27-Apr-2022

ବଲାଙ୍ଗୀର (ମଳୟ ମିଶ୍ରଙ୍କ ରିପୋର୍ଟ):  ବନବିଭାଗର ଜ୍ଞାତସାରରେ ଟିଟିଲାଗଡ- ମୁରିହାହାଲ ସୀମାନ୍ତବର୍ତ୍ତୀ ତିଖାରୀ ସଂରକ୍ଷିତ ଜଙ୍ଗଲର ଗୁଲୁମୀ ଗ୍ରାମ ନିକଟସ୍ଥ ଭାଲୁଡୁଙ୍ଗୁରୀ ପାହାଡରେ ଦୀର୍ଘଦିନ ଧରି ବେଆଇନ୍ ରତ୍ନପଥର ଖୋଳା ଚାଲିଆସିଥିବା ଓ ଗତ ୨୨ ତାରିଖରେ ପଥର ଚଟାଣ ତଳେ ଖୋଲାଯାଇଥିବା ପ୍ରାୟ ଚାଳିଶଫୁଟ୍ ର ସୁଡଙ୍ଗରେ ବିସ୍ଫୋରକ ବାଷ୍ପରେ ଶ୍ବାସରୁଦ୍ଧ ହୋଇ ଚୋରାବେପାରୀଙ୍କ ଦ୍ବାରା ନିୟୋଜିତ ଆଖପାଖ ଗ୍ରାମର ୨ ଜଣ ଶ୍ରମିକଙ୍କ ମୃତ୍ୟୁ ଘଟଣା ଚାଞ୍ଚଲ୍ଯ ସୃଷ୍ଟି କରିଛି ।    ଏମାନେ ହେଲେ ଗୁଲମୀର ନବୀନ ଜାନୀ ଓ ନୂଆପଡାର ଉଜ୍ଜ୍ବଳ ଭୋଇ । ଅନ୍ୟ ଦୁଇଜଣ ଶ୍ରମିକ ଆହତହୋଇ ଗୁରୁତର ଅବସ୍ଥାରେ  ଚିକିତ୍ସା ପାଇଁ ଡାକ୍ତର ଖାନାରେ ଭର୍ତ୍ତି ହୋଇଥିଲେ । ଅସମର୍ଥିତ ସୂତ୍ରରୁ ପ୍ରକାଶ ଯେ ଇତିମଧ୍ୟରେ ଆଉଜଣଙ୍କର ମଧ୍ୟ ମୃତ୍ୟୁ ଘଟିଯାଇଛି । କଣ୍ଟାବାଞ୍ଜିର କେତେକ ଆନ୍ତଃରାଜ୍ୟ ଚୋରାରତ୍ନବେପାରୀ ପାହାଡ ଉପରେ କ୍ୟାମ୍ପ୍ କରି ସ୍ଥାନୀୟ ଶ୍ରମିକଙ୍କୁ ଦୈନିକ ଦୁଇ / ତିନିଶହ ଟଙ୍କା ମଜୁରୀ ଦେଇ ଏହା ଖୋଳାଉଥିଲେ । ଗୁଲମୀର ରାଜୁ ସାହୁ , ବର୍ଲାର ମହେନ୍ଦ୍ର ବୁଡେକ୍ ଓ ବିଘ୍ନରାଜ ପ୍ରମୁଖ ସାମିଲ ରହିଥିବା ପ୍ରକାଶ ।

ଏହି ଦୁର୍ଘଟଣାରେ ଶ୍ରମିକଙ୍କ ମୃତାହତ ଘଟଣା ପରେ ଟିଟିଲାଗଡ ପୁଲିସ୍ ପହଞ୍ଚି  ଉଦ୍ଧାର କରିଥିଲେ । ଏପରିକି ଲୋକେ ଶବଉଦ୍ଧାରରେ  ସ୍ଥାନୀୟ ଲୋକେ ଅସହଯୋଗ କରିବାରୁ ଥାନାଧିକାରୀ ରଞ୍ଜନ ବରିହା ନିଜେ ମଧ୍ୟ ପୁଲିସ୍ କର୍ମଚାରୀଙ୍କ ସହ ଶବ ବୋହି ଆଣିଥିଲେ । ଏସମ୍ପର୍କରେ ଟିଟିଲାଗଡ ଥାନାରେ ଏକ ମାମଲା ରୁଜୁ ହୋଇଛି । ଜିଲ୍ଲା ଯୁବ କନ୍ଧ ସମାଜ ପକ୍ଷରୁ ଥାନା ସମ୍ମୁଖରେ ଶବ ରଖି ଧାରଣା ଦେଇଥିଲେ । ଏହି ଆଦିବାସୀ ସଂଘ ପକ୍ଷରୁ ୫୦ ଲକ୍ଷ ଟଙ୍କା କ୍ଷତିପୂରଣ ସହ ମୁରିହାହାଲ ରେଞ୍ଜର ଓ ଗୁଲମୀ ଏବଂ ଜଏନ୍ତରା ଫରେଷ୍ଟରଙ୍କ ନିଲମ୍ବନ ଦାବି କରିଛନ୍ତି ।  ଜଙ୍ଗଲରେ ବନକର୍ମଚାରୀଙ୍କ ବିନା ଜ୍ଞାତସାରରେ ଏଭଳି ଖଣିଜଦ୍ରବ୍ୟ ଖନନ ସମ୍ଭବ ନୁହେଁ ବୋଲି ବଲାଙ୍ଗୀର ଡିଏଫଓ ମତପ୍ରକାଶ କରିବା ସହ ଦୁଇଜଣ ଏସିଏଫ୍ ଙ୍କ ନିର୍ଦ୍ଦେଶରେ ଏକ ଟିମ୍ ଗଠନକରି ତଦନ୍ତ ନିର୍ଦ୍ଦେଶ ଦେଇଥିଲେ । ଏହି ଅନୁଯାୟୀ , ପରଦିନ ଦୁଇ ଏସିଏଫ୍ ବି ସି ରାଉଳ ଓ ଅଜିତ କୁମାର ବିଶିଙ୍କ ନେତୃତ୍ବରେ ଗୁଲମୀ ଫରେଷ୍ଟର ରଞ୍ଜିତ ସିଂଦେଓ ଓ ଜଏନ୍ତରା ଫରେଷ୍ଟର ଧ୍ରୁବ ବଗର୍ତ୍ତୀଙ୍କ ସମେତ ଅନ୍ୟାନ୍ୟ ବନକର୍ମଚାରୀଙ୍କ ଏହି ଟିମ୍ ଘଟଣାସ୍ଥଳରେ ଯାଇ ତଦନ୍ତ କରିଥିଲେ । ଏହି ଟିମ୍ ସହ ପୁଲିସ୍ ଓ ଗଣମାଧ୍ୟମର ପ୍ରତିନିଧିମାନେ ସେଠାର ପରିସ୍ଥିତି ଦେଖି ତାଜ୍ଜୁବ୍ ହେଇଯାଇଥିଲେ ।  ପାହାଡ ଉପରେ ଅସ୍ଥାୟୀ କ୍ୟାମ୍ପ୍ ପକାଯାଇ ମଦମାଂସର ଭୋଜିଭାତ କରି ଲାଇଟ୍ ଲଗାଇ ବିସ୍ଫୋରଣରେ ସୁଡଙ୍ଗ ଫଟାଇ ରତ୍ନପଥର ଖୋଳା ଯାଉଥିଲା । ସେଠାରୁ ତଦନ୍ତକାରୀଦଳ ତାର ବଣ୍ଡଲ୍ , ପାଣି , ପ୍ଲାଷ୍ଟିକ୍ , ଖାଦ୍ୟଦ୍ରବ୍ୟ , ରଫା କୋଡିକୋଦାଳ ଟାଙ୍ଗିଆ , ରଶି ଆଦି ଜବତ କରାଯାଇଛି । ପାହାଡଜଙ୍ଗଲସାରା ଶହ ଶହ ଖାଲ ଖୋଳାଯାଥିବା ଓ ଗୋଟିଏ ଗୋଟିଏ ସୁଡଙ୍ଗ ଶହେ / ଦେଢଶହ ଫୁଟ୍ ର ଥିବା ଦେଖାଯାଇଛି । 

ଅନୁସନ୍ଧାନରୁ ଜଣାପଡିଛି ଯେ , ବହୁବର୍ଷରୁ ଏଠାରେ ଏଭଳି ଏହା ଚାଲିଛି । ବନକର୍ମଚାରୀଙ୍କ ସମ୍ପୂର୍ଣ୍ଣ ଜ୍ଞାତସାରରେ ଏହା ଚାଲିଥିଲା ଓ ମଝିରେ ମଝିରେ ସେମାନେ ସେଠାକୁ ଯାଇ ମଧ୍ୟ ଆପ୍ୟାୟିତ ହେଉଥିବା ଶୁଣିବାକୁ ମିଳୁଛି । ଅଳ୍ପଦିନତଳେ ଦୁଇଜଣ ସ୍ଥାନୀୟ ଫରେଷ୍ଟରଙ୍କୁ ନିଯୁକ୍ତି କରାଯାଇଛି । ଜଣେ କେନ୍ଦୁପତ୍ର ବିଭାଗରୁ ଓ ଜଣେ ଟିକ୍ରାପଡାର । 

କିଛିବର୍ଷତଳେ ବନ୍ଧପଡା ଅଞ୍ଚଳର କୁଗରିମହୁଲ ନିକଟସ୍ଥ ଜଙ୍ଗଲରେ ମଧ୍ୟ ଏଭଳି ଚୋରାରତ୍ନପଥର ଖୋଳାରେ ଏକାଧିକ ଶ୍ରମିକଙ୍କ ମୃତ୍ୟୁ ଘଟିଥିଲା । ଏଣୁ ବଲାଙ୍ଗୀରଜିଲ୍ଲାର ଜଙ୍ଗଲରେ ଏହା ବିଭିନ୍ନସମୟରେ ବିଭିନ୍ନ ସ୍ଥାନରେ ଚାଲିଆସିଥିବା ଜଣାଯାଇଛି । ସଂରକ୍ଷିତଜଙ୍ଗଲରେ ଚୋରାମାଙ୍ଗାନିଜ୍ , ଗ୍ରାଫାଇଟ୍ ଓ ରତ୍ନପଥର ଖନନ ସତ୍ତ୍ୱେ ବିଭାଗ ଉଦାସୀନ ଓ କେତେକ କ୍ଷେତ୍ରରେ  ସାମିଲ୍ ରହୁଥିବା ଅଭିଯୋଗ ହେଉଛି ।
ଏବେ ଏହି ଘଟଣାରେ ଡିଏଫଓ ବନକର୍ମଚାରୀଙ୍କୁ ଖାଲ ଗୁଡିକୁ ପୋତିଦେବାକୁ ଗୁପ୍ତନିର୍ଦ୍ଦେଶ ଦେଇଥିବା କୁହାଯାଉଛି  ।