୀ, ମହେନ୍ଦ୍ର କୁମାର ଦର୍ଜୀ , ଶରତ କୁମାର ମିଶ୍ର , ଡା . ଅଶୋକ କୁମାର ସେଠୀ , ପୂର୍ଣ୍ଣଚନ୍ଦ୍ର ପଣ୍ଡା , ପ୍ରଶାନ୍ତ ମହାକୁର , ସନ୍ତୋଷ ଠାକୁର , ସୁବଳ ମହାକୁର , ସୁଶାନ୍ତ କୁମାର ପଣ୍ଡା , ସଞ୍ଜୟ ପୁରୋହିତ ପ୍ରମୁଖ ଉପସ୍ଥିତ ଥିଲେ । ଦୂରଦୂରାନ୍ତର ଓ ସମୟାଭାବରୁ ଆସିପାରି ନଥିଲେ ହେଁ ,  ଟିଟିଲାଗଡ ଉପସଭାପତି ଟିକେଲାଲ ବେହେରା , ପାଟଣାଗଡ ଉପସଭାପତି ଦିଲିପ ମିଶ୍ର , ପାଟଣାଗଡ କାର୍ଯ୍ୟକାରୀ ସଦସ୍ୟ ଲିଙ୍ଗରାଜ ଚିନ୍ଦା, ସୋନପୁର କାର୍ଯ୍ୟକାରୀ ସଦସ୍ୟ ଦିଲିପ ପାତ୍ର ,  ବଲାଙ୍ଗୀର କାର୍ଯ୍ୟକାରୀ ସଦସ୍ୟ ହୃଷିକେଶ ପୁରୋହିତ  ଓ ଅନ୍ୟାନ୍ୟ ସଦସ୍ୟମାନେ ସ୍ବୀକୃତି ଦେଇଥିବା ପ୍ରକାଶ ।ଶେଷରେ ସହସମ୍ପାଦକ ରଘୁନନ୍ଦନ ସିଂ ଧନ୍ୟବାଦ ଦେଇଥିଲେ ।